"މިއީ އަހަރެމެންނަށް ފަރިތަ ރާޅެއް، އިތުބާރު އެބައޮތް" - އިބޫ

ރާއްޖޭގައި ހޮނިހިރު ދުވަހު ފެށި އޭޝިއަން ސާފިންގ ޗެމްޕިއަންޝިޕުން މެޑަލް ހޯދޭނެކަމުގެ އިތުބާރު އެބައޮތްކަމަށް ރާއްޖޭގެ ޓީމްގެ ކެޕްޓަން ހުސެއިން އަރީފް (އިބޫ) ބުނެފިއެވެ.

މުބާރާތް ފެށުމުގެ ރަސްމިއްޔާތަށްފަހު ތުލުސްދޫގައި ހުރެ ރާއްޖެ ޓީވީއާ ވާހަކަ ދައްކަމުން އިބޫ ފުރަތަމަވެސް ފާހަގަކުރީ މިވަރުގެ ބޮޑު މުބާރާތެއް ރާއްޖޭގައި ބޭއްވުމަކީ ބޮޑު އުފަލެއް ކަމެވެ. ދެން އޭނާ ހަނދާނަށް ގެނައީ އޭޝިއަން ސާފިންގ ޗެމްޕިއަންޝިޕްގެ ފުރަތަމަ މުބާރާތެވެ. 2019 ވަނަ އަހަރު ޗައިނާގައި ބޭއްވި އެ މުބާރާތުން ރާއްޖެ ލޯޑަލް ހޯދިއެވެ. އެޓީމްގެ ކެޕްޓަނަކީވެސް އިބޫއެވެ. މިފަހަރުވެސް ކެޕްޓަނަކީ ރާއްޖޭގެ އެންމެ ތަޖުރިބާ ބޮޑު އަދި ކާމިޔާބު އިބޫއެވެ.

އިބޫ ބުނީ ރާއްޖޭގައި މުބާރާތް ބޭއްވުމަކީ ދިވެހި އެތުލީޓުންނަށް ލިބޭ ވަރަށްބޮޑު އެޑްވާންޓޭޖެއް ކަމަށެވެ. އޭނާ ބުނީ ދިވެހި ޓީމްގެ ކޮންމެ އެތުލީޓަކީވެސް ރާޅަށް ފަރިތަ ބަޔަކަށް ވުމުން ބޮޑު ކާމިޔާބީއެއް ލިބޭނެކަމަށް އުއްމީދުކުރާކަމަށެވެ. އަދި ދިވެހި ޓީމާ ދޭތެރޭވެސް އިތުބާރު އެބައޮތްކަމަށް އިބޫ ބުންޏެވެ.

މި ޖުލައި މަހުގެ 8-17 އަށް މުބާރާތް ކުރިއަށްގެންދަނީ ތުލުސްދޫގައެވެ.