އަދީބު ބޭސްފަރުވާއަށް ފުރުމުގެ ހުއްދަ ދީފި
11 ޖުލައި 2023 | އަންގާރަ 07:36އަދީބި ގެންދަވަނީ ފުރާނައަށް ނުރައްކާ ބައްޔެއް ތަހައްމަލުކުރައްވަމުން
ކުރީގެ ނާއިބުރައީސް އަހުމަދު އަދީބު
ކުރީގެ ނާއިބުރައީސް އަހުމަދު އަދީބު ބޭސްފަރުވާއަށް ރާއްޖެއިން ބޭރަށް ފުރުމުގެ ހުއްދަ ކަރެކްޝަނަލް ސަރވިސްއިން ދީފިއެވެ.
އިތުބާރުހިފޭ ފަރާތަކުން ވަނީ މިކަން ރާއްޖެއެމްވީއަށް ކަށަވަރުކޮށްދީފައެވެ. އެހެންނަމަވެސް މިކަމާ ގުޅޭގޮތުން ކަރެކްޝަންސްއިން އަދި ވަކި އެއްޗެއް ބުނެފައެއް ނުވެއެވެ.
އެހެންނަމަވެސް އަދީބު ފަރުވާއަށް ފުރާވަޑައިގަންނަވާނެ ތާރީޚެއް އަދި މިހާތަނަށް އެނގިފައެއް ނުވެއެވެ.
ދާދި ފަހުން އަދީބުގެ ހާލުކޮޅު ސީރިއަސްވެ، އައިޖީއެމްއެޗްގައި ވަނީ ފަރުވާ ދެއްވާފައެވެ. އަދީބު ނިސްބަތްވެވަޑައިގަންނަވާ ޕާޓީ އެމްޓީޑީން މީގެ ކުރިން ބުނެފައިވަނީ އަދީބު ގެންދަވަނީ ފުރާނައަށް ނުރައްކާވާ ފަދަ ނާރުގެ ބައްޔެއް ތަހައްމަލުކުރައްވަމުން ކަމަށެވެ.
އެމްއެމްޕީއާރުސީގެ ޚިޔާނާތުގެ މައްސަލާގައި ކުށް ސާބިތުވެ، 20 އަހަރުގެ ޖަލު ހުކުމެއް ކޮށްފައިވާ އަދީބު ހުންނެވީ ގޭބަންދުގައެވެ. އަދީބު ގޭގައި ބަހައްޓާފައި ހުންނެވީ ފުއްޕާމެއާ ގުޅުންހުރި، ނޭވާލުމުގެ މައްސަލަތަކެއް ހުރެގެން ކަމަށް ކަމާބެހޭ ފަރާތްތަކުން ވަނީ މީގެ ކުރިން ވަނީ ބުނެފައެވެ.
