ކަންކަން ލަސްވުމާއި މިނިސްޓަރ ހައިދަރާއި ވަރަށް ބޮޑަށް ގުޅުން އޮންނަ ކަމަށް ފާހަގަވޭ - ޒިޔާދު
ސިޔާސީ މުވައްޒަފުންގެ އަދަދު ހައިދަރަށް ބުނެ އެއް ނުދެވުނު
ވައިކަރަދޫ ދާއިރާގެ މެންބަރު ހުސައިން ޒިޔާދު މަޖިލީހުގެ ޖަލްސާގައި ވާހަކަ ދައްކަވަނީ
ކަންކަން ލަސްވުމާއި، ހަޔަރ އެޑއިުކޭޝަން މިނިސްޓަރ އަލީ ހައިދަރު އާއި ވަރަށް ބޮޑަށް ގުޅުން އޮންނަ ކަމަށް ފާހަގަވާ ކަމަށް މަޖިލީހުގެ ވައިކަރަދޫ ދާއިރާގެ މެމްބަރު ހުސައިން ޒިޔާދު ވިދާޅުވެއްޖެއެވެ.
އޭނާ އެފަދައިން ވިދާޅުވީ ހަޔަރ އެޑއިުކޭޝަން މިނިސްޓަރ އަލީ ހައިދަރު އާއި ސުވާލުކުރުމަށް އަންގާރަ ދުވަހު އޭނާ މަޖިލީހަށް ހާޒިރުކުރުމުން، އިތުރު ސުވާލުކުރުމަށް މެމްބަރުންނަށް ލިބުނު ފުރުސަތުގައި ވާހަކަދައްކަވަމުންނެވެ. ޒިޔާދު ވަނީ ދަރިވަރުންނަށް ލިބިފައިވާ ލޯނުތަކާއި، އެހެނިހެން މައްސަލަތަކާއި މެދު ދަރިވަރުންނަށް ކުރާ މެއިލްތަކަށް ހަޔަރއެޑިއުކޭޝަން މިނިސްޓްރީން ލަހުން ޖަވާބުދޭ މައްސަލަ ދިމާވާ ކަމަށް ފާހަގަކުރައްވާފައެވެ. އަދި ދަރިވަރުންގެ ފޯނުކޯލުތަަކަށް ވެސް ޖަވާބު ދިނުމުގައި ލަސްވާ ކަމަށް ފާހަގަކުރައްވާ ޒިޔާދު ވަނީ މުވައްޒަފުންގެ ދަތިކަމާއި ދިމާވަނީތޯ ވެސް ސުވާލުކުރައްވާފައެވެ.
ބައެއް ފަަހަރު މިނިސްޓްރީގެ މަސައްކަތްތައް ނުކުރެވެނީ މުވައްޒަފުން މަދުވުމުން ކަމަށް ވަޒީރު ހައިދަރު ވަނީ ޒިޔާދުގެ ސުވާލުތަކަށް ޖަވާބުދެއްވަމުން ވިދާޅުވެފައެވެ. ވަކިން ޚާއްސަކޮށް ސިވިލް ސަރވިސް މުވައްޒަފުންގެ ދަތިކަމާއި ކުރިމަތިލާން ޖެހޭ ކަމަށާއި އެކަން ހައްލުކުރުމަށް މަސައްކަތް ކުރަމުންދާ ކަމަށް އޭނާ ވިދާޅުވިއެވެ.
ޒިޔާދު ވަނީ ހަޔަރ އެޑިއުކޭޝަން މިނިސްޓްރީގައި ތިބި ސިޔާސީ މުވައްޒަފުންގެ އަދަދު ސާފުކުރުމަށް ވެސް އެދިވަޑައިގަންނަވާފައެވެ. އެހެންނަމަވެސް އެ ސުވާލަށް ވަޒީރު އެއްވެސް ޖަވާބެއް ދެއްވާފައެއް ނުވެއެވެ.
ވަޒީރު ހައިދަރު އާއި ކަންކަންކަން ލަސްވުމާއި ގުޅުން އޮންނަ ކަމަށް ޒިޔާދު ވިދާޅުވެފައި ވާއިރު އެންމެ ފުރަތަމަ ހައިދަރު ހުންނެވީ މި ސަރުކާރުގެ ހައުސިން މިނިސްޓަރ ކަމުގައެވެ. ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުން ދޫކޮށްފައިވާ ފްލެޓާއި، ގޯތިތައް ނުލިބި ލަސްވެ، އެކަން ދިގުލައިގެން ދިޔަ އިރު ވަޒީރުކަމުގައި ހުންނެވީ ހައިދަރުއެވެ. އޭރު އެ މަރުހަލާ ދިގުލައިގެން ދިއުމުން އެންމެ ބޮޑަށް ހޫނުފެނަށް ވެއްޓި އާއްމުންގެ ނުރުހުން އަމާޒުވީ ވެސް ހައިދަރުއަށެވެ. ސަބަބަކީ ތަކުރާރުކޮށް އެތައް ތާރީހެއް ދީގެން ވެސް އެ މަސައްކަތް ނިމޭނެ ދުވަހެއް ހައިދަރު އަށް ސާފުކޮށް ނުދެވުމެވެ.
ފަހުން ހައިދަރު ހަޔަރ އެޑިއުކޭޝަން މިނިސްޓަރަކަށް ހައިދަރު ބަދަލުކޮށްފައި ވަނީ މި އަހަރު ތެރޭގައި ރައީސް ޑރ.މުހައްމަދު މުއިއްޒު ކެބިނެޓަށް ގެންނެވި ބަދަލުތަކަކާއި އެކުގައެވެ.
