ސުޕްރީމް ކޯޓާއި އެއްގޮތަށް ދަށު ކޯޓުތަކުން ވެސް އޮންލައިންކޮށް ޝަރީއަތްތައް ކުރިއަށް ގެންދިއުމަކީ ކުރާ އުންމީދެއް: ފަނޑިޔާރު މަހާޒު
7 ޖުލައި 2023 | ހުކުރު 10:16އޮންލައިންކޮށް ޝަރީއަތްތައް ކުރިއަށް ގެންދިއުމުގައި ގިނަ ފަސޭހަތައް ލިބޭ
ފަނޑިޔާރު މަހާޒު އަލީ ޒާހިރު
ދިވެހިރާއްޖޭގެ ސުޕްރީމް ކޯޓުން އޮންލައިންކޮށް ޝަރީއަތްތައް ކުރިއަށް ގެންދާ ގޮތަށް، ދަށު ކޯޓުތަކުން ވެސް ޝަރީއަތްތައް ކުރިއަށް ގެންދިއުމަކީ ކުރާ އުންމީދެއް ކަމަށް ފަނޑިޔާރު މަހާޒު އަލީ ޒާހިރު ވިދާޅުވެއްޖެއެވެ.
ފަނޑިޔާރު މަހާޒު މިހެން ވިދާޅުވީ ދުރުން ޝަރީއަތްތައް ކުރިއަށް ގެންދިއުމުގައި ކާމިޔާބު ތިން އަހަރަށް ދެއްވި ޚާއްސަ އިންޓަވިޔުގައެވެ. ފަނޑިޔާރު މަހާޒު ވިދާޅުވީ އޮންލައިންކޮށް ޝަރީއަތްތައް ކުރިއަށް ގެންދަން ފެށުނީ 2020 ވަނަ އަހަރުގެ ތެރޭގައި ކަމަށެވެ. ފުރަތަމަ މިގޮތަށް ޝަރީއަތްތައް ކުރިއަށް ގެންދިއުމަށް ބައެއް ގޮންޖެހުންތައް ކުރިމަތިވިކަން ވެސް ފަނޑިޔާރު މަހާޒު ފާހަގަކުރެއްވިއެވެ. ނަމަވެސް އޮންލައިންކޮށް ޝަރީއަތްތައް ކުރިއަށް ގެންދިއުމުގެ ކުރިން ވެސް ފަނޑިޔާރުންގެ ބައެއްގެ މަސައްކަތްތައް އޮންލައިންކޮށް ކުރިއަށް ގެންދާ ކަމަށް ފަނޑިޔާރު މަހާޒު ވިދާޅުވިއެވެ.
ފަނޑިޔާރު މަހާޒު ވިދާޅުވީ ލޮކްޑައުންއާއެކު ޝަރީއަތްތައް އޮންލައިންކޮށް ކުރިއަށް ގެންދިއުމަށް ފަނޑިޔާރުންގެ މެދުގައި މަޝްވަރާ ކުރެވުނު ކަމަށާއި، އުސޫލުތައް އެކުލަވާލި ކަމަށެވެ. އޮންލައިންކޮށް ޝަރީއަތްތައް ކުރިއަށް ގެންދިއުމުގައި ގިނަ ފަސޭހަތައްވިކަން ފާހަގަކުރައްވައި ފަނޑިޔާރު މަހާޒު ވިދާޅުވީ ޝަރީއަތްތައް ކުރިއަށްދާއިރު، ލިޔެކިއުންތަކަށް އެކްސެސްވުމަކީ ވަރަށް ފަސޭހަކަމެއް ކަމަށާއި، ވަގުތު ވަރަށް ބޮޑަށް ސަލާމަތްވާ ކަމަށެވެ.
މީގެ އިތުރުން ފަނޑިޔާރު މަހާޒު ވިދާޅުވީ އޮންލައިންކޮށް ޝަރީއަތްތައް ކުރިއަށް ގެންދިއުމުގައި ސުޕްރީމް ކޯޓަށް ކުރާ އިތުބާރު ހައިކޯޓު އަދި ދަށު ކޯޓުތަކަށް ލިބިގެން ދިއުމަކީ ކުރާ އުންމީދެއް ކަމަށެވެ. އަދި ކުރިއަށް އޮތްތަނުގައި ޝަރީއަތްތައް ކުރިއަށް ގެންދިއުމުގައި ސްޕީޑް އަވަސްކުރަން ޖެހޭ ކަމަށް ވެސް ފަނޑިޔާރު މަހާޒު ވިދާޅުވިއެވެ.
ދިވެހިރާއްޖޭގެ ސުޕްރިމް ކޯޓުން އޮންލައިންކޮށް ކުރިއަށް ގެންދާ ޝަރީއަތްތައް މިހާރު ވަގުތުން ޔޫޓިއުބް އަދި ޓްވިޓަރ މެދުވެރިކޮށް ހުރިހާ ބޭފުޅުންނަށް ފެންނާނެ އިންތިޒާމް ވަނީ ހަމަޖައްސާފައެވެ.
