މަސްތުވާއެއްޗެހި ބޭނުން ކުރަން ޔޫއެން ބިލްޑިންގ އަށް ވަތް މީހަކު 15 ދުވަހަށް ބަންދު
އޭނާ ބުނެފައިވަނީ އޭނާ ޔޫއެން ބިލްޑިންގ ތެރެއަށް ވަންކަމަށް
ފުލުހުން ހޯދާފައިވާ މަސްތުވާއެއްޗެއް
މަސްތުވާއެއްޗެހި ބޭނުން ކުރަން ޔޫއެން ބިލްޑިންގ އަށް ވަން މީހަކު 15 ދުވަހަށް ބަންދު ކުރުމަށް ކްރިމިނަލް ކޯޓުން އަމުރުކޮށްފިއެވެ.
މި މައްސަލައިގައި އުމުރުން 36 އަހަރުގެ ދިވެހި ފިރިހެނަކު ހައްޔަރުކުރީ ވައްކަމާއި، އެހެން މީހެއްގެ މުދަލެއްގެ މައްޗަށް ހުއްދަ ނޫން ގޮތުގައި ބާރު ހިންގުމާއި، ހުއްދަ ނޫން ތަނަކަށް ވަދެ ހުރުމުގެ ކުށުގެ ތުހުމަތުގައެވެ.
އެހެންނަމަވެސް އެ ތުހުމަތުތަކަށް އިންކާރު ކުރަމުން އޭނާ ބުނެފައިވަނީ އޭނާ ޔޫއެން ބިލްޑިންގ ތެރެއަށް ވަންކަމަށާއި، ނަމަވެސް އެއީ މަސްތުވާތަކެތި ބޭނުން ކުރުމަށް ކަމަށެވެ. އެތަނަށް ވަނީ ވައްކަން ކުރުމަށް ނޫންކަމަށްވެސް އޭނާ ވަނީ ކޯޓުގައި ބުނެފައެވެ.
މި މައްސަލައިގެ ކޯޓު އަމުރުގައި ބަޔާންކޮށްފައިވާ ގޮތުގައި ސީންއަށް ދިޔަ ފުލުހުންގެ ޙާދިސާ ރިޕޯޓަށް ބަލާއިރު، ކުށުގެ ތުހުމަތު ކުރެވޭ މިންވަރަށް ކޮންމެވެސް ވަރެއްގެ ހެކި ހުށަހަޅާފައިވާކަމަށް ބެލެވެއެވެ.
ވުމާއެކު، އޭނާ 15 ދުވަހަށް ބަންދު ކުރުމަށް ވަނީ އަމުރުކޮށްފައެވެ. އޭނާގެ ބަންދުގެ މުއްދަތު ހަމަވާނީ 30 ޖުލައި 2023 ގައެވެ.
ކޯޓު އަމުރުގައި ބުނެފައިވާ ގޮތުގައި އޭނާއަކީ ކުށުގެ ރެކޯޑު ގިނަ ފަރާތެކެވެ. ޚާއްސަކޮށް އޭނާއަކީ ވައްކަމުގެ މައްސަލަތަކުގެ ކުށުގެ ރެކޯޑު އޮތް ފަރާތެއްކަމަށް ކޯޓު އަމުރުގައި ބުނެއެވެ.
ކްރިމިނަލް ކޯޓުގައި މި އަމުރު ނެރުއްވީ ގާޒީ އިބްރާހިމް ޛިހުނީއެވެ.
