ވިޒިޓް މޯލްޑިވްސް ޕްރޯ 2023: ދެ ޗެމްޕިއަނުން ކަމަށްވާ ޕިއޭ ލުއިސް ކޮސްޓެސްއާއި އިއާން ކެމްބެލް ވާދަކުރާނެ

ދުނިޔޭގެ ޗެމްޕިއަންކަން ހޯދާފައިވާ ދެ ބޮޑީބޯޑަރުން ކަމަށްވާ، ފްރާންސްގެ ޕިއޭ ލުއިސް ކޮސްޓެސްއާއި ސައުތު އެފްރިކާގެ އިއާން ކެމްބެލް މިއަހަރުގެ ވިޒިޓް މޯލްޑިވްސް ޕްރޯގައި ވާދަކުރާނެކަން އިއުލާނުކޮށްފިއެވެ.

ޕިއޭ ލުއިސް ކޮސްޓެސްއަކީ މިދިޔަ އަހަރުގެ މުބާރާތުގައިވެސް ވާދަކުރި އެތުލީޓެކެވެ. މެންސް އޯޕަންއާއި ޑްރޮޕް ނީގެ ބައިގައި ވާދަކޮށް، އޭނާ ކަޓާފައިވަނީ ކުއާޓަރ ފައިނަލުންނެވެ. މިއަހަރު އޭނާ ވާދަކުރުމަށް ހަމަޖެހިފައިވަނީ ހަމައެކަނި މެންސް އޯޕަން ބައިގައެވެ. ދެފަހަރު ދުނިޔޭގެ ޗެމްޕިއަންކަން އަދި ތިން ފަހަރު އެފްރިކާގެ ޗެމްޕިއަންކަން ހޯދާފައިވާ ޕިއޭ ލުއިސް ކޮސްޓެސްއަކީ ދުނިޔޭގެ ރޭންކިންގެ 13 ވަނަ ބޮޑީބޯޑަރެވެ.

ފުރަތަމަ ފަހަރަށް ވިޒިޓް މޯލްޑިވްސް ޕްރޯގައި ވާދަކުރާ އިއާން ކެމްބެލް ވާދަކުރާނީ މެންސް އޯޕަންއާއި ޑްރޮޕްނީގެ ބައިގައެވެ. އިއާންއަކީ 2017 ވަނަ އަހަރު ދުނިޔޭގެ ޗެމްޕިއަންކަން ހޯދާފައިވާ އެތުލީޓެކެވެ. މީގެއިތުރުން އޭނާއަކީ 2020 ވަނަ އަހަރުގެ ޕައިޕްލައިން މުބާރާތުގެ ޗެމްޕިއަނެވެ.

މިއަހަރުގެ މުބާރާތުގައި ބައިވެރިވާ ބައެއް އަންހެން އެތުލީޓުންވެސް ވަނީ އިއުލާނުކޮށްފައެވެ. އޭގެތެރޭގައި މިދިޔަ އަހަރު މުބާރާތުގައިވެސް ވާދަކުރި ޖަޕާނުގެ ސަރީ އޮހާރާއާއި ކެނެރީ އައިލެންޑްސްގެ އެލެގްޒަންޑާ ރިންޑާ ފާހަގަކޮށްލެވެއެވެ. ސަރީއަކީ 2019 ވަނަ އަހަރުގެ ދުނިޔޭގެ ޗެމްޕިއަނެވެ. ދުނިޔޭގެ ރޭންކިން އެއްވަނައިގައި މިވަގުތު އުޅެނީ ސަރީ އޮހާރާއެވެ.

ރިންޑާއަކީ ވެސް ދެފަހަރު ދުނިޔޭގެ އެއްވަނަ ހޯދާފައިވާ އެތުލީޓެކެވެ. މިދިޔަ އަހަރުގެ މުބާރާތުން އޭނާ ބަލިވީ ފައިނަލުންނެވެ. މީގެއިތުރުން، 2014 ވަނަ އަހަރު ދުނިޔޭގެ ޗެމްޕިއަންކަން ހޯދައި، ރިންޑާ ވެގެންދިޔައީ ބޮޑީބޯޑިންގެ ތާރީޚުގައި އެންމެ ޒުވާން ޗެމްޕިއަނަށެވެ. އޭރު އޭނާގެ އުމުރަކީ 16 އަހަރެވެ.

އައިބީސީ ވޯލްޑް ޓުއާގައި ހިމެނޭ ވިޒިޓް މޯލްޑިވްސް ޕްރޯ ކުރިޔަށް ގެންދިޔުމަށް ހަމަޖެހިފައިވަނީ އޮގަސްޓު މަހު 3 ވަނަ ދުވަހުން 12 ވަނަ ދުވަހުގެ ނިޔަލަށް، މާލޭ ވަރުނުލާ ރާޅުގަނޑު ސަރަހައްދުގައެވެ.