ކާލޯ އަންޗެލޮޓީ އަންނަ އަހަރު ބްރެޒިލްގެ ކޯޗުކަމާ ހަވާލުވާނެ!

ރެއާލް މެޑްރިޑްގެ މިހާރުގެ ކޯޗު ކާލޯ އަންޗެލޮޓީ, އަންނަ އަހަރު ބްރެޒިލްގެ ކޯޗުކަމާ ހަވާލުވާނެކަމަށް އެ ގައުމުގެ ފެޑެރޭޝަނުން ބުނެފިއެވެ.

ބްރެޒިލް ފުޓްބޯޅަ ފެޑެރޭޝަންގެ ރައީސް އެޑްނާލްޑޯ ރޮޑްރިގޭޒް ވިދާޅުވީ، 2024 ވަނަ އަހަރު އޮންނަ ކޮޕަ އެމެރިކާގައި ބްރެޒިލް ޓީމަށް އިރުޝާދުދޭނީ އަންޗެލޮޓީ ކަމަށެވެ. މިދިޔަ ސީޒަން ނިމުމުގެ ކުރިން އަންޗެލޮޓީ ބްރެޒިލް ޓީމާ ހަވާލުވާ ވާހަކަތައް ދެކެވެން ފެށިއެވެ. ވަރލްޑްކަޕްގެ ނާކާމިޔާބީއަށްފަހު ބްރެޒިލްއިން ބޭނުންވީ އަންޗެލޮޓީއާ ގައުމީ ޓީމް ހަވާލުކުރާށެވެ. އެކަމަކު އަންޗެލޮޓީ ބުނަމުން އައީ ރެއާލް މެޑްރިޑާއެކު އެއްބަސްވުމެއް އެބައޮތްކަމަށާއި, އެ އެއްބަސްވުމަށް އިހުތިރާމް ކުރާނެ ކަމަށެވެ. އެ އެއްބަސްވުން ހަމަވާނީ ކުރިއަށް އޮތް ސީޒަންގެ ނިޔަލަށެވެ. އެހެންކަމުން 2024 ވަނަ އަހަރު ޖޫން މަހު އަންޗެލޮޓީއަށް ބްރެޒިލްގެ ގައުމީ ޓީމާ ހަވާލު ވެވޭނެއެވެ. ކޮޕަ އެމެރިކާ އޮންނާނީވެސް ޖޫން މަހުއެވެ.

ބްރެޒިލް ފެޑެރޭޝަނުން ނިންމާފައިވަނީ ކުރިއަށް އޮތް އަހަރު ގައުމީ ޓީމަށް ދާއިމީ ކޯޗެއް ނުގެންނާށެވެ. ވަގުތީ ކޯޗެއްގެ ގޮތުގައި މަސައްކަތްކުރާނީ ބްރެޒިލްގެ ކުރީގެ މިޑްފީލްޑަރެއް ކަމަށްވާ ފާނަންޑޯ ޑިނިޒްއެވެ. ބްރެޒިލް ފެޑެރޭޝަނުން ބުނެފައިވަނީ ފާނަންޑޯގެ ގޭމް ޕްލޭނާ އަންޗެލޮޓީގެ ގޭމް ޕްލޭން އެއްގޮތް ކަމަށެވެ. ވަރލްޑް ކަޕަށް ފަހު ޓީޓޭ މަގާމުން އިސްތިއުފާ ދިންފަހުން ބްރެޒިލްގެ ގައުމީ ޓީމަށް ދާއިމީ ކޯޗެއް ހަމަޖައްސާފައެއްނުވެއެވެ.

ބްރެޒިލްގެ ކޯޗުކަމާ އަންޗެލޮޓީ ހަވާލުވެއްޖެނަމަ އޭނާ ވެގެންދާނީ 1965 ވަނަ އަހަރުގެ ފަހުން ބްރެޒިލް ގައުމީ ޓީމާ ހަވާލުވާ، ގައުމުން ބޭރުގެ ފުރަތަމަ ކޯޗަށެވެ. ނަމަވެސް މި ވާހަކަތަކާ ގުޅިގެން އަންޗެލޮޓީވެސް އަދި ރެއާލްއިންވެސް އެއްވެސް ވާހަކައެއް ނުދައްކައެވެ. އަންޗެލޮޓީ ރެއާލްގައި މަސައްކަތް ކުރަމުން ދަނީ ދެވަނަ ފަހަރަށެވެ. ދެވަނަ ފަހަރަށް ހަވާލުވެ ފުރަތަމަ ސީޒަންގައި ޗެމްޕިއަންސް ލީގާއި ލަލީގާވެސް ހޯދިއެވެ.