ރާއްޖެއާ މިސްރާ ދެމެދު ބާއްވާ، ސިޔާސީ ކަންކަމާބެހޭ މަޝްވަރާތަކުގެ ދެވަނަ ބައްދަލުވުން އާދިއްތަ ދުވަހު ބާއްވާނެ ކަމަށް ފޮރިން މިނިސްޓްރީން ބުނެފިއެވެ.

ފޮރިން މިނިސްޓްރީން ބުނީ އެ ބައްދަލުވުން އޮންނާނީ ރާއްޖޭގައި ކަމަށެވެ. އަދި ބައްދަލުވުން ކުރިއަށްދާނީ އާދިއްތަ ދުވަހުގެ މެންދުރު ކަމަށެވެ.

ރާއްޖޭގެ ފަރާތުން ޕޮލިޓިކަލް ކޮންސަލްޓޭޝަންސް ލީޑް ކުރައްވާނީ މިނިސްޓަރ އޮފް ސްޓޭޓް ފޮރ ފޮރިން އެފެއަރޒް އަހުމަދު ޚަލީލެވެ. މިސްރުގެ ސަރުކާރުގެ ފަރާތުން ޕޮލިޓިކަލް ކޮންސަލްޓޭޝަންސްގެ ކޯ ޗެއަރމަންކަން ކުރައްވާނީ، މިސްރުގެ މިނިސްޓްރީ ފޯރ ފޮރިން އެފެއަރޒްގެ އެސިސްޓެންޓް މިނިސްޓަރ ފޯ އޭޝިއަން އެފެއަރޒް އެމްބެސެޑަރ، އައިމަން ކާމިލެވެ.

މި މަޝްވަރާގެ ތެރެއިން، ދެގައުމުގެ މަލްޓިލޭޓަރަލް މައްސަލަތަކާ ގުޅޭގޮތުން މަޝްވަރާ ކުރާނެއެވެ. ރާއްޖެއާ މިސްރާ ދެމެދު، ދެގައުމުގެ ސިޔާސީ ކަންކަމާބެހޭ މަޝްވަރާތަކުގެ ފުރަތަމަ ބައްދަލުވުން ބޭއްވީ މިސްރުގެ ގާހިރާގައި 19 ޑިސެމްބަރ 2019ގައެވެ.

މި ބައްދަލުވުން ބާއްވަން ނިންމާފައިވާއިރު، ދިވެހިރާއްޖެއިން މިސްރަށް ދަތުރުކުރާ ދިވެހިންނަށް އޮން އެރައިވަލް ވިސާ ދޭން ވަނީ ނިންމާފައެވެ.

ފޮރިން މިނިސްޓްރީން ބުނީ މި އިންތިޒާމުގެ ދަށުން، ދިވެހި ޕާސްޕޯޓް އޮންނަ ފަރާތްތަކުން މިސްރަށް ދަތުރުކޮށް، އެ ގައުމަށް އެތެރެވާ ދުވަހުން ފެށިގެން ގިނަވެގެން 30 ދުވަހުގެ މުއްދަތަކަށް އެ ގައުމުގައި ތިބެވޭނެ ކަމަށެވެ.

މިއީ ޓޫރިސްޓް ވިސާއެކެވެ. އަދި މި ވިސާގެ ފީއަކީ 25 ޑޮލަރެވެ. ދިވެހި ޕާސްޕޯޓް އޮންނަ ފަރާތްތަކަށް ވިސާ އޮން އެރައިވަލް ދިނުމަށް މިސްރު ސަރުކާރުން ނިންމާފައި ވީނަމަވެސް، 30 ދުވަހަށްވުރެ ދިގު މުއްދަތަކަށް މިސްރަށް ޒިޔާރަތްކުރާ، ނުވަތަ ވަޒީފާ އަދާކުރުމަށް، ނުވަތަ ތައުލީމް ހާސިލްކުރުމަށް، ނުވަތަ މިސްރުގައި ވިޔަފާރިކުރުމަށް ބޭނުންވާ ދިވެހިން މިސްރަށް ދަތުރުކުމުގެކުރިން އެކަމަކާގުޅޭ ވިސާއެއް ނަގަންޖެހޭނެ ކަމަށް ފޮރިން މިނިސްޓްރީން ބުނެފައިވެއެވެ.

މިސްރަށް ދާ ދިވެހިންނަށް އޮން އެރައިވަލް ވިސާ ދިނުމަށް އެ ގައުމުގެ ސަރުކާރުން ނިންމި މި މުހިންމު ނިންމުން ދިވެހި ސަރުކާރުން ދެކެނީ، ދެ ގައުމުގެ ދެމެދުގައި އޮތް ގާތް ރަހުމަތްތެރި ގުޅުމާއި، މިސްރުން ދިވެހިރާއްޖެއަށް ދޭ ޚާއްސަ އަހައްމިއްޔަތުކަމުގެ ރަމްޒެއްގެ ގޮތުގައި ކަމަށް ފޮރިން މިނިސްޓްރީން ބުނެއެވެ.