ފަލަސްތީނުގެ ރައްޔިތުންނާ ދެކޮޅަށް އިސްރާއީލުން ހިންގި އުދުވާންތައް އޯއައިސީ ސަމިޓްގައި ރާއްޖޭން ކުށްވެރި ކޮށްފި
އެމެރިކާގެ އެމްބަސީ ގުދުސަށް ބަދަލުކުރުމާ ދެކޮޅަށް ފަލަސްތީނުގެ ރައްޔިތުން ކުރަމުންދަނީ ސުލްހަވެރި މުޒާހަރާއެއް
ފޮރިން މިނިސްޓަރު ޑރ އާސިމް...
ފަލަސްތީނުގެ ރައްޔިތުންނާ ދެކޮޅަށް އިސްރާއީލުން ހިންގި ހަރުކަށި އަމަލުތަކާއި ގަތުލު އާންމާ ގުޅިގެން، އޮގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ)ގެ ސަމިޓުގައި އިސްރާއީލްގެ އަމަލުތައް ރާއްޖޭން ކުށްވެރިކޮށްފި އެވެ.
ތުރުކީގެ އިސްތަންބުލްގައި ކުރިއަށް ގެންދާ އޯއައިސީގެ ހަތް ވަނަ ސަމިޓުގައި، ރާއްޖޭގެ ފަރާތުން ފޮރިން މިނިސްޓަރު މުހައްމަދު އާސިމް ވަނީ އިސްރާއީލުގެ އެއަމަލުތައް ކުށްވެރި ކުރައްވާ ވާހަކަފުޅު ދައްކަވާފައެވެ.
މިނިސްޓަރު އާސިމް ވިދާޅުވީ އެމެރިކާގެ އެމްބަސީ ގުދުސަށް ބަދަލުކުރުމާ ދެކޮޅަށް ފަލަސްތީނުގެ ރައްޔިތުން ކުރަމުންދާ މުޒަހަރާގައި އިސްރާއީލުގެ ސިފައިން ހަތިޔާރާއެކު އެރައްޔިތުންނާ ކުރިމަތިލައި ހިންގަމުންދާ ލާއިންސާނީ އަމަލުތައް ކުށްވެރިކުރާ ކަމަށެވެ. ފަލަސްތީނުގެ އާންމުންނާއި ދެކޮޅަށް އިސްރާއީލުން ތަކުރާރުކޮށް ހިންގަމުންދާ ރަހުމް ކުޑަ އަމަލުތަކާ މެދު އަޅާ ނުލައި ތިބުމަކީ މެދު އިރުމަތީގައި ހަމަޖެހުން ގާއިމް ކުރަން ކުރަމުންދާ މަސައްކަތަށް ހުރަސް އެޅޭނެ ކަމެއް ކަމަށް އާސިމް ވިދާޅުވި އެވެ.
މިނިސްޓަރު އާސިމް ވިދާޅުވީ ފަލަސްތީން ރައްޔިތުން މުޒާހަރާ ކުރަމުންދިޔައީ ސުލްހަވެރިކާމާއެކު ކަމަށާއި، ނަމަވެސް އިސްރާއީލުން އެކަށީގެން ނުވާ ބާރުގެ ބޭނުން ކޮށްފައިވާ ކަމަށެވެ. އެމެރިކާގެ އެމްބަސީ ގުދުސަށް ބަދަލުކުރި ކުރުމާ ދެކޮޅުކަން ފާހަގަކުރައްވާ މިނިސްޓަރު އާސިމް ވިދާޅުވީ ގުދުސް އަށް އެމްބަސީ ބަދަލު ކުރަން އެހެން ގައުމުތަކުން ކުރަމުންދާ މަސައްކަތާ ދެކޮޅަށް އޯއައިސީގެ މެމްބަރު ގައުމުތަކުން މަސައްކަތް ކުރަންޖެހޭ ކަމަށެވެ.
މިނިސްޓަރު އާސިމް ވިދާޅުވީ އިރުމަތީ ގުދުސްއަކީ ފަލަސްތީނުގެ ވެރިރަށް ކަމުގައި ހެދުމަށް ފަލަސްތީނުން ކުރަމުންދާ މަސައްކަތުގައި ރާއްޖޭން އޮތީ ފަލަސްތީން ރައްޔިތުންނާ އެކު ކަމަށެވެ.
އޯއައިސީގައި ރާއްޖޭން އިސްރާއީލުގެ އަމަލުތަކާ ދެކޮޅަށް އަޑު އުފުލި އިރު، ފަލަސްތީނުގެ ސަރަހައްދު ތަކުގައި އިސްރާއީލުން ހިންގާ ލާއިންސާނީ އަމަލުތަކުގެ މައްސަލާގައި ބޭއްވި ޚާއްސަ ސެޝަނެއްގައި ޖެނީވާގައި ހުންނަވާ ރާއްޖޭގެ މަންދޫބު ޑރ. ހާލާ ހަމީދު ވަނީ އދ.ގެ ހިއުމަން ރައިޓްސް ކޮމިޝަނުގައި އެކަންކަމާ ދެކޮޅާށް އަޑު އުފުއްލަވާފައެވެ.
އަދި އެ މައްސަލަ ބަލައި ތަހުގީގު ކުރަން މިނިވަން ކޮމިޝަނެއް އުފައްދަން އދ. ގެ ހިއުމަން ރައިޓްސް ކޮމިޝަނުން ހުށަހެޅި ހުށަހެޅުން ރާއްޖެއިން ވަނީ ތާއީދު ކޮށްފައެވެ.
