ޖީޑީޕީން ބޮލަކަށް 12000ށްވުރެ ގިނަ ޑޮލަރު ޖެހޭއިރު އެއްވެސް ރައްޔިތަކު އަސާސީ ޚިދުމަތުން މަހުރޫމުވެގެން ނުވާނެ: ރައީސް

ރާއްޖޭގައި ޖީޑީޕީގެ ނިސްބަތުން މީހެއްގެ ބޮލަށް 12000 އަށްވުރެ ގިނަ ޑޮލަރު ޖެހޭއިރު އެއްވެސް ރައްޔިތަކު އަސާސީ ޚިދުމަތުން މަހުރޫމުވެފައި ހުރެގެން ނުވާނެ ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހު ވިދާޅުވެއްޖެއެވެ.

މީމު އަތޮޅަށް ކުރައްވަމުން ގެންދަވާ ދަތުރުފުޅުގައި އެ އަތޮޅުގެ ރަތްމަންދޫއަށް ވަޑައިގެން ރައީސް ވިދާޅުވީ އެ ރަށަކީ ކުޑަ އާބާދީއެއް އޮންނަ ރަށަކަށްވުމުން ކުރީ ސަރުކާރުތަކުން އިހުމާލުވެފައިވާ ކަމަށެވެ. ނަމަވެސް ރާއްޖެއަކީ މި ސަރަހައްދުގައި ޖީޑީޕީގެ ނިސްބަތުން ބަލާއިރު ބޮލަކަށް އެންމެ ބޮޑު އަދަދެއް ޖެހޭ ޤައުމަށްވާއިރު ހުރިހާ ރައްޔިތުންނަށް ވެސް ހަމަހަމަކަމާއެކު އަސާސީ ޚިދުމަތް ފޯރުކޮށްދެވެން ޖެހޭނެއެވެ.

ރައީސް ވިދާޅުވީ ޖަޒީރާ ރާއްޖޭގެ ގޮތުގައި މެނިފެސްޓޯއަކާއެކު ނުކުމެވަޑައިގެންނެވީ ވެސް ދައުލަތަށް ލިބޭ އާމްދަނީ ހަމަހަމަ ގޮތެއްގައި ރައްޔިތުންނަށް ފޯރުކޮށްދިނުމުގެ މަގުސަދުގައި ކަމަށެވެ. އަދި ތަރައްގީގެ ވާހަކަތައް ދައްކަން ޖެހޭނީ ފެނާއި ނަރުދަމާ އާއި ތައުލީމާއި ސިއްހީ ޚިދުމަތް ފަދަ އަސާސީ ޚިދުމަތް ގާއިމްކުރުމަށްފަހު ކަމަށާއި އެކަން ހާސިލު ކުރުމަށް މި ސަރުކާރުން ގިނަ ކަންކަން ކުރަމުން އަންނަ ކަމަށެވެ.

މި ސަރުކާރުން ބޭނުންވަނީ ރައްޔިތުންގެ ޚިޔާލާއެކު ކުރިއަށްދާން ކަމަށާއި އެހެންވެ، ކުޑަ އާބާދީ ރަށްތައް ވެސް މުހިންމު ކަމަށް ރައީސް ވިދާޅުވިއެވެ.

ރައީސް ވަނީ ރަތްމަންދޫގައި މިހާތަނަށް އެއްވެސް ސަރުކާރުން ކުރިއަށްނުގެންދާ ވަރަށް މި ސަރުކާރުން މަޝްރޫއުތައް ކުރިއަށްގެންދާކަން ފާހަގަކުރައްވައި އިތުރު މަޝްރޫއުތައް ވެސް ކުރިއަށްގެންދަވާނެ ކަމަށް ވިދާޅުވެފައެވެ. އެގޮތުން، އެ ރަށުގައި އެ ރަށުގެ ޖެޓީ ރަނގަޅު ކުރުމަށްފަހު ބަނދަރުގެ މަސައްކަތާއި ގިރާ ސަރަހައްދުގެ މަސައްކަތް މިއަހަރު ނިމުމުގެ ކުރިން ފެށިގެންދާނެ ކަމަށް ވިދާޅުވިއެވެ. އެ މަސައްކަތް މިހާރު އޮތީ ޕްރީ ޓެންޑަރިންގ މަރުހަލާގައެެވެ.

މީގެ އިތުރުން ރަށުގެ ޒުވާނުންނަށް ޒަމާނީ ފެންވަރުގެ ވޮލީ ކޯޓެއް އަންނަ އަހަރު އަޅުއްވައިދެއްވާނެ ކަމަށާއި މިހާރު އެ ރަށު ސްކޫލުގައި ގްރޭޑް 6 އާ ހަމައަށް ކިޔަވައިދޭއިރު ރައްޔިތުން ބޭނުންވާނަމަ ސެޓެލައިޓް ސްކޫލްގެ ޚިދުމަތް ފައްޓަވާނެ ކަމަށް ވެސް ރައީސް ވިދާޅުވިއެވެ.