ރަކީދޫގައި އިގްތިޞާދެއް ބިނާކޮށް ކުރިއެރުވޭނެ: މެންބަރު

މަދު މީސްކޮޅެއް ދިރިއުޅުނު ނަމަވެސް ވ. ރަކީދޫއަކީ އިގްތިޞާދެއް ބިނާކޮށް ކުރިއެރުވޭނެ ރަށެއް ކަމަށް ކެޔޮދޫ ދާއިރާގެ މެންބަރު ހުސެއިން ގާސިމް ވިދާޅުވެއްޖެއެވެ.

މެންބަރު ހުސެއިން ގާސިމް މިފަދައިން ވިދާޅުވީ އެމްޑީޕީ އަދި ގުޅިފައިވާ ޕާޓީތަކުގެ ރިޔާސީ ކެންޑިޑޭޓު ރައީސް އިބްރާހީމް މުހައްމަދު ޞާލިހު ރަކީދޫއަށް ކުރެއްވި ދަތުރުފުޅުގައި އެރަށުގެ ރައްޔިތުންނާ ބައްދަލުކުރެއްވުމަށް ބޭއްވެވި ޖަލްސާގައި ވާހަކަފުޅު ދައްކަވަމުންނެވެ.

މެންބަރު ވިދާޅުވީ ރަކީދޫއަކީ 360 ވަރަކަށް މީހުންގެ އާބާދީއެއް އޮންނަ ރަށެއް ނަމަވެސް ރަކީދޫއަކީ މުޅި ވ. އަތޮޅުންވެސް އެންމެ ފަސޭހައިން ބިން އިތުރުކޮށް އިގްތިސާދު ކުރިއެރުވޭނެ ރަށް ކަމުގައި ގަބޫލުކުރައްވާ ކަމަށެވެ.

ރަކީދޫގައި މިވަގުތު ހުރީ އެންމެ ގެސްޓްހައުސްއެއް ކަމަށާއި، އެހެންނަމަވެސް ތަރައްގީގެ މަޝްރޫއުތަކާއެކު އެރަށުގައި އިގްތިޞާދެއް ބިނާކުރެވޭނެ ކަމަށް ދާއިރާގެ މެންބަރު ވިދާޅުވިއެވެ. ރަކީދޫގައި ގެސްޓްހައުސް ވިޔަފާރި ކުރުމަށް ގިނަ ބަޔަކު ޝައުގުވެރިކަން ފާޅުކުރަމުންދާކަން ވެސް އޭނާ ވަނީ ފާހަގަކުރައްވާފައެވެ.

މެންބަރު ހުސެއިން ގާސިމް ވަނީ އެރަށުގައި ބީޗެއް ހަދައިދިނުމަށް އެދިވަޑައިގެންފައެވެ.

މީގެ އިތުރުން ވެސް މެންބަރު ވަނީ ރަކީދޫއަށް ބޭނުންވާ ބައެއް އިތުރު ކަންކަން ވެސް ފާހަގަކުރައްވާފައެވެ. މިގޮތުން އެރަށުން ފެންވަރު ރަނގަޅު ތައުލީމެއް ލިބޭނެ ގޮތް ހަދައިދެއްވުމަށް އެދިވަޑައިގެންނެވިއެވެ. އަދި ޒުވާނުންނަށް ބޭނުންވާ ފުޓްސަލް ދަނޑާއި އަދިވެސް ރަށުގެ ތަރައްގީއާ ގުޅޭ ގިނަ މަޝްރޫއުތަކެއް ފާހަގަކުރެއްވިއެވެ.