ޕްރޮފެޝަނަލް އެކައުންޓެންޓުންގެ ގޮތުގައި ތަމްރީންވުމަށް، 210 މީހަކަށް ސްކޮލާރޝިޕް ލިބުނު ކަމުގެ ލިޔުން ހަވާލުކޮށްފިއެވެ.

ބުދަ ދުވަހު މޯލްޑިވްސް ނެޝަނަލް ޔުނިވަރސިޓީގައި ބޭއްވި ޚާއްސަ ރަސްމިއްޔާތެއްގައި ޕްރޮފެޝަނަލް އެކައުންޓެންޓުން ތަމްރީނު ކުރުމަށް 2023 ވަނަ އަހަރު ހުޅުވާލި ސްކޮލާރޝިޕަށް ހޮވުނު ފަރާތްތަކަށް ވަނީ ލިޔުން ހަވާލުކޮށްފައެވެ.

މި ސްކޮލާރޝިޕްތަކާއި ގުޅޭގޮތުން ހަޔަރ އެޑިޔުކޭޝަން މިނިސްޓަރު ޑރ. އިބްރާހީމް ހަސަން ވިދާޅުވީ މި ޕްރޮގްރާމްތައް ވަރަށް ކާމިޔާބު ކަމަށެވެ. އެކައުންޓިންގ ދާއިރާއަކީ ކުރިއަށްދާން ވަރަށް ރަނގަޅު ދާއިރާއެއް ކަމަށާއި، މިއީ ރާއްޖޭގައި މުސްތަގުބަލް އޮތްދާއިރާއެއްކަން މިނިސްޓަރު ފާހަގަކުރެއްވިއެވެ.

މިއީ ތަމްރީނުވެފައިވާ ފަރާތްތަކުން އަމިއްލަގޮތުން މަސައްކަތްކޮށްގެން ވެސް ރަނގަޅު އާމްދަނީއެއް ހޯދިދާނެ ދާއިރާއެކެވެ.

މިއަހަރުވެސް ސަރުކާރުގެ ޚަރަދުގައި 200 ޕްރޮފެޝަނަލް އެކައުންޓަންޓުން ތަމްރީނުކުރުމަށް ހުޅުވާލި ސްކޮލާރޝިޕަށް 322 ފަރާތަކުން ކުރިމަތިލާފައިވެއެވެ.

މި ސްކޮލާރޝިޕްގެ ދަށުން އޭސީސީއޭއިން ކިޔަވަން ހަމަޖެހިފައިވަނީ ސްކިލްސް އަދި ޕްރޮފެޝަނަލް ލެވެލަށެވެ. އަދި ސީމާ ޕްރޮގްރާމް ފުރިހަމަކޮށްގެން ކިޔަވަން ހަމަޖެހިފައިވަނީ މެނޭޖްމަންޓް އަދި ސްޓްރެޓީޖިކް ލެވެލަށެވެ.

މިޕްރޮގްރާމްގެ އަމާޒަކީ ރާއްޖެއަށް ބޭނުންވާ އެކައުންޓަންޓުންގެ ގޮތުގައި ދިވެހީން ވީހާވެސް އަވަހަށް ތަމްރީނުކޮށް ވަޒީފާގެ ބާޒާރަށް ނެރުމެވެ.