"ކަރަށް ބަޑިޖަހާފަ އޮތީ، މަރުވެ ދިޔައީ ލޭފައިބަ ފައިބާ އޮވެ"

ދިރިއުޅުން އުޖާލާ ކުރުމަށް ކިތަންމެ ފޮނި ހުވަފެންތަކެއް ދުށް ކަމުގައި ވީ ނަމަވެސް، ޔަހޫދީ އިޒްރޭލުގެ ރަޙުމެއް ނެތް ގޮށްމުށުގެ ޝިކާރައަކަށް ވެފައިވާ ފަލަސްޠީނުގެ ރައްޔިތުންނަށް އެ ހުވަފެންތައް ޙަޤީޤަތަކަށް ހެދޭ ގޮތް އޮންނަނީ ނުވެފައެވެ. ސިލްސިލާ ގޮތެއްގައި ދޭތެރެދޭތެރެއިން ވަރުގަދަ ކުރަމުންދާ ހަމަލާތަކާއެކު، ކޮޅަށް ޖަހާ ދިރިއުޅުން ހަފުސްކޮށްލައެވެ.

އަހަރު ދެބައިވެގެން މިދިޔައީވެސް ހަމަ އެފަދަ ގޮތަކަށެވެ. ހަނގުރާމަވެރިންނާ ދެކޮޅަށް ކަމަށް ބުނެ އިޒްރޭލުގެ އަސްކަރިއްޔާއިން ޖެނީންގައި ހިންގި 48 ގަޑިއިރުގެ ރެއިޑް ނިންމާލިއިރު ސުންނާފަތި ކޮށްލާފައި ވަނީ އާންމު ރައްޔިތުންގެ ހިޔާވަހިތަކެވެ. 75 އަހަރުވީ ރެފިއުޖީ ކޭމްޕަށް ދިން ގެއްލުންތައް ފޫބައްދާ، ދިރިއުޅެވޭނެ ވަރު ކުރުމުގެ އަޒުމުގައި ޖެނީންގެ ވަޒަންވެރިން ތެދުވީ ސާބިތުކަމާއެކީގައެވެ. ނަމަވެސް ރެއިޑްގެ ތެރެއިން އެ ފެނުނު މަންޒަރުތަކަކީ މިއިން ދުވަހަކުވެސް ހަނދާން ނައްތާލެވޭނެ ވަރުގެ މަންޒަރުތަކެއް ނޫނެވެ.

ސަމާ ސަބަޣްގެ އަވަށްޓެރިޔާއަކީ ހަމަލާގެ ފުރަތަމަ ދުވަހު އޭނާގެ ކަރަށް ހަމަލާ އަމާޒުވި މީހެކެވެ. ޖެނީން ރެފިއުޖީ ކޭމްޕަށް އިޒްރޭލުގެ އަސްކަރިއްޔާއިން ދިން ހަމަލާތަކުގައި ގައިން ލޭފައިބަމުން ދިޔަ އަވަށްޓެރިޔާއަށް އެންމެ ފަހު ވަޤުތާ ޖެހެންދެންވެސް ސަމާ ދިޔައީ ޚިދުމަތް ކުރަމުންނެވެ.

އެމްބިއުލާންސްއާއި ޕެރަމެޑިކްސްގެ ޚިދުމަތް ލިބެން ނެތް ރެފިއުޖީ ކޭމްޕު ތެރޭގައި ސަމާ، އޭނާގެ އެކުވެރިޔާ ގޮވައިގެން އިން އިރުވެސް ލޭތަށް ފައިބަމުން ދިޔައެވެ. މާ ގިނަ އިރުތަކެއް ނުވެ، އެ އަވަށްޓެރިޔާ މި ދުނިޔެ ދޫ ކުރިއެވެ. ސަމާ ދިރިއުޅޭ ސަރަޙައްދުން އެކަނިވެސް ޒުވާން 3 ފިރިހެނަކު  ވަނީ މަރާލާފައެވެ.

ޖެނީންގެ ރަށްވެހިން ކިޔައިދިން ގޮތުގައި އިޒްރޭލުގެ އަސްކަރިއްޔާއިން އެ ސަރަޙައްދަށް ވަދެގަނެ، ގެތަކުން މީހުން ނެރުނެވެ. އަދި ގެތަކުގެ ފުރާޅުތަކުގެ މަތީގައި ސްނައިޕަރުން ބޭތިއްބިއެވެ. ނުވިތާކަށް، އެ ސަރަޙައްދަށް އެމްބިއުލާންސްތަކަށް ނުވަދެވޭ ގޮތްވެސް ހެދިއެވެ.

ޝަރީފު އަބޫ ޖުލާޔީލް ބުނި ގޮތުގައި ފުރާވަރު ޢުމުރުގެ 3 ކުއްޖެއްގެ ގަޔަށް އިޒްރޭލުން ބަޑިޖެހިއެވެ. އެމީހުންނަށް ފަރުވާއެއްވެސް ނުދީ، މަރުވާން ދޫކޮށްލާފައި އޮތީއެވެ.

މި ފަހުން އިޒްރޭލުން ޖެނީންގައި ހިންގި ރެއިޑަކީ، މި ފަހުގެ ތާރީޚުގައިވެސް ހުޅަނގު އައްސޭރީގައި ހިންގި އެންމެ ވަރުގަދަ އެއް ރެއިޑްއެވެ. އެންމެ ވަރުގަދަ އަސްކަރީ އޮޕަރޭޝަންއެވެ. 2 ދުވަހުގެ ރެއިޑް ނިންމާލިއިރު ފަލަސްޠީނުން 12 މީހެއްގެ ފުރާނަ ވަނީ ގެއްލިފައެވެ. އިޒްރޭލު އަސްކަރިއްޔާއިން މަރުވީ އެންމެ މީހެކެވެ.

އިޒްރޭލުގެ ސިފައިން އެ ސަރަޙައްދު ދޫކޮށް ދިއުމާއެކު ޖެނީންގެ ރަށްވެހިން އަނބުރާ ގެތަކަށް ދާން މިޞްރާބު ޖެހިއެވެ. އަނދިރި މަގުތަކުންލާފައެވެ.

ބައި އަކަ ކިލޯމީޓަރަށް ވުރެ ކުޑަ ރެފިއުޖީ ކޭމްޕަކީ، 14000 އެއްހާ މީހުން ދިރިއުޅެމުން ދިޔަ ތަނެކެވެ. ކޭމްޕަށް އަމާޒުކޮށްގެން އިޒްރޭލުން ދިން ހަމަލާތަކަކީ އިޒްރޭލާއި ފަލަސްޠީނުގެ މައްސަލައަށް ސިޔާސީ ފެންވަރުގައި ހައްލެއް ލިބެން ނެތް ކަމުގެ ނިޝާނެކެވޭސް ބުނެވިދާނެއެވެ.