އަފްޣާނިސްތާނުގައި ހިންގާ ހުރިހާ ސެލޫނެއް ބަންދުކުރަން ތާލިބާން ސަރުކާރުން މުހުލަތެއް ދީފި!

ޓެރަރިޒަމާ ދެކޮޅަށްކަމަށް ބުނެ، އެމެރިކާ އިސްވެ އޮވެ، ދުނިޔޭގެ އެންމެ ވަރުގަދަ އަސްކަރީ ބާރުތަކުން އަފްޣާނިސްތާނުގައި ކުރި ދިގު ހަނގުރާމަ ނިންމާލުމަށްފަހު ބިދޭސީ ސިފައިން އަފްޣާނިސްތާނުން ފައިބައިގެން ދިޔައެއްކަމަކު ހަމަޖެހުމުގެ ނޭވާއެއް ލުމުގެ ފުރުސަތު، އެ ގައުމުގެ އާންމުންނަކަށް އަދި ނުލިބެއޭވެސް ދެންނެވިދާނެއެވެ. ވަކިން ޚާއްސަކޮށް، އަންހެނުންގެ ހައްގުތަކާއި މިނިވަންކަމަށް ހުރަސްއެޅޭ ގޮތަށް "އިސްލާހު"ގެ ނަމުގައި ގެންނަ ބަދަލުތަކުގެ ސަބަބުން، އަންހެނުންނަށް އުފުލަން ޖެހިފައި އޮތް ތަކުލީފުތައް ގިނަ ކަމުގައިވެސް ދެންނެވިދާނެއެވެ.

ޖުލައި 4 ވީ އަންގާރަ ދުވަހަކީވެސް، އަފްޣާނިސްތާނުގައި ވެރިކަން ހިންގަމުންދާ ތާލިބާން ސަރުކާރުން އެފަދަ އަމުރެއް ނެރުނު ދުވަހެކެވެ. އަފްޣާނިސްތާނުގެ އަޚުލާގާބެހޭ ވުޒާރާގެ ނަމުގައި ތާލިބާނުން ހިންގަމުންދާ އިދާރާއިން ނެރުނު އަމުރުގައި، އަފްޣާނިސްތާނުގައި ޒީނަތްތެރިވުމުގެ ޚިދުމަތްދޭ ހުރިހާ ސެލޫނެއް ބަންދުކުރުމަށް ވަނީ އަންގާފައެވެ. މިއީ އާންމު ތަންތަނަށް އަންހެނުން ދިއުމަށް ތާލިބާނުން އަޅަމުންދާ ސިލްސިލާ ހުރަސްތަކުގެ ޗޭނަށް އެންމެ ފަހުން އިތުރުކުރި ބޮޅެވެ.

އަޚުލާގާބެހޭ ވުޒާރާގެ ތަރުޖަމާނެއް ކަމަށްވާ މުހައްމަދު ސާދިގު އާކިފު ފާހަގަކުރިގޮތުގައި، ބިއުޓީ ޕާލަރތަކާއި ސެލޫންތަކުގެ މަސައްކަތް، ބަރާބަރު 1 މަސް ދުވަހުގެ ތެރޭގައި ހުއްޓާލަން ޖެހެއެވެ.

އަފްޣާނިސްތާނުގައި ވެރިރަށް ކާބުލްއާއި އެހެންވެސް ބައެއް ސިޓީތަކުގައި ސެލޫންތައް ހުޅުވަން ފެށީ، މީގެ ކުރިން އެ ގައުމުގައި އޮތް ތާލިބާން ވެރިކަން، 2001 ވަނަ އަހަރުގެ ފަހުކޮޅު ވައްޓާލިތާ ދުވަސްކޮޅެއް ފަހުންނެވެ. 2021 ވަނަ އަހަރުގެ އޯގަސްޓް މަހު، ތާލިބާނުން އަނެއްކާވެސް އަފްޣާނިސްތާނުގެ ކޮންޓްރޯލް ނެގިކަމުގައި ވީނަމަވެސް، ގިނަ ސެލޫންތަކަކުން ދިޔައީ ޚިދުމަތް ދެމުންނެވެ. ނަތީޖާއަކަށް ވީ އަންހެނުންނަށް ވަޒީފާގެ ފުރުސަތު ލިބުމާއި، އަންހެން ކަސްޓަމަރުންނަށް ޚިދުމަތްތައް ލިބެމުން ދިއުމެވެ.

އަފްޣާނިސްތާނުގައި ގިނަ ސެލޫންތައް ހިންގަނީ ހަމަ އެކަނި އަންހެން ކަސްޓަމަރުންނަށް އަމާޒުކޮށްގެން ކަމަށް ވާއިރު، ސެލޫން ހިންގާ އިމާރާތުގެ ކުޑަދޮރުތައްވެސް ހުންނަނީ، ބޭރުން ދާ މީހަކަށް އެތެރެ ނުފެންނާނެ ގޮތަށް ނިވާކޮށްފައެވެ. ކަން މިހެން އޮތްނަމަވެސް، ސެލޫންތައް ބަންދުކުރުމަށް ތާލިބާނުން ނެރުނު އަމުރާމެދު އާންމުންގެ ޚިޔާލުގައި ފަރަގުތަކެއް އެބަހުއްޓެވެ.

އަފްޣާނިސްތާނުގައި ތާލިބާނުންގެ ވެރިކަން އަލުން ފަށައި، އަންހެނުންގެ މިނިވަންކަމާއި ހައްގުތަކަށް އުނިކަން ލިބޭގޮތަށް އަޅަމުންދާ ފިޔަވަޅުތަކަށް، ބައިނަލްއަގުވާމީ ފެންވަރުގައި ވަނީ ފާޑުކިޔުންތައް އަމާޒުވެފައެވެ. އެކި ގައުމުތަކުގެ ސަރުކާރުތަކުގެ އިތުރުން، އދ.ގެ އޮފިޝަލުންވެސް ވަނީ ތާލިބާން ސަރުކާރުގެ އެފަދަ ސިޔާސަތުތައް ކުށްވެރިކޮށްފައެވެ.

2022 ވަނަ އަހަރު ތާލިބާނުން ވަނީ، އަންހެން ކުދިންނަށް އަމާޒުކޮށްގެން ހިންގާ ގިނަ އަދަދެއްގެ ހައި ސްކޫލްތައް ބަންދުކޮށްފައެވެ. އަފްޣާނިސްތާނުގެ ޔުނިވަރސިޓީތަކުގެ ދޮރޯށިތައް، އަންހެން ދަރިވަރުންނަށް ބަންދުކުރިއެވެ. ވަޒީފާގެ މައިދާނުގައި އަންހެނުންނަށް ހުރި ފުރުސަތުތައްވެސް ބަންދުކުރިއެވެ. އާންމު ޖިމްތަކާއި ޕާކުފަދަ ތަންތަނަށްވެސް އަންހެނުންނަށް ނުވަދޭނެހެން ބަންދުކުރިއެވެ.

އިސްލާމީ އުސޫލުތައް ނެގެހެއްޓުމުގެ ނަމުގައި ތާލިބާނުން ތަންފީޒުކުރަމުން ގެންދާ އެފަދަ ސިޔާސަތުތަކަކީ، ސަރުކާރެއްގެ ގޮތުގައި ތާލިބާނުންގެ ވެރިކަން ބަލައިގަތުމަށް ބައިނަލްއަގުވާމީ މުޖުތަމައު ފަސްޖެހޭ ކަމެއް ކަމަށް، ހުޅަނގުގެ ގައުމުތަކާއި ބައިނަލްއަގުވާމީ ޖަމިއްޔާތަކުން ވަނީ ބުނެފައެވެ.