އޮންލައިންކޮށް ރީ-ރަޖިސްޓްރީ ކުރެވޭ ގޮތަށް ޖުލައި މަހު 16ގައި ރަޖިސްޓްރޭޝަނަށް ހުޅުވާލަނީ
ރިޔާސީ އިންތިޚާބުގެ ވޯޓުލާ މަރުކަޒުތައް ތައްޔާރު ކުރުމުގެ މަސައްކަތްތައް ދަނީ ކުރިއަށް
ބުދަ ދުވަހު ބޭއްވި ގައުމީ ލަފާ ދޭ ކޮމިޓީގެ ބައްދަލުވުމުގެ ތެރެއިން
ރިޔާސީ އިންތިޚާބުގައި, ރަށްވެހިވެފައިވާ ރަށް ނޫން އެހެން ރަށެއްގައި ވޯޓުލާން އޮންލައިންކޮށް ރީ-ރަޖިސްޓްރީ ކުރެވޭ ގޮތަށް، ޖުލައި މަހު 16ގައި ރަޖިސްޓްރޭޝަނަށް ހުޅުވާލަން ނިންމާފައިވާކަމަށް އިލެކްޝަން ކޮމިޝަނުން ބުނެފިއެވެ.
އިލެކްޝަންސް ކޮމިޝަން (އީސީ)ން ސިޔާސީ ޕާޓީތަކާއެކު ބުދަ ދުވަހު ބޭއްވި ގައުމީ ލަފާ ދޭ ކޮމިޓީގެ ބައްދަލުވުމުގައި އީސީގެ ނައިބު ރައީސް އިސްމާއީލް ހަބީބް ވިދާޅުވީ، ރިޔާސީ އިންތިޚާބުގެ ވޯޓުލާ މަރުކަޒުތައް ތައްޔާރު ކުރުމުގެ މަސައްކަތްތައް ކުރިއަށްދާ ކަމަށާއި، ރިސޯޓުތަކާއި ސިނާއީ މަސައްކަތްކުރާ ތަންތަނަށް ވެސް ވޯޓު ފޮށި ބެހެއްޓުމުގެ މަސައްކަތްތައް ކުރަމުންދާ ކަމަށެވެ.
ހަބީބު ވިދާޅުވީ ޖުލައި މަހުގެ 15 ވަނަ ދުވަހުން ފެށިގެން އިންތިޚާބާ ބެހޭ ވަރަށް ބޮޑެތި މަސައްކަތްތައް ފެށިގެން ކުރިއަށްދާނެ ކަމަށާއި، ޖުލައި މަހުގެ 16 ވަނަ ދުވަހު ރީ-ރަޖިސްޓްރޭޝަނަށް ހުޅުވާލާނެ ކަމަށެވެ. ރީ-ރަޖިސްޓްރީ ކުރުމަކީ ވަރަށް މުހިންމުކަމެއްކަން ފާހަގަކުރައްވައި ހަބީބު ވިދާޅުވީ، ސިޔާސީ ޕާޓީތަކުންނާއި ކައުންސިލްތަކުން ރީ-ރަޖިސްޓްރީކުރުމަށް ބާރުއަޅައި، މަސައްކަތް ކޮށްދޭން ޖެހޭކަމަށެވެ. ރީ-ރަޖިސްޓްރީކުރަން 21 ދުވަހުގެ މުއްދަތެއް ލިބޭނެ ކަމަށާއި، މިފަހަރުގެ ޕްރޮސެސް ވަރަށް ފަސޭހަވާނެ ކަމަށް ހަބީބު ވިދާޅުވިއެވެ. އަދި އެ މީހަކު ހުރި ތަނަކުން އޮންލައިންކޮށް ފޯމު ހުށަހެޅުން އެއީ ލިބޭނެ ވަރަށް ބޮޑު ފަސޭހައެއް ކަމަށް ހަބީބު ވިދާޅުވިއެވެ.
އިންތިޚާބަށް ނަގާ ވަގުތީ މުވައްޒަފުން ނެގުމުގެ މަސައްކަތް ކުރިއަށްދާކަން ފާހަގަކުރައްވައި ހަބީބު ވިދާޅުވީ، ވޯޓުލާ މަރުކަޒަށް 5500 އޮފިޝަލުން ބޭނުންވާކަމަށާއި، އޭގެ ތެރެއިން މިހާތަނަށް ކުރިމަތިލާފައިވަނީ 3212 އޮފިޝަލުން ކަމަށެވެ. އޮފިޝަލުން ނެގުމުގެ މަސައްކަތް މިހާރުވެސް އަތޮޅުތެރެއިންނާއި މާލޭގައި ކުރިއަށްދާކަން ހަބީބު ފާހަގަކުރެއްވިއެވެ. އަދި ވިދާޅުވީ ޓާސްކްފޯސް މުވައްޒަފުންގެ ގޮތުގައި 280 މުވައްޒަފުން މިހާތަނަށް ވަގުތީ ގޮތުން ހަމަޖައްސާފައިވާ ކަމަށެވެ.
ރިޔާސީ އިންތިޚާބު 2023 އޮބްޒަރވްކުރުމަށް 15 ގައުމަކަށް ރަސްމީކޮށް ދައުވަތު ފޮނުވާފައިވާތީ އެކަމަށް އިޝާރާތް ކުރައްވައި އީސީގެ ރައީސް ފުއާދު ތައުފީގު ވިދާޅުވީ، ދައުވަތު ފޮނުވީ ރާއްޖެއަށްވެސް އެގައުމުތަކުގެ އިންތިޚާބުތައް ކުރިއަށްދާއިރު އޮބްޒަރވްކުރުމުގެ ދައުވަތު ލިބޭ ގައުމުތަކަށާއި މީގެ ކުރިން އިންތިޚާބަށް އެކިއެކި އެހީތެރިކަން ފޯރުކޮށްދީފައިވާ ގައުމުތަކަށް ކަމަށެވެ.
ފުއާދު ވިދާޅުވީ ދައުވަތު ނުލިބޭ ގައުމުތަކުން ވެސް އިންތިޚާބު އޮބްޒަރވް ކުރަން ބޭނުންވާނަމަ އެފުރުސަތު ލިބޭނެ ކަމަށެވެ. ރަސްމީކޮށް ދައުވަތު ފޮނުވާފައިވާ 15 ގައުމަކީ ޖޯޖިއާ، ފިލިޕީންސް، އިންޑޮނޭޝިއާ، ތައިލެންޑް، ސައުތު ކޮރެއާ، ސައުތު އެފްރިކާ، ކިރްގިސްތާން، ހޮންޑިއުރާސް, ސްރީލަންކާ، ބޮސްނިއާ، އޮސްޓްރޭލިއާ، ޖޯޑަން، ކެނެޑާ، ޖަޕާން އަދި ނޭޕާލެވެ.
