"ދިވެހި ރާޅުތަކަށް ޚާއްސަ" ސަރފް ބޯޑެއް ލުބްނާނުން؟

ލުބްނާނުގެ އުތުރުގެ ސިޓީއެއް ކަމަށްވާ ހާލާތުގައި ހުޅުވާފައި ހުރި ކުޑަކުޑަ ވޯކްޝޮޕެކެވެ. އެ ވޯކްޝޮޕް ތެރޭގައި، ބުރަ މަސައްކަތެއްގައި މީހަކު އަވަދި  ނެތި އުޅެމުން ދިޔައެވެ. އެއީ ސަރފް ބޯޑާއި ޕެޑަލް ބޯޑު ހެދުމުގެ މަސައްކަތުގައި އަރާހުރި ޕޯލް އައްބާސްއެވެ. އައްބާސް އުޅެމުން ދިޔައީ ސަރފްކުރުމާއި ޕެޑަލް ބޯޑު ދުއްވުމުގެ ކުޅިވަރަށް ބޭނުންވާ އެކި ކަހަލަ އާލާތްތައް ތައްޔާރުކުރުމުގެ މަސައްކަތުގައެވެ.

މިހާރު އުމުރުން 43 އަހަރު ފުރިފައިވާ އައްބާސް، ސަރފް ބޯޑު ހެދުމުގެ މަސައްކަތް ފެށީ 2011 ވަނަ އަހަރުގެ ކުރީކޮޅުގައެވެ. އެއީ އޭނާ އަމިއްލައަށް، ސަރފްކުރަން ނުވަތަ ރާޅާއަޅަން ދަސްކުރުމުގެ ތެރެއިންނެވެ. އެހެން އުޅުމުގެ ތެރޭގައި، ސަރފް ބޯޑް އުފެއްދުމުގެ މިސްރާބަށް އައްބާސްގެ ހިތް ލެނބި، ވިޔަފާރިއެއްގެ ގޮތުގައި އެ މަސައްކަތް ފެށީއެވެ.

އޭނާއަކީ މިއަދު ލުބްނާނުގައި ސަރފް ބޯޑާއި ޕެޑަލް ބޯޑު ހަދާ ހަމައެކަނި މީހާކަމަށް އައްބާސް ބުނަނީ ސާބިތުކަމާ އެކުގައެވެ. "ބަހާރާ" ބްރޭންޑް ނަމުގެ ދަށުން، އައްބާސްގެ ސަރފް ބޯޑާއި ޕެޑަލް ބޯޑުތައް ވިއްކާތާ މިހާރު 10 އަހަރަށްވުރެ ގިނަ ދުވަސް ވެއްޖެއެވެ. "ބަހާރާ"އަކީ އަރަބި ބަހުން، ކަނޑުދަތުރުކުރާ މީހުންނަށް ކިޔާ އުޅޭ ނަމެކެވެ.

މަސައްކަތުގައި ހޭދަވެދިޔަ އަހަރުތަކުގައި، އައްބާސްވަނީ ލުބްނާނުގައި ރާޅާއެޅުމުގެ ރޫހު ވަރުގަދަވަމުން ދިޔަ ގޮތް ލޮލުން ދެކި، އަތުން ހިފާފައެވެ. މިހާރުވެސް އޭނާ މަސައްކަތްކުރަމުން އެ ދަނީ ރާޅާއެޅުމުގެ ބައިނަލްއަގުވާމީ މުބާރާތެއްގައި ވާދަކުރާ ލުބްނާން މީހެއްގެ ސަރފް ބޯޑު ތައްޔާރު ކުރުމަށެވެ. ކަސްޓަމަރުގެ މިސްރާބު ހުރީ ދިވެހިރާއްޖެއާ ދިމާއަށެވެ.

ވިޔަފާރީގެ ނަޒަރުން ބަލާއިރު މި ވަގުތަށް މާ ބޮޑު ހާސް ކަމެއް ނެތްނަމަވެސް، ކުރިއަށް އޮތް ތަނުގައި ކަން ވެދާނެ ގޮތަކާމެދު އައްބާސްގެ ހިތުގައި ވަނީ ނުތަނަވަސްކަން އުފެދިފައެވެ. ވެއްޓިފައިވާ ކާރިސީ އަނދަވަޅުން މިއިން ދުވަހަކުވެސް ލުބްނާނަށް އަރައިގަނެވިދާނެކަމާމެދު އުފެދިފައިވާ ސުވާލުތަކުގެ ސަބަބުންނެވެ.

ދިރިއުޅުން ނުތަނަވަސްވަމުން ދާކަމުގެ ޝަކުވާ ކުރަން ހުރުމުގެ ބަދަލުގައި، އައްބާސް މިހާރު ދަނީ ލުބްނާން ދޫކޮށް، އެހެން ގައުމަކަށް ހިޖުރަކުރުމާމެދު ވިސްނަމުންނެވެ. އޭނާގެ އަމާޒު ހުރީ، ސިނާއީ ފެންވަރުގައި ރާޅާއެޅުމުގެ ކަންކަން ކުރިއަށްގެންދާ އޮސްޓްރޭލިއާއަށް ބަދަލުވުމާ ދިމާއަށެވެ.

އެތައް އަހަރަކަށް ދިގުލައި ގޮސްފައިވާ ސިޔާސީ ކޯޅުންގަނޑާއި، އިގްތިސާދީ ކާރިސާގެ އިތުރުން މޫލައި ވަރުގަދަވެފައިވާ ކޮރަޕްޝަންގެ ސަބަބުން، ލުބްނާނަކީ މިއަދު ހައްސާސް ފައްތަރެއްގައި އޮތް ގައުމަކަށް ވަނީ ވެފައެވެ. ގައުމުގެ އާބާދީގެ 80 އިންސައްތަ މީހުން ދިރިއުޅެމުން ދަނީ އިންތިހާ ފަގީރުކަމުގެ ތެރޭގައެވެ. މެދުއިރުމަތީގައި އުފެދިފައިވާ އެކިއެކި ހަމަނުޖެހުންތަކާއި ވަރުގަދަ ހަނގުރާމަތަކުން ސަލާމަތްވުމުގެ ނިޔަތުގައި އުފަން ވަޒަން ދޫކޮށް، އެތައް މިލިއަން ބަޔަކު ވަނީ ލުބްނާން ދޫކޮށް ހިޖުރަވެސް ކޮށްފައެވެ. އަމިއްލަ ރައްޔިތުންނަށްވެސް ލުބްނާނުގައި މިއަދު ހަމަޖެހުމެއް ލިބެން ނެތްއިރު، ރެފިއުޖީންވެސް ދިރިއުޅެމުންދަނީ އަސާސީ އަދި ޒަރޫރީ ޚިދުމަތްތަކުން މަހުރޫމުވެފައިވާ ހާލުގައެވެ.

ކޮންމެ ގޮތަކަށް ކަން އޮތް ކަމުގައި ވީނަމަވެސް، ލުބްނާނުގެ ރައްޔިތުން ދަނީ ގަދަ ހިތްވަރާއި ސާބިތުކަން ދައްކަމުންކަމީ ގަބޫލުކުރަންޖެހޭ ހަގީގަތެކެވެ. ދިރިއުޅުން ހެޔޮ ފާލަކަށް އެޅުވުމަށް އެހެން ބައެއްގެ މައްޗަށް ބަރޯސާވުމުގެ ބަދަލުގައި، ކޮންމެ މީހަކުވެސް ދަނީ އެމީހެއްގެ އަމިއްލަ ފައިމައްޗަށް ތެދުވެ، ދިރިއުޅުން ކޮޅަށްޖެހޭތޯ، އެމީހަކަށް ވީ އެންމެ ރަނގަޅަކަށް މަސައްކަތް ކުރަމުންނެވެ. އައްބާސްއަކީވެސް ހަމަ އެފަދަ މިސާލެކެވެ.