ލިވަޕޫލްގެ ކެޕްޓަން ހެންޑަސަންވެސް ސައޫދީ ލީގަށް
13 ޖުލައި 2023 | ބުރާސްފަތި 13:50އަލްއިއްތިފާގުން ހުށަހަޅާފައިވަނީ ލިވަޕޫލުން ދޭ މުސާރައިގެ ތިންގުނަ ބޮޑު އަދަދެއް
ލިވަޕޫލްގެ ކެޕްޓަން ޖޯޑަން ހެންޑަސަން
ލިވަޕޫލްގެ ކެޕްޓަން ޖޯޑަން ހެންޑަސަން ސައޫދީ އަރަބިއްޔާގެ ސުޕަ ލީގުގެ އަލްއިއްތިފާގަށް ބަދަލުވާން ނިންމައިފިއެވެ.
ހެންޑަސަން، 33، މި ގޮތަށް ނިންމީ ލިވަޕޫލާއެކު އޭނާ ހަދާފައިވާ ކޮންޓްރެކްޓްގައި ބާކީ ދެ އަހަރު އޮއްވައި ލިވަޕޫލްގެ ކޯޗު ޔާގެން ކްލޮޕްއާ މިއަދު ބައްދަލުކުރުމަށްފަހުއެވެ. މިއާއެކު މިހާރު ކުރިއަށްދަނީ އޭނާ ވިއްކާލަން ދެ ކުލަބުން އަގަކާމެދު އެއްބަސްވުމުގެ މަރުހަލާއެވެ.
ސައުތަމްޓަނުން ލިވަޕޫލަށް ބަދަލުވި، ހެންޑަސަން ސައޫދީ ލީގަށް ބަދަލުވުމަށް އެންމެ ބޮޑަށް ބާރުއެޅީ ލިވަޕޫލްގެ ލެޖެންޑަރީ ކެޕްޓަން ސްޓީވަން ޖެރާޑެވެ. އޭނާއަކީ މިހާރު ސައޫދީ އަރަބިއްޔާގެ އަލްއިއްތިފާގުގެ ކޯޗެވެ. އެކުގައި ލިވަޕޫލަށް ކުޅުމަށްފަހު ޖެރާޑް ވަކިވުމުން ލިވަޕޫލްގެ ކެޕްޓަންކަން ލިބުނީ ހެންޑަސަންއަށެވެ. އޭގެ ފަހުން އޭނާ ވަނީ ލިވަޕޫލާއެކު ބޮޑެތި ކާމިޔާބީތަކެއް ހޯދާފައެވެ.
އިނގިރޭސި މީޑިޔާތަކުން ބުނާގޮތުގައި ހެންޑަސަން ސައޫދީ ލީގަށް ބަދަލުވާން ނިންމި މައިގަނޑު ސަބަބަކީ އަލްއިއްތިފާގުން އޭނާއަށް ދޭން ބުނި މުސާރައެވެ. ލިވަޕޫލުން މިހާރު ހެންޑަސަންއަށް ދެނީ ހަފުތާއަކު ދެ ލައްކަ ޕައުންޑެވެ. ނަމަވެސް އަލްއިއްތިފާގުން ވަނީ ހަފުތާއަކު ހަތް ލައްކަ ޕައުންޑްގެ މުސާރައެއް ހުށަހަޅާފައެވެ.
އިނގިރޭސި ބައެއް ނޫސްތަކުން ބުނަނީ ސައޫދީއަށް ދިރިއުޅުން ބަދަލުކުރަން ހެންޑަސަންގެ އާއިލާވެސް ބޭނުންނުވާކަމަށެވެ. ނަމަވެސް އިއްތިފާގުން ދޭން ބުނި މުސާރައަކީ ކުޅުން ހުއްޓާލާފައި އާއިލާގެ ކުރިމަގު ބިނާކުރަން ހެންޑަސަންއަށް ލިބޭ ބޮޑު މާލީ ކުރިއެރުމަކަށް ވުމުން ސައޫދީއަށް ބަދަލުވާން ނިންމީ ކަމަށެވެ.
ސައޫދީގެ ކުލަބުތަކުން ދަނީ ލިވަޕޫލްގެ ބްރެޒިލް މިޑްފީލްޑަރު ފަބީނިއޯއާއި ސްޕޭނުގެ މިޑްފީލްޑަރު ތިއާގޯ އަލްސަންޓްރާ ވެސް ގަތުމަށް މަސައްކަތް ކުރަމުންނެވެ.
އަނެއްކޮޅުން ޖެރާޑް ދަނީ އެސްޓަންވިލާއަށް ކުޅެމުން އަންނަ ލިވަޕޫލްގެ ކުރީގެ އެޓޭކިން މިޑްފީލްޑަރު ފިލިޕޭ ކުޓީނިއޯ ގަތުމަށްވެސް މަސައްކަތް ކުރަމުންނެވެ.
