ފަސް ފަހަރު ދުނިޔޭގެ ޗެމްޕިއަންކަން ހޯދާފައިވާ ބްރެޒިލްގެ ނޭމަރާ ކަވާލިއޯ މިއަހަރުގެ ވިޒިޓް މޯލްޑިވްސް ޕްރޯގައިވެސް ވާދަކުރަން ނިންމައިފިއެވެ.

އުމުރުން 47 އަހަރުގެ ނޭމަރާ އަކީ މިދިޔަ އަހަރުގެ މުބާރާތުގައިވެސް ވާދަކުރި އެތުލީޓެކެވެ. އެ މުބާރާތުން އޭނާއަށް ލިބިފައިވަނީ ތިންވަނައެވެ. އޭނާ ވަނީ 2003، 2004، 2007، 2008 އަދި 2009 ވަނަ އަހަރު ދުނިޔޭގެ ޗެމްޕިއަންކަން ހޯދާފައެވެ. މިވަގުތު ދުނިޔޭގެ ރޭންކިންގެ ދެވަނާގައި ހިމެނިފައިވާ ނޭމަރާ ވަނީ މިއަހަރު ބޭއްވި ޕައިޕްލައިން މުބާރާތުގެ ޗެމްޕިއަންކަންވެސް ހޯދާފައެވެ.

ވިޒިޓް މޯލްޑިވްސް ޕްރޯ 2023ގައި ވާދަކުރާނެކަމަށް މިހާތަނަށް އިއުލާނުކޮށްފައިވާ އަންހެން އެތުލީޓުންނަށް ބަލާއިރު، ފާހަގަކޮށްލެވޭ ގިނަ އެތުލީޓުން ހިމެނެއެވެ. އޭގެތެރޭގައި 2017 ވަނަ އަހަރު ދުނިޔޭގެ ޗެމްޕިއަންކަން ހޯދާފައިވާ ޕޯޗުގަލްގެ ޖޮއާނާ ޝެންކާއާއި 2019 ވަނަ އަހަރު ދުނިޔޭގެ ޗެމްޕިއަންކަން ހޯދި ޖަޕާނުގެ ސަރީ އޮހާރާއާއި ދެފަހަރު ދުނިޔޭގެ ޗެމްޕިއަންކަން ހޯދާފައިވާ ކެނެރީ އައިލެންޑްސްގެ އެލެގްޒަންޑާ ރިންޑާ ފާހަގަކޮށްލެވެއެވެ.

ވިޒިޓް މޯލްޑިވްސް ޕްރޯ 2023އަކީ މިއަހަރުގެ ވޯލްޑް ޓުއާގައި ހިމެނޭ ފަސްވަނަ މުބާރާތެވެ. މި ޓުއާގެ ފުރަތަމަ ހަތަރު މުބާރާތް ކުރިޔަށް ގެންގޮސްފައިވަނީ ބްރެޒިލާއި ޗިލީގައެވެ.