ރާއްޖޭގެ ރައްޔިތުން މިއަދު އެމްޑީޕީ ބަލައިގަންނަ ކަމަށާއި، މިއަދުގެ ރައީސުލްޖުމްހޫރިއްޔާއަކީ އިސްލާމް ދީނަށް ފުރައްސާރަ ނުކުރައްވާ، ދީން ކުރިއެރުވުމަށް މަސައްކަތްކުރައްވާ ވެރިއެއް ކަމަށް، އެމްޑީއޭގެ ލީޑަރު އަހުމަދު ސިޔާމް ވިދާޅުވެއްޖެއެވެ.

ބުރާސްފަތި ދުވަހުގެ ރޭ ކ. މާފުށީގައި ބޭއްވި "އުފާވެރި އަމާން ރާއްޖެ" ކެމްޕެއިން ޖަލްސާގައި ސިޔާމް ވިދާޅުވީ، މީގެ ކުރިން ރާއްޖޭގެ ރައީސުން ދީނަށް ފުރައްސާރަކުރައްވައި، ހަޖޫޖެއްސެވި މަންޒަރު ފެނިގެން ދިޔަ ކަމަށެވެ. ނަމަވެސް މިއަދުގެ ރައީސަކީ އިސްލާމް ދީން ހިމާޔަތްކުރައްވާ ވެރިއެއް ކަމަށާއި، ދީން ކުރިއެރުވުމަށް މަސައްކަތްކުރައްވާ ވެރިއެއް ކަމަށެވެ.

ސިޔާމް ވިދާޅުވީ މިއަދު އެމްޑީޕީއަކީ ރައްޔިތުން ބަލައިގަންނަ ޕާޓީއެއް ކަމަށެވެ. އަދި ޕާޓީއަށް އައި ބަދަލުތަކާއެކު މިއަދު ގިނަ އަދަދެއްގެ ރައްޔިތުން އެމްޑީޕީއާ ގުޅެމުންދާކަން ސިޔާމް ފާހަގަކުރެއްވިއެވެ.

ސިޔާމް ވިދާޅުވީ ރައީސް ސާލިހަކީ ވައުދު ފުއްދަވާ، އަދި އަވަސް ސްޕީޑެއްގައި ރައްޔިތުން ބޭނުންވާ ތަރައްގީ ގެނެސްދެއްވާ ވެރިއެއް ކަމަށެވެ. ރައީސްގެ އަރިހުން މިދިޔަ ފަސް އަހަރު ފެނިގެންދިޔައީ ކެތްތެރިކަމުގެ އެންމެ މަތީ ދަރަޖަ ކަމަށާއި، އެއީ މަޑުމައިތިރިކަމުގެ އެންމެ މަތީ ދަރަޖަކަމަށް ސިޔާމް ވިދާޅުވިއެވެ. ވެރިކަން ކުރުމަށް ފަސް އަހަރަކީ ގިނަ ދުވަސް ނޫންކަމަށާއި، ނަމަވެސް ރައްޔިތުން ބޭނުންވާ ތަރައްގީ ގެނެސްދެއްވާފައިވާ ކަމަށް ސިޔާމް ވިދާޅުވިއެވެ. ސިޔާމް ވިދާޅުވީ ރައީސް ސާލިހަކީ ބަސްފުޅު މަދު އަމަލުފުޅު ގިނަ ވެރިއެއް ކަމަށެވެ. އަދި މަޝްރޫއުތައް ކުރިއަށް ގެންދިއުމުގައި އަވަސް އަރުވާލައްވައިގެން ނޫޅުއްވާކަން ސިޔާމް ފާހަގަކުރެއްވިއެވެ

މީގެ އިތުރުން ސިޔާމް ވިދާޅުވީ ރާއްޖޭގެ އިގްތިސާދު ދަމަހައްޓައި ރައްޔިތުންނަށް ރަށުގައި ތިބެގެން އާމްދަނީ ހޯދޭނެ ގޮތްތައް ރައީސް ހަމަޖައްސަވައިދެއްވާފައި ވާކަމަށެވެ. އަދި ލޯކަލް ޓޫރިޒަމް ކުރިއަރައި ދިޔައީ ރައީސް ސާލިހުގެ ސިޔާސަތުގެ ސަބަބުން ކަމަށް ސިޔާމް ވިދާޅުވިއެވެ.