ވީ ވައުދުތަކުގެ 90 އިންސައްތަ ދަނީ ހިނގަމުން، ނިމެމުން: ރައީސް
10 ޖުލައި 2023 | ހޯމަ 04:36ރައްޔިތުން އެދޭ ކަންކަން ވަކި ރަށެއް ތަފާތުނުކޮށް ހިންގިއްޖެ
"އުފާވެރި އަމާން ރާއްޖެ" ކެމްޕެއިން ޖަލްސާގައި ރައީސް ވާހަކަފުޅުދައްކަވަނީ
2018 ވަނަ އަހަރު ސަރުކާރުން ވީ ވައުދުތަކުގެ 90 އިންސައްތަ މަސައްކަތް މިހާރު ދަނީ ހިނގަމުން ނިމެމުން ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.
ރައީސް މިފަދައިން ވިދާޅުވީ "އުފާވެރި އަމާން ރާއްޖެ" ކެމްޕެއިން ޖަލްސާގައި ވާހަކަފުޅުދައްކަވަމުންނެވެ.
ރައީސް ވިދާޅުވީ މިވީ 5 އަހަރުގެ ތެރޭގައި ރައްޔިތުން ބޭނުންވާ އަސާސީ ޚިދުމަތްތައް ވަކި ރަށެއް ތަފާތުކުރުމެއްނެތި ފޯރުކޮށްދެއްވާފައިވާކަމަށެވެ. ރައީސް ވަނީ ފެނާއި ނަރުދަމާ އަދި ބަނދަރުގެ މަސައްކަތްތައް ފާހަގަކުރައްވާފައެވެ.
މީގެ އިތުރުން ތައުލީމީ ދާއިރާއަށް އަލިއަޅުވާލައްވައި ރައީސް ވިދާޅުވީ ހިލޭ ޑިގްރީއާއި ސްކޮލަރޝިޕް އަދި ސްޓޫޑަންޓް ލޯނު ވެސް ހުރިހާ ދަރިވަރުންނަށް ހުޅުވާލައިގެން ކުރިއަށްގެންދަވާފައިވާ ކަމަށެވެ. އަދި މިނިމަމް ވޭޖު ކަނޑައެޅި، ސަރވިސް ޗާޖު ކަށަވަރުކޮށް، ތައުލީމީ ދާއިރާއާއި ސިއްހީ ދާއިރާގެ މުސާރަ ބޮޑުކުރެވި، ނުކުޅެދުންތެރިކަން ހުންނަ މީހުންނަށް ދޭ އެލަވަންސް ބޮޑުކޮށް، އިމާމުންނަށް ޑިގްރީ ފެންވަރަށް ކިޔަވައިދޭން ފެށި، އެތައް އިމާމުންނެއް ޑިގްރީ ހާސިލްކޮށްފައިވާކަން ރައީސް ފާހަގަކުރެއްވިއެވެ.
މީގެ އިތުރުން އައްޑޫ ސިޓީއަށް އަންނަ ބޮޑު ބަދަލާއި، ބޮޑު ތިލަދުންމައްޗަށް އައު ދިރުމެއް އަންނަން ފަށާފައިވާކަން ރައީސް ފާހަގަކުރެއްވިއެވެ. މީގެ އިތުރުން މާލޭގައި އޮތް ޒަމާންވީ ބޯހިޔާވަހިކަމާއި ގެދޮރުގެ ދަތިކަމަށް ރަނގަޅު ހެޔޮ ބަދަލެއް ގެނެވިފައިވާކަމަށް ރައީސް ވިދާޅުވިއެވެ.
ރައީސް ވިދާޅުވީ އެމަނިކުފާނު ވެވަޑައިގެންނެވި ވައުދުފުޅުތަކުގެ 90 އިންސައްތައަށްވުރެ ގިނަ މަސައްކަތް މިހާރު އެދަނީ ހިނގަމުން ނިމެމުން ކަމަށެވެ.
އަނެއްކާވެސް ރިޔާސީ ރޭހަށް އެމަނިކުފާނު ނުކުމެވަޑައިގަންނަވަނީ ރައްޔިތުންނަށް ކޮށްދެއްވަން ފެއްޓެވި މަސައްކަތްޕުޅުތަކާއެކު އިތުރަށް ކުރިއަށް ވަޑައިގެންނެވުމުގެ އަޒުމުގައިކަން ފާހަގަކުރައްވައި ރައީސް ވިދާޅުވީ މި އިންދެވީ އޮށެއް ކަމަށެވެ. އަދި އެ އޮށުން ގަސް ފަޅައި، އެ ގަސްތަކުގެ ހިޔާ ލިބި، އެ ގަސްތަކުން މޭވާ ލިބެން އަދި ދުވަސްކޮޅެއް ނަގާނެ ކަމަށް ރައީސް ވިދާޅުވިއެވެ.
