މިނިސްޓްރީ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރއާއި، ޔުނައިޓެޑް ނޭޝަންސް ޑިވެލޮޕްމެންޓް ޕްރޮގްރާމް (ޔޫއެންޑީޕީ) ގުޅިގެން، ޖަޕާން ސަރުކާރުގެ އެހީގައި "މޯލްޑިވްސް ގުޑް އެގްރިކަލްޗަރަލް ޕްރެކްޓިސަސް (އެމް.ގެޕް) އޮޑިޓަރސް ޓްރިއިނިންގ ޕްރޮގްރާމް"ގެ ނަމުގައި ހަތަރު ދުވަހުގެ ތަމްރީން ޕްރޮގުރާމެއް ފަށައިފިއެވެ.

މި މަހުގެ 10ން 13ށް ކުރިއަށް ގެންދާ މި ތަމްރީން ޕްރޮގްރާމްގައި ދަނޑުވެރިކަމުގެ ރަނގަޅު އާދަތައް ނުވަތަ މޯލްޑިވްސް ގުޑް އެގްރިކަލްޗަރަލް ޕްރެކްޓިސަސް ސްކީމް ތަންފީޒުކުރުމަށް ބޭނުންވާ އޮޑިޓަރުން ތަމްރީން ކުރެވިގެންދާނެއެވެ. އަދި އޮޑިޓަރުންގެ ގާބިލުކަން އިތުރުކުރުމަށްޓަކައި ބޭނުންވާ މުހިއްމު މައުލޫމާތު މިޕްރޮޤްރާމްގެ ތެރެއިން ބައިވަރިންނާ ޙިއްޞާ ކުރާނެއެވެ. މިގޮތުން ދަނޑުވެރިކަމުގެ ރަނގަޅު އާދަތަކަކީ ކޮބައިކަމާއި، ތިމާވެއްޓާ ރައްޓެހި، އިތުބާރު ހުރި ތަފާތު ގޮތްތައް ބޭނުންކޮށްގެން ޕެސްޓް ކޮންޓްރޯލް ކުރާނެ ގޮތްތަކާއި އަދި ދަނޑުވެރިކަމުގައި ބޭނުންކުރާ ބޭސް ރަނގަޅު ގޮތުގައި ބޭނުންކުރާނެ ގޮތްތަކާއި ދަނޑުތައް އެމް.ގެޕް ސްކީމަށް އޮޑިޓްކުރާނެ ގޮތާއި ދަނޑުވެރިކަމާއި ކާނާގެ ރައްކާތެރިކަމާ ގުޅުންހުރި މައުލޫމާތު މި ޕްރޮގްރާމުގެ ތެރޭގައި ދޭނެއެވެ.

މިތަމްރީނު ޕްރޮގްރާމުގައި ޖުމްލަ 16 ރަށެއްގެ ކައުންސިލާއި، ހެލްތު ސެންޓަރުގެ މުވައްޒަފުންގެ އިތުރުން އެގްރޯނެޝަނަލް ކޯޕެރޭޝަންއާއި، މޯލްޑިވްސް ފުޑް އެންޑް ޑްރަގް އޮތޯރިޓީއާއި މިނިސްޓްރީގެ އެގްރިކަލްޗަރ ޑިޕާޓްމެންޓް ހިމެނޭހެން ޖުމްލަ 63 މުވައްޒަފުން ބައިވެރިވެއެވެ.

މީގެ އިތުރުން އއ. ތޮއްޑޫގައި އެމް.ގެޕް ސްކީމްގެ މޮކް އޮޑިޓެއް މިމަހުގެ 12 ވަނަ ދުވަހު ކުރިއަށް ގެންދިއުމަށްވަނީ ހަމަޖެހިފައެވެ.