ފެން ބިލުގެ ޖޫރިމަނާ މައާފުކޮށްދޭ އިތުރު ޕްރޮގްރާމެއް އެމްޑަބްލިއުއެސްސީން ފަށައިފިއެވެ.
އެމްޑަބްލިއުއެސްސީން ބުނީ އެ ކުންފުނިން އަބަދުވެސް މަސައްކަތްކުރަނީ ކަސްޓަމަރުންނާއި ވީހާވެސް ގާތުން ލުއި ފަސޭހަ ޚިދުމަތްތަކެއް ދިނުމަށް ކަމަށެވެ. މިގޮތުން ޖޫރިމަނާ މައާފުކޮށްދިނުމުގެ ޕްރޮގްރާމަކީ ކަސްޓަމަރުންގެ ބިލުތައް އަދާކުރުމަށް ލުއިފަސޭހަ ގޮތެއް ހޯދައިދިނުމަށް ފަށާފައިވާ ޕްރޮގްރާމެއް ކަމަށް އެމްޑަބްލިއުއެސްސީން ވަނީ ބުނެފައެވެ.
އެކުންފުނިން ބުނީ މި ޕްރޮގްރާމް މިއަހަރުގެ ޑިސެމްބަރު 31 ގެ ނިޔަލަށް ކުރިއަށްދާނެ ކަމަށެވެ.
މިޕްރޮގްރާމުގެ ދަށުން، ޖޫރިމަނާ މަޢާފްކޮއްދޭނީ ފެން ބިލަށް ނުވަތަ ބިލްތަކަށް ދައްކަންޖެހޭ ޖުމްލަ ފައިސާ އެއްފަހަރާ ދައްކާ ޚަލާސްކުރުމަށްފަހު ޖޫރިމަނާ މަޢާފްކޮއްދިނުމަށް އެދި އެކަން ލިޔުމަކުން ނުވަތަ އީމެއިލް އަކުން ހުށައެޅުމުން ކަމަށް އެމްޑަބްލިއުއެސްސީން ބުނެފައިވެއެވެ.
އެމްޑަބްލިއުއެސްސީން ވަނީ ބިލުގެ ޖޫރިމަނާ މައާފުކުރުމުގެ ޕްރޮގްރާމެއް މީގެ ކުރިންވެސް ހިންގާފައެވެ. މި ޕްރޮގްރާމް ހިންގާފައިވަނީ 2019 ވަނަ އަހަރުއެވެ. މިއީ ކަރަންޓު ބިލަށް ބޮޑު ޖޫރިމަނާއެއް އަރާފައިވާ ފަރާތްތަކަށް ޖޫރިމަނާ މައާފުކުރުމަށް ލިބޭ ވަރަށް ބޮޑު ފުރުސަތެއް ކަމަށް އެމްޑަބްލިއުއެސްސީން ބުނެފައިވެއެވެ.
