އިސްރާއީލުގެ އަސްކަރިއްޔާއިން ފަލަސްތީނުގެ ހުޅަނގު އައްސޭރީގެ ޖެނީން ރެފިޔުޖީ ކޭމްޕުގައި ހިންގަމުންދާ ލާއިންސާނީ އަމަލުތައް ދިވެހި ސަރުކާރުން ކުށްވެރިކޮށްފިއެވެ.
ފޮރިން މިނިސްޓްރީން ނެރުނު ބަޔާނެއްގައި ބުނެފައިވަނީ، އިސްރާއީލުގެ އެ އަނިޔާވެރި އަމަލު އެންމެ ހަރުކަށި އިބާރާތުން ކުށްވެރިކުރާކަމަށެވެ.
އިސްރާއީލުން ދަނީ ވައިގެ މަގުންނާއި އެއްގަމު މަގު މަގުން ޖެނީން ރެފިއުޖީ ކޭމްޕަށް ހަމަލާތައް އަމާޒުކުރަމުންނެވެ. އެހެންކަމަށް ވާއިރު މި ހަމަލާތަކުގައި މަދުވެގެން 10 މީހުން މަރުވެފައިވާކަމަށް މީޑިއާ ރިޕޯޓްތައް ބުނެއެވެ. ހަމަލާތަކުގައި ޒަޚަމްވި މީހުންގެ ތެރޭގައި އާއްމުން ހިމެނެއެވެ. މިއީ އިންތިހާއަށް ރާއްޖޭގެ ސަރުކާރުން ކަންބޮޑުވާ ކަމެއް ކަމަށް ފޮރިން މިނިސްޓްރީގެ ބަޔާނުގައި ވަނީ ބުނެފައެވެ.
މި ހަމަލާތައް ދެމުން ދަނީ ހާލަތާ ނުބައްދަލު ގަދަ ބާރުގެ ބޭނުންކޮށްގެން، އެއްވެސް ހަތިޔާރެއް ނެތި ތިބި އާއްމުންނަށް ކަމަށާއި، ހަމަލާގެ ޝިކާރައަކަށް ވާ މީހުންގެ ތެރޭގައި ކުޑަކުދިންނާއި އަންހެނުން ހިމެނުމަކީ ރާއްޖެއިން ވަރަށް ބޮޑަށް ކަންބޮޑުވާ ކަމެއް ކަމަށް ވަނީ ބުނެފައެވެ.
އެ ބަޔާނުގައި، މި ހަމަލާތަކުގެ އަސަރުކުރި މީހުންގެ އާއިލާތަކަށް ރާއްޖޭގެ ސަރުކާރާއި ހުރިހާ ދިވެހިންގެ ނަމުގައި ތައުޒިޔާ ކިޔާފައިވެއެވެ. އަދި އަނިޔާވި މީހުންނަށް އަވަސް ޝިފާއެއް މިންވަރުކުރެއްވުން އެދޭކަމަށް ވެސް ވަނީ ބުނެފައެވެ.
ރާއްޖެއިން ގަބޫލުކުރާގޮތުގައި ފަލަސްތީނަކީ މިނިވަން މުސްތަގިއްލު ދައުލަތެއް ކަމަށާއި، ރާއްޖެއިން ދެމިތިބީ އެ ސްޓޭންޑުގެ މަތީގައި ކަމަށް އެ ބަޔާނުގައި ވަނީ ބުނެފައެވެ. އަދި ރާއްޖެއިން ފަލަސްތީނުގެ މީހުންނާއެކު ސާބިތުކަމާއެކު ދެމިއޮންނާނެ ކަަމަށްވެސް ވަނީ ބުނެފައެވެ.
ފަލަސްތީނުގެ ހުޅަނގު އައްސޭރީގެ ޖެނީން ރެފިޔުޖީ ކޭމްޕުގައި ދެމުންދާ ހަމަލާތަކާމެދު އދ.ން ވެސް ވަނީ ކަންބޮޑުވުން ފާޅުކޮށްފައެވެ. އދ.ގެ އެޖެންސީތަކުން ބުނާގޮތުގައި އިސްރާއީލުން ދެމުންދާ ހަމަލާތަކުގައި ޒަޚަމްވެފައިވާ މީހުންނަށް ސިއްހީ ފަރުވާދިނުމަށް އިސްރާއީލުން އަންނަނީ ހުރަސްއަޅަމުންނެވެ.
