ޗެލްސީއާ އާސެނަލްއަށް ކުޅުނު ބްރެޒިލްގެ ވިލިއަން ނޮޓިންގހަމް ފޮރެސްޓަށް
އާސީޒަނަށް ނޮޓިންގހަމްއަށް ސޮއިކުރާ ފުރަތަމަ ކުޅުންތެރިއަކީ ވިލިއަން
ވިލިއަން މިދިޔަ ސީޒަންގައި ފުލަމްގައި ޗެލްސީއާ ދެކޮޅަށް ކުޅެނީ ފޮޓޯ-ކޮމްސެޕްޓް
ކުރިން ޗެލްސިއާއި އާސެނަލްއަށް ކުޅުނު ބްރެޒިލްގެ ވިންގަރ ވިލިއަން ނޮޓިންގހަމް ފޮރެސްޓަށް ބަދަލުވާން ތައްޔާރުވެއްޖެއެވެ.
މިދިޔަ ސީޒަންގައި ފުލަމްއަށް ކުޅުނު ވިލިއަން ނޮޓިންގހަމް ފޮރެސްޓާ ގުޅެނީ ހިލޭ އެއްބަސްވުމެއްގެ ދަށުންނެވެ. 34 އަހަރުގެ ވިލިއަންއަށް ކުރިއަށް އޮތީ މެޑިކަލްގެ ކަންކަން ފުރިހަމަ ކުރުމެވެ. ވިލިއަން ފުލަމްއާ ގުޅުނީ ބްރެޒިލްގެ ކޮރިންތިއަންސްއަށް ކުޅުމަށްފަހު 2022 ވަނަ އަހަރުގެ އޮގަސްޓް މަހުއެވެ. ނޮޓިންގހަމްއާ ގުޅުނީ ފުލަމްއިން އައު އެއްބަސްވުމެއް ހުށަހަޅާފައި ވަނިކޮށެވެ. މިދިޔަ ސީޒަންގައި ލީގުގައި ވިލިއަން ވަނީ ފަސް ގޯލް ޖަހާ, ހަ ގޯލް ޖަހަން އެހީވެދީފައެވެ. ފުރަތަމަ އެގާރައިގަ ހިމެނިގެން އޭނާ ލީގުގައި ކުޅުނީ 25 މެޗެވެ. ވިލިއަން ވަނީ ބްރެޒިލް ގައުމީ ޓީމަށް 70 މެޗު ކުޅެދީފައެވެ.
ވިލިއަން އަކީ ނޮޓިންގހަމް ފޮރެސްޓުން އައު ސީޒަނަށް ގެނައި ފުރަތަމަ ކުޅުންތެރިޔާއަށެވެ. އައު ސީޒަންގައި ނޮޓިންގހަމް ފޮރެސްޓްގެ ފުރަތަމަ މެޗުގައި ނުކުންނާނީ އޮގަސްޓް 12 ވަނަ ދުވަހު އާސެނަލްއާ ދެކޮޅަށެވެ.
