ލިވަޕޫލް ދޫކޮށް ތިން އަހަރު ދުވަހުގެ އެއްބަސްވުމެއްގެ ދަށުން، ރޮބާޓޯ ފިރްމީނޯ ސައޫދީ ޕްރޯ ލީގުގެ އަލް އަހްލީއާ ގުޅިއްޖެއެވެ.
މިދިޔަ ސީޒަން ނިމުނުތަނާ އޭނާގެ އެއްބަސްވުން ހަމަވެފައި ވުމުން، އުމުރުން 31 އަހަރުގެ ބްރެޒިލްގެ ފޯވާޑަކީ ފްރީ އޭޖެންޓެކެވެ. އޭނާ ވަނީ 2015 ވަނަ އަހަރު ހޮފެންހައިމްއިން ގުޅުމަށްފަހު ލިވަޕޫލްއަށް ކުޅުނު 362 މެޗުގައި 111 ލަނޑު ކާމިޔާބުކޮށްފައެވެ. އަލް އަހްލީގައި ފިރްމީނޯ ގުޅޭނީ ޗެލްސީގެ ކުރީގެ ކީޕަރު މެންޑީއާއެވެ.
ފިރްމީނޯ ވަނީ 2019 ވަނަ އަހަރުގެ ޗެމްޕިއަންސް ލީގާއި 2020 ވަނަ އަހަރުގެ ޕްރިމިއާ ލީގު ހިމެނޭހެން ލިވަޕޫލާއެކު ހަތް ތަށި ހޯދާފައެވެ. އޭނާގެ އިތުރުން މިލްނާ، ޗެމްބަލައިން އަދި ކެއިޓާވެސް ވަނީ އެއްބަސްވުން ހަމަވުމުން ޓީމު ދޫކޮށްލަން ނިންމާފައެވެ. ސީޒަންގެ ފަހު މެޗަށްފަހު ވަކިވި ހަތަރު ކުޅުންތެރިންނަށް ޓީމުގެ ކުޅުންތެރިންނާއި ސަޕޯޓަރުން ވަނީ އިހުތިރާމް އަދާކޮށް، ތައުރީފުކޮށްފައެވެ.
ލިވަޕޫލުން ފްލެމެންގޯ ބަލިކޮށް ފުރަތަމަ ފަހަރަށް 2019 ވަނަ އަހަރުގެ ޑިސެމްބަރު މަހު ފީފާ ކުލަބު ވޯލްޑް ކަޕް ކާމިޔާބުކުރިއިރު، މެޗުގެ ހަމައެކަނި ލަނޑު ޖަހައިދިނީ ފިރްމީނޯއެވެ. މިއަހަރުގެ މާޗް މަހު އޭނާ ވަނީ ލިވަޕޫލް ދޫކޮށްލާކަން އިއުލާނުކޮށްފައެވެ.
އަލް އަހްލީ ވަނީ މިދިޔަ ސީޒަނުގައި ސައޫދީ ފުރަތަމަ ޑިވިޝަން ލީގުގެ ޗެމްޕިއަންކަން ހޯދައި، 2023-24ގެ ސީޒަނަށް އަލުން ސައޫދީ ޕްރޯ ލީގަށް ޕްރޮމޯޝަން ހޯދައިފައެވެ.
