އެކައުންޓިން ދާއިރާއަށް ޚާއްސަ ފޯރަމެއް ބާއްވަނީ

ދިވެހިރާއްޖޭގައި އެކައުންޓިންގ އަދި ފައިނޭންސް ދާއިރާގައި މަސައްކަތް ކުރާ ފަންނުވެރިންނަށް ހާއްސަކޮށްގެން ފޯރަމެއް ބާއްވަން އިންސްޓްޓިއުޓް އޮފް ޗާޓަރޑް އެކައުންޓެންޓްސް އޮފް ދަ މޯލްޑިވްސް (ސީއޭ މޯލްޑިވްސް)ން ނިންމައިފިއެވެ.

"ސަފާ، އައިއެފްއާރްއެސް އެންޑް އައިއެސްއޭސް" ގެ ނަމުގައި ކުރިއަށްގެންދާ މި ފޯރަމަކީ 2022 ވަނަ އަހަރުން ފެށިގެން ރާއްޖޭގައި އެކައުންޓިންގ އަދި ފައިނޭންސް ދާއިރާގައި މަސައްކަތް ކުރާ ފަންނުވެރިންނަށް ހާއްސަކޮށްގެން އެކައުންޓިންގ އަދި އޮޑިޓްގެ އައު ސްޓޭންޑަޑްތަކާއި އެންމެ ފަހުގެ އަޕްޑޭޓްތަކުގެ އިތުރުން މި ސްޓޭންޑަޑްތަކާއި ގުޅުންހުރި ޓެކްނިކަލް މައުލޫމާތު ފޯރުކޮށްދިނުމުގެ މަގުސަދުގައި ބާއްވާ ފޯރަމެއް ކަމަށް ސީއޭ މޯލްޑިވްސް އިން ބުނެފައިވެއެވެ.

މި ފޯމް ބޭއްވުމަށް ހަމަޖެހިފައިވަނީ އޮގަސްޓު 19 އަދި 20 ގައެވެ.

މި ފޯރަމްގައި ސައުތު އޭޝިއަން ފެޑެރޭޝަން އޮފް އެކައުންޓަންޓްސްގެ މެންބަރުންގެ އިތުރުން ރާއްޖޭގެ އެކައުންޓިންގ ދާއިރާގެ ބައެއް އެކްސްޕާރޓުންގެ ޓެކްނިކަލް ސެޝަންތަކެއް ކުރިއަށް ގެންދިއުމަށް ވަނީ ހަމަޖެހިފައެވެ. މި ސެޝަންތަކުގައި މައިގަނޑު ގޮތެއްގައި އަލިއަޅުވާލާނީ އެކައުންޓިންގ ސްޓޭންޑަޑްސްގެ އެންމެ ފަހުގެ އަޕްޑޭޓްތަކާއ،ި އަލަށް ނެރުނު ސްޓޭންޑަޑްތަކުގެ އިތުރުން ސްޓޭންޑަޑްތަކުގެ ޕްރެކްޓިކަލް އެޕްލިކޭޝަންއަށް ކަމަށް ސީއޭ މޯލްޑިވްސްއިން ބުނެފައިވެއެވެ.

ސީއޭ މޯލްޑިވްސްއިން ބުނީ މި ފޯރަމް ޚާއްސަކޮށްފައިވަނީ އެ އިންސްޓިޓިއުޓުގެ މެންބަރުންނަށާއި، އެކައުންޓިންގ އަދި ފައިނޭންސް ޕްރޮފެޝަންގައި މަސައްކަތްކުރާ ފަރާތްތަކުގެ އިތުރުން މިދާއިރައިގައި ތައުލީމު ހާސިލުކުރަމުންގެންދާ ދަރިވަރުންނަށް ކަމަށެވެ. ސީއޭ މޯލްޑިވްސްއިން ބުނީ 20 ޖުލައި 2023 ގެ ކުރިން ރަޖިސްޓަރ ކުރާ ފަރާތްތަކަށް 10 އިންސައްތައިގެ ޑިސްކައުންޓެއް ދިނުމަށް ހަމަޖެހިފައިވާކަމަށެވެ.