ވަންގަވްއަކީ ޑިޖިޓަލް ސަރުކާރެއްގެ ފެށުން، ރަސްމީ ގަޑި ނިމުމުން ދޮރު ބަންދުކޮށް، ޚިދުމަތްތައް މެދުކަނޑައެއް ނުލާނެ
10 ޖުލައި 2023 | ހޯމަ 07:04ކޮރަޕްޝަން މަދުވުމާއި، ކަރުދާސް ބޭނުން ކުރާ މިންވަރު މަދުވުން ފަދަ ފައިދާތައް ލިބޭ
ރައީސުލްޖުމްހޫރިއްޔާ އިބްރާހީމް މުޙައްމަދު ސާލިޙު
ވަންގަވްއަކީ ޑިޖިޓަލް ސަރުކާރެއްގެ ފެށުން ކަމަށާއި، ޑިޖިޓަލް ސަރުކާރެއްގައި ރަސްމީ ގަޑި ނިމުމުން ދޮރު ބަންދުކޮށް، ޚިދުމަތްތައް މެދުކަނޑައެއް ނުލާނެކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ސާލިޙު ވިދާޅުވެއްޖެއެވެ.
ސަރުކާރުގެ މުއައްސަސާތަކުގެ ޚިދުމަތްތައް އެއް ވިއުގައަކުން ފޯރުކޮށްދިނުމުގެ ގޮތުން އެކުލަވާލާފައިވާ "ވަންގަވް" ޕޯޓަލްގެ ޚިދުމަތް ލޯންޗު ކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސް ވިދާޅުވީ، މިއީ ރައްޔިތުންނާ ގާތުން، ލާމަރުކަޒުކޮށް ޚިދުމަތް ދިނުމުގައި އަނެއްކާވެސް ތާރީޚީ ދުވަހެއް ކަމަށެވެ.
ރައީސް ވިދާޅުވީ، ވަންގަވްއަކީ ޑިޖިޓަލް ސަރުކާރެއްގެ ފެށުން ކަމަށެވެ. މި ސަރުކާރުގެ އެންމެ ޚާއްސަ ސިފައަކީ ރައްޔިތުން ހޯދަން ބޭނުންވާ ޚިދުމަތްތައް ފަސޭހަކަމާއެކު ލިބިގަނެވުންކަމަށް ރައީސް ވިދާޅުވިއެވެ.
ރައީސް އިތުރަށް ވިދާޅުވީ، ސަރުކާރުގެ ޚިދުމަތްތައް ލިބިގަތުމުގައި ރައްޔިތުން އުފުލަމުން އައި ތަކުލީފުތައް މި ވިއުގައިގެ ސަބަބުން ކުޑަވެގެންދާނެ ކަމަށެވެ. މިސާލަކަށް އަތޮޅުތަކުން މާލެ އައުމާއި، އައިސް ގިނަ ވަގުތު ކިއޫގައި ތިބެން ޖެހުމާއި، އެކަށީގެންވާ މައުލޫމާތު ނުލިބުމާއި، އެތަކެއް ފޯމުތަކެއް ހުށަހަޅަން ޖެހުންފަދަ ތަކުލީފުތައް ރައީސްގެ ވާހަކަފުޅުގައި ފާހަގަ ކުރެއްވިއެވެ.
ރައީސް ވިދާޅުވީ، ކުރިއަށް އޮތް ތަނުގައި 1500 ވެގެންދާނީ ސަރުކާރުގެ މައި ހޮޓްލައިންއަށް ކަމަށެވެ.
ޑިޖިޓަލް ސަރުކާރަކީ ރަސްމީ ގަޑި ނިމުމުން ދޮރު ބަންދުކޮށް، ޚިދުމަތްތައް މެދުކަނޑާލާނެ ސަރުކާރެއް ނޫންކަން ފާހަގަކުރައްވައި ރައީސް އިތުރަށް ވިދާޅުވީ، ދުނިޔޭގެ ކޮންމެ ހިސާބެއްގައި ހުރެގެންވެސް، 24 ގަޑިއިރު ޚިދުމަތްތައް ލިބިގަނެވޭނެ ކަމަށެވެ.
އޭގެ އިތުރުން، ޑިޖިޓަލް ސަރުކާރު ހިނގައިގަންނައިރު، މާލެއާއި އައްޑޫ އަދި ފުވައްމުލަކު ސިޓީގައި މި ޕޯޓަލްގެ ސަޕޯޓު ސެންޓަރުތައް ޤާއިމު ކުރެވިފައިވާކަމަށްވެސް ރައީސް ވިދާޅުވިއެވެ.
ރައީސް ވިދާޅުވީ، ކުރިއަށް އޮތް ތަނުގައި އިތުރު ސަރަޙައްދުތަކުގައިވެސް ސަޕޯޓު ސެންޓަރުތައް ޤާއިމު ކުރައްވާނެ ކަމަށެވެ.
ރައީސް އިތުރަށް ވިދާޅުވީ، ޑިޖިޓަލް ސްޓެރެޓަޖީގެ ސަބަބުން ކޮރަޕްޝަން މަދުވުމާއި، ކަރުދާސް ބޭނުން ކުރާ މިންވަރު މަދުވުން ފަދަ ފައިދާތައް ލިބޭ ކަމަށެވެ.
އޭގެ އިތުރުން، ވަންގަވް ޕޯޓަލް ފަރުމާ ކުރެވިފައިވަނީ ރައްޔިތުންގެ ޒާތީ މައުލޫމާތުތައް ރައްކާ ކުރެވޭނެ ގޮތަށްކަމަށްވެސް ރައީސް ވިދާޅުވިއެވެ.
ރައީސް ވަނީ ދިވެހި ކޮންމެ ރައްޔިތަކުވެސް މި ޕޯޓަލް ބޭނުން ކުރުމަށް ހަދަންޖެހޭ "އީފާސް" އެކައުންޓު ހެދުމަށް އިލްތިމާސް ކުރައްވާފައެވެ.
