އާރްޓީއެލް ފެރީގެ ޚިދުމަތް ގއ. އަދި ގދ. އަށް: ތިން ދުވަސް ތެރޭ 689ށް މީހުން ދަތުރުކުރި

ރާއްޖެ ހައި ސްޕީޑް ފެރީ ވިއުގައަކުން ގުޅާލުމަށް ފަރުމާކޮށްފައިވާ "އިންޓަރގްރޭޓެޑް ނޭޝަނަލް ޕަބްލިކް ފެރީ ނެޓްވޯރކް" މަޝްރޫއުގެ ދަށުން ދެމުންދާ ރާއްޖެ ޓްރާންސްޕޯޓް ލިންކް ފެރީ ޚިދުމަތް ޒޯން 5 ގައި ހިމެނޭ ގއ. އަދި ގދ. އަތޮޅުގައި ޓެސްޓް ދަތުރުތައް ފަށާފައިވާއިރު މިހާތަނަށް ތިން ދުވަސް ތެރޭގައި 689ށް މީހުން ދަތުރުކޮށްފިއެވެ.

ރާއްޖެއެމްވީއަށް މައުލޫމާތު ދެއްވަމުން އެމްޓީސީސީގެ ސީއީއޯ އާދަމް އާޒިމް ވިދާޅުވީ ޓެސްޓް ދަތުރުތަކަށް ތަރުހީބު ބޮޑު ކަމަށެވެ. އަދި ދަތުރުތަކާމެދު އާންމުން ވަރަށް ހިތްހަމަޖެހޭ ކަމަށެވެ.

Advertisement

އާޒިމް ވިދާޅުވީ ކުރިން ބައެއް ރަށްތަކުގައި ދޯނިތަކުގައި ފަސް ގަޑިއިރުން އާންމުން ކުރާ ދަތުރު މިހާރު ދެ ގަޑިއިރުން ކުރެވޭތީ، އެކަން އެމީހުން ފާހަގަކޮށްފައިވާ ކަމަށެވެ. އަދި އެއީ ލިބިގެންދިޔަ ވަރަށް ބޮޑު ލުއިފަސޭހައެއްކަން ފާހަގަކުރި ކަމަށެވެ.

ޒޯން 5 ގައި ހިމެނޭ ގއ. އަދި ގދ. އަތޮޅުގައި އާރްޓީއެލްގެ ޓެސްޓް ދަތުރުތައް ފެށީ ޖުލައި 13 ވަނަ ދުވަހުއެވެ. އެމްޓީސީސީން ބުނީ ޖުލައި 19ށް ހަފްތާއަކަށް ފެރީ ދަތުރުތައް ކޮށްދޭނީ ހިލޭ ކަމަށެވެ.

ދަތުރުތައް ހިލޭ ކޮށްދޭން ނިންމާފައިވަނީ ކަސްޓަމަރުން ފެރީ ޝެޑިއުލަށް އަހުލުވެރިކޮށް، މި ޚިދުމަތް ރަނގަޅަށް ތަޖުރިބާކުރުމުގެ ފުރުސަތު ކަސްޓަމަރުންނަށް ދިނުމާއެކު، ކަސްޓަމަރުންގެ ޚިޔާލާއި އެއްގޮތަށް ޚިދުމަތުގެ ފެންވަރު ރަނގަޅުކޮށް ޚިދުމަތް ހަރުދަނާކުރުން ކަމަށް އެމްޓީސީސީން ބުނެއެވެ. މި މުއްދަތުގައި އެ ރަށެއްގެ ކައުންސިލަށް ގުޅައިގެން ދަތުރުކުރުމުގެ ޖާގަ ހޯދޭނެ ކަމަށް އެމްޓީސީސީން ބުނެއެވެ.

އެމްޓީސީސީން ބުނީ ޖުލައި 20ން ފެށިގެން ގއ. އަދި ގދ. އަށް ކުރާ ދަތުރުތަކަށް ފައިސާ ނަގާނެ ކަމަށެވެ. އެދުވަހުން ފެށިގެން ކަސްޓަމަރުންނަށް ޓިކެޓް ނެގޭނީ އެކަމަށް ހާއްޞަކޮށްފައިވާ ވެބްސައިޓް ނުވަތަ އާރްޓީއެލް ޓްރެވެލް އެޕް މެދުވެރިކޮށް ކަމަށް އެމްޓީސީސީން ބުނެއެވެ.

ރަސްމީކޮށް އަގުނަގައިގެން ޚިދުމަތް ދޭން ފެށުނުކަމުގައިވީނަމަވެސް، ނޭޝަނަލް ސޯޝަލް ޕްރޮޓެކްޝަން އޭޖެންސީ (އެންސްޕާ)ގައި ރަޖިސްޓްރީވެފައިވާ ޚާއްސަ އެހީއަށް ބޭނުންވާ ފަރާތްތަކަށް ހިލޭ ދަތުރުކުރެވޭނެ ކަމަށް އެމްޓީސީސީން ބުނެއެވެ.

ޒޯން 5 ގެ ގއ. އަދި ގދ. އަތޮޅުގެ އާރްޓީއެލް ފެރީ ޚިދުމަތް ހަފުތާއަކު ހަތް ދުވަހު، އާރްޓީއެލް ބްރޭންޑްގެ 6 ސްޕީޑް ފެރީ މެދުވެރިކޮށް 9 ރޫޓަކުން ލިބޭނެ ކަމަށް އެމްޓީސީސީން ބުނެއެވެ. އަދި އާރްޓީއެލް ފެރީ ޚިދުމަތުގެ ޝެޑިއުލް ވެބްސައިޓު އަދި ޓްރެވަލް އެޕް މެދުވެރިކޮށް ފެންނަން ހުންނާނެ ކަމަށް އެމްޓީސީސީން ބުނެއެވެ.

އެމްޓީސީސީން މިހާތަނަށް ހއ. ހދ. ށ އަދި ޅ އަތޮޅުގައި އާރްޓީއެލް ފެރީގެ ޚިދުމަތް ފަށާފައިވެއެވެ. މަޝްރޫއުގެ ފުރަތަމަ ފިޔަވަހީގެ ދަށުން ހއ، ހދ، އަދި ށ އަތޮޅު ޚިދުމަތް ފަށާފައިވާއިރު ދެވަނަ ފިޔަވަހީގެ މަސައްކަތް މިހާރު ދަނީ ކުރިއަށެވެ. އެގޮތުން ދެވަނަ ފިޔަވަހީގެ ދަށުން ނ، ރ، ބ، ޅ، ގއ، ގދ، ޏ އަދި ސ އަތޮޅު ޚިދުމަތް ފެށިގެންދާނެއެވެ. ތިންވަނަ ފިޔަވަހީގެ ދަށުން ކ، އއ، އދ، ވ، މ، ފ، ދ، ތ އަދި ލ ގުޅާލުމަށް ވަނީ ނިންމާފައެވެ.

މި މަޝްރޫއުގެ ދަށުން ޖުމްލަ 188 ރަށް ގުޅާލުމަށް ވަނީ ހަމަޖެހިފައެވެ. މުޅި ރާއްޖޭގައި ފެރީގެ ނިޒާމް 2023ގެ ނިޔަލަށް ޤާއިމްކުރުމަށް ވަނީ ޕްލޭންކޮށްފައެވެ. އާރްޓީއެލްގެ ޚިދުމަތަކީ ރައީސުލްޖުމްހޫރިއްޔާ އިބްރާހީމް މުހައްމަދު ސާލިހުގެ ޚާއްސަ އިސްނެންގެވުމެއްގެ ދަށުން ރާއްޖޭގައި ހިންގަމުންދާ ވަރަށް މުހިންމު މަޝްރޫއެކެވެ.