ށ.ފޯކައިދޫގެ ހެލްތް ސެންޓަރ ހުޅުވައިދެއްވައިފިއެވެ.

މި ހެލްތް ސެންޓަރ ހުޅުވާދެއްވާފައި ވަނީ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު މިހާރު ށ.އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިން, އެކަމަށްޓަކާ އާދިއްތަ ދުވަހު ބޭއްވި ރަސްމިއްޔާތެއްގައި ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހުއެވެ.

ހެލްތް ސެންޓަރ ހުޅުވާ ދެއްވުމަށްފަހު ރައީސުލްޖުމްހޫރިއްޔާ ވަނީ އެ ހެލްތް ސެންޓަރގައި ސިއްޙީ ފަރުވާ ދިނުމަށް ހަމަޖައްސާފައިވާ އިންތިޒާމްތައް ބައްލަވާލައްވާފައެވެ.

ށ.ފޯކައިދޫ ހެލްތް ސެންޓަރގެ އެކްސްޓެންޝަން ޢިމާރާތުގެ ނުނިމި ހުރި މަސައްކަތް ކުރުމަށް ހެލްތު މިނިސްޓްރީން ބަޔަކާ ހަވާލުކޮށްފައި ވަނީ ނިމިދިޔަ އަހަރުގެ ނޮވެމްބަރު މަހުގެ މެދެއްހާ ހިސާބުގައެވެ.

ހެލްތު މިނިސްޓްރީން ހާމަކޮށްފައިވާ ގޮތުގައި އެ ހެލްތް ސެންޓަރގެ މަސައްކަތް ކުރުމަށް ހަވާލުކުރީ ޕާރފެކްޓް މަލަފެހި މޯލްޑިވްސް ޕްރައިވެޓް ލިމިޓެޑާއެވެ. އެ މަސައްކަތް ހަވާލުކުރީ 145 ދުވަހުގެ ތެރޭގައި ނިންމާގޮތަށެވެ.

މި މަޝްރޫ ޢަކީ ޖުމްލަ 4,239,267.91ރ (ހަތަރު މިލިއަން ދެލައްކަ ތިރީސްނުވަ ހާސް ދުއިސައްތަ ފަސްދޮޅަސް ހަތްރުފިޔާ ނުވަދިހަ އެއްލާރި)ގެ އަގު ހުރި މަޝްރޫޢުއެކެވެ.

ސަރުކާރުން އަންނަނީ އަތޮޅުތަކުގައި ހުރި ހެލްތް ސެންޓަރ ތަކުގެ ފެންވަރު ރަނގަޅުކޮށް ޚިދުމަތްތައް ފުޅާކުރުމަށް ގިނަ މަސައްކަތްތަކެއް ކުރަމުންކަމަށް ސިއްހަތާއި ބެހޭ ވުޒާރާއިން ބުނެއެވެ.

އެގޮތުން ގިނަ ރަށްރަށުގެ ހެލްތް ސެންޓަރ ތަކުގެ ޖާގަ އިތުރުކުރުމަށް އެކްސްޓެންޝަން އިމާރާތް ހެދުމާއި، އާބާދީ ބޮޑެތި ރަށްރަށުގެ ހެލްތް ސެންޓަރތައް ހޮސްޕިޓަލު ފެންވަރަށް ތަރައްގީކުރުމުގެ މަސައްކަތްތައް މިހާރުވެސް ކުރަމުންދާ ކަމަށް ސަރުކާރުން ބުނެއެވެ.