ހޯރަފުށީގައި 5 ޕްރޮޖެކްޓެއްގެ މަސައްކަތް ކުރިއަށްދޭ، މިއަހަރުގެ ތެރޭގައި ނިންމާނަން: އާޒިމް
14 ޖުލައި 2023 | ހުކުރު 12:09އެއާޕޯޓު ސަރަހައްދުގެ ގޮނޑުދޮށް ހިމާޔަތް ކުރުމުގެ މަސައްކަތް ކުރިއަށްދޭ
އެމްޓީސީސީގެ ސީއީއޯ އާދަމް އާޒިމް ނޫސްވެރިންނާ ވާހަކަދައްކަވަނީ
ހއ. ހޯރަފުށީގައި 5 ޕްރޮޖެކްޓެއްގެ މަސައްކަތްތައް ކުރިއަށްދާ ކަމަށާއި، މިއަހަރުގެ ތެރޭގައި މަސައްކަތް ނިންމާ ރައްޔިތުންނާ ހާވަލުކުރާނެ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)ގެ ސީއީއޯ އާދަމް އާޒިމް ވިދާޅުވެއްޖެއެވެ.
އެރަށުގައި ކުރިއަށްގެންދާ ތަރައްގީގެ މަޝްރޫއުތައް ބައްލަވާލެއްވުމަށްފަހު މީޑިއާތަކަށް މައުލޫމާތު ދެއްވަމުން އާޒިމް ވިދާޅުވީ ހޯރަފުށީގައި 5 ޕްރޮޖެކްޓެއްގެ މަސައްކަތްތައް ބާރު ސްޕީޑްގައި ކުރިއަށްދާ ކަމަށެވެ. ހއ އަތޮޅުގެ ރައްޔިތުން އެއާޕޯޓަށް ފަސޭހައިން އެރުމަށް ހަދަމުންދާ ޖެޓީގެ މަސައްކަތަށް އިޝާރާތް ކުރައްވައި އާޒިމް ވިދާޅުވީ ޖުލައި މަހުގެ 31 ވަނަ ދުވަހަށް މަސައްކަތް ނިމެނޭ ކަމަށެވެ. އެއާޕޯޓު ސަރަހައްދުގެ ގޮނޑުދޮށް ހިމާޔަތް ކުރުމުގެ މަސައްކަތްތައް ކުރިއަށްދާކަން އާޒިމް ފާހަގަކުރެއްވިއެވެ. އަދި ވިދާޅުވީ އުދައެރުމުގެ މައްސަލަ ހައްލުކުރުމަށް ވެސް ރިވެޓްމެންޓް ޖަހާ ނިންމާފައިވާ ކަމަށެވެ.
އާޒިމް ވިދާޅުވީ ހޯރަފުށީ ކައިރިން އިތުރު ދެރަށް ހިއްކާ ނިމިފައިވާ ކަމަށާއި، ތިންވަނަ ރަށް ހެދުމަށް ހުއްދަ ލިބިފައިވާ ކަމަށެވެ. އެމަސައްކަތްތައް ކުރުމަށް ތައްޔާރުވަމުންދާ ކަމަށް އޭނާ ވިދާޅުވިއެވެ. އަދި މިހާރު ހެދިފައިވާ ދެ ރަށުގައި ވަރަށް ރީތި ބީޗެއް ހެދިފައިވާ ކަމަށް އާޒިމް ވިދާޅުވިއެވެ.
މީގެ އިތުރުން އާޒިމް ވިދާޅުވީ ޖުވެނައިލް ޔުނިޓެއް ގާއިމްކުރުމުގެ މަސައްކަތްތައް ކުރަމުންދާ ކަމަށާއި، އެއިމާރާތުގެ މަސައްކަތްތައް ނިންމާ އޮގަސްޓް މަހުގެ ތެރޭގައި ހަވާލުކުރެވޭނެ ކަމަށެވެ. އާޒިމް ވިދާޅުވީ އެމްޓީސީސީގެ ސީއެސްއާރްގެ ދަށުން ޕްރިސްކޫލެއް އިމާރާތް ކުރަމުންދާ ކަމަށާއި، އެ އިމާރާތުގެ ވެސް ބޮޑު ބައެއް ނިމިފައިވާ ކަމަށެވެ. އަދި ވިދާޅުވީ ދިރާސީ އައު އަހަރަށް އެސްކޫލު ކައުންސިލްއާ ހަވާލުކުރެވޭނެ ކަމަށެވެ.
މަގު ހެދުމުގެ މަސައްކަތަށް އިޝާރާތް ކުރައްވައި އާޒިމް ވިދާޅުވީ ފުރަތަމަ ފިޔަވަހީގެ ދަށުން 12 މަގެއް ޒަމާނީ ފެންވަރަށް ތާރުއަޅައި ތަރައްގީ ކުރާނެ ކަމަށެވެ. އެގޮތުން މިހާރު 11 މަގެއްގެ މަސައްކަތް ނިމިފައިވާ ކަމަށް އޭނާ ވިދާޅުވިއެވެ. އަދި ވިދާޅުވީ ކުރިއަށް އޮތް މަސް ދުވަހު ތެރޭގައި ޕްރޮޖެކްޓްގެ މަސައްކަތް ނިންމާ ރައްޔިތުންނާއި ހަވާލުކުރާނެ ކަމަށެވެ. މިމަސައްކަތް އެމްޓީސީސީއާއި ހަވާލުކޮށްފައިވަނީ 71.9 މިލިއަން ރުފިޔާއަށެވެ.
އާޒިމް ވިދާޅުވީ، ފުރަތަމަ ފިޔަވަހީގެ ދަށުން ތަރައްގީކުރާ މަގުތައް ނިމި، ދެވަނަ ފިޔަވަހީގެ މަސައްކަތް ވެސް އެމްޓީސީސީއާ ހަވާލުކުރުމުގެ މަޝްވަރާތައް ކުރިއަށްދާކަމަށެވެ.
