ވިޒިޓް މޯލްޑިވްސް ޕްރޯ 2023: ޕޯޗުގަލްގެ ޖޮއާނާ ޝެންކާ މިއަހަރުވެސް ވާދަކުރާނެ

ވިޒިޓް މޯލްޑިވްސް ޕްރޯގެ މިއަހަރުގެ މުބާރާތުގައިވެސް ޕޯޗުގަލްގެ ބޮޑީބޯޑަރު، ޖޮއާނާ ޝެންކާ ވާދަކުރަން ނިންމައިފިއެވެ.

ޖޮއާނާއަކީ މިދިޔަ އަހަރުގެ މުބާރާތުގައިވެސް ވާދަކުރި އެތުލީޓެކެވެ. މިދިޔަ އަހަރުގެ މުބާރާތުން އޭނާ ކަޓާފައިވަނީ ކުއާޓަރ ފައިނަލުންނެވެ. އެ މުބާރާތުގެ ފައިނަލުގައި ވާދަކޮށްފައިވަނީ އިޒަބެލާ ސޫސާއާއި އެލެގްޒެންޑާ ރިންޑާއެވެ. ޗެމްޕިއަންކަން ހޯދީ އިޒަބެލާއެވެ.

އުމުރުން 35 އަހަރުގެ ޖޯއާނާއަކީ ބޮޑީބޯޑިންގައި ފާހަގަކޮށްލެވޭ ކާމިޔާބީތަކެއް ހޯދާފައިވާ އެތުލީޓެކެވެ. އޭނާއަކީ 2017 ވަނަ އަހަރުގެ ދުނިޔޭގެ ޗެމްޕިއަނެވެ. މީގެ އިތުރުން، އޭނާ ވަނީ 2014އިން 2017 ވަނަ އަހަރާ ދެމެދު، ޔޫރަޕުގެ ޗެމްޕިއަންކަން ވިދިވިގެން ހަތަރު ފަހަރު ހޯދާފައެވެ. އަދި އޭނާއަކީ ޕޯޗުގަލްގެ ޗެމްޕިއަންކަން ހަތް ފަހަރު ހޯދާފައިވާ އެތުލީޓެކެވެ.

މިވަގުތު ދުނިޔޭގެ ރޭންކިންގެ ތިންވަނާގައި ހިމެނިފައިވާ ޖޮއާނާ، ބޮޑީބޯޑިން ކެރިއަރު ފެށީ 2002 ވަނަ އަހަރުއެވެ. އޭރު އޭނާގެ އުމުރަކީ 15 އަހަރެވެ.

ވިޒިޓް މޯލްޑިވްސް ޕްރޯ އޮގަސްޓު މަހު ފެށުމަށް ހަމަޖެހިފައިވާއިރު، ދުނިޔޭގެ ރޭންކިންގައި ފާހަގަކޮށްލެވޭ ގިނަ އެތުލީޓުން މި މުބާރާތުގައި ވާދަކުރާނެއެވެ.