ގޯތި ލިސްޓަށް 600 ޝަކުވާ މިހާތަނަށް ލިބިފައިވޭ
ލިސްޓަށް ބަދަލު އަންނަފަދަ ޝަކުވާއެއް އަދި ލިބިފައެއް ނެތް
ގުޅިފަޅު ބިންހިއްކުމުގެ މަޝްރޫޢު
ބިންވެރިޔާ ސްކީމުގެ ދަށުން މާލޭ ސަރަޙައްދުން ގޯތިލިބޭ މީހުންގެ ވަގުތީ ލިސްޓަށް މިހާތަނަށް 600 ޝަކުވާ ހުށަހަޅާފައިވާ ކަމަށް ގޯއްޗާއި ފްލެޓް ދޫކުރުމުގެ މަސައްކަތްތަކަށް ސަރުކާރުން އެކުލަވާލައްވާފައިވާ ކޮމިޓީން ބުނެފިއެވެ.
ރާއްޖޭގެ ޓީވީ ޗެނަލަކަށް މައުލޫމާތު ދެއްވަމުން ކޮމިޓީގެ ފަރާތުން ވާހަކަދައްކަވަމުން މިނިސްޓްރީ އޮފް ފިނޭންސްގެ ސްޓޭޓް މިނިސްޓަރ އަލްއުސްތާޛް އަނަސް ޢަބްދުއްސައްތާރް ވިދާޅުވީ މި ލިސްޓަށް ޝަކުވާ ހުށަހެޅުމަށް މިމަހުގެ 15 ގެ ނިޔަލަށް ފުރުޞަތު ހުޅުވާލާފައިވާއިރު، މިހާތަނަށް 600 އެއްހާ ޝަކުވާ ލިބިފައިވާ ކަަމަށެވެ. ވަގުތީ ލިސްޓަށް މިހާތަނަށް ހުށަހަޅާފައިވާ ޝަކުވާތަކުގައި، ވަގުތީ ލިސްޓަށް ބަދަލު އަންނަށް ފަދަ އެއްވެސް ޝަކުވާއެއް ލިބިފައިނުވާ ކަމަށް ވެސް ވަނީ ވިދާޅުވެފައެވެ.
މާލެ ސަރަހައްދަށް ދިމާވެފައިވާ ބޯހިޔާވަހިކަމުގެ މައްސަލައަށް ހައްލެއް ހޯދާދިނުމަށް ފަށާފައިވާ "ބިންވެރިޔާ ސްކީމް"ގެ ދަށުން މިބުރުގައި 6،200 ގޯތި ދޫކުރުމަށް ނިންމަވާފައިވާކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވަނީ ވިދާޅުވެފައެވެ.
މާލެ ސަރަހައްދަށް ދިމާވެފައިވާ ބޯހިޔާވަހިކަމުގެ މައްސަލަ ހައްލުކުރުމަށް ސަރުކާރުން އެންމެ ފުރަތަމަ ނިންމީ މާލެ ސަރަހައްދުން 5،000 ގޯތި ދޫކުރުމަށެވެ. އެއީ ހުޅުމާލެއިން 1،000 ގޯތި، ގުޅީފަޅުން 2،000 ގޯތި އަދި ގިރާވަރުފަޅުން 2،000 ގޯއްޗެވެ.
އެހެންނަމަވެސް ގުޅީފަޅު ބިން ހިއްކުމުގެ މަޝްރޫއު ފައްޓަވައިދެއްވާ ވާހަކަފުޅުދައްކަވަމުން ރައީސުލްޖުމްހޫރިއްޔާ ވަނީ މާލެ ސަރަހައްދުން މި ބުރުގައި 6,200 ގޯތި ދޫކުރަން ނިންމަވާފައިވާކަން އިއުލާނުކުރައްވާފައެވެ.
ރައީސް ވިދާޅުވީ ހުޅުމާލެއިން ދޭން ނިންމެވި 1،000 ގޯތީގެ ބަދަލުގައި ހުޅުމާލެއިން 2،200 ގޯތި ދެއްވަން ނިންމަވާފައިވާކަމަށެވެ. މިއާއެކު މުޅި ޖުމްލަ 6،200 ގޯތި ދޫކުރެވިގެންދާނެކަން ރައީސް އިއުލާނުކުރެއްވިއެވެ.
ރައީސް އިތުރަށް ވިދާޅުވީ ގުޅީފަޅާއި ގިރާވަރު ފަޅުން އިތުރަށް ގޯތި ދެވޭނެ ގޮތްތަކަކީ ކޮބައިތޯ ބައްލަވަމުންދާކަމަށެވެ. އަދި ކުރިއަށްއޮތްތަނުގައި މާލެ ސަރަހައްދުން ގޯތި ބޭނުންވެފައިތިބި މީހުންނަށް ގޯތި ލިބޭނެ ގޮތްތައް ހަމަޖައްސަވައިދެއްވާނެ ކަމަށް ރައީސް ވަނީ ވިދާޅުވެފައެވެ.
މާލެ ސަރަހައްދުން ގޯތި ދޫކުރުމަށް ސަރުކާރުން ހުޅުވާލި ފުރުސަތުގައި ގޯތި ލިބޭ މީހުންގެ ވަގުތީ ލިސްޓު މިހާރު ވަނީ އާންމުކޮށްފައެވެ. ވަގުތީ ލިސްޓު އާންމުކުރިއިރު 12،794 ފޯމަކީ ޝަރުތު ހަމަވާ ފޯމެވެ. އެއީ 19،858 މީހުންނެވެ.
ސަރުކާރުން ވަނީ ގޯއްޗަށް ޝަރުތުހަމަވާ އެންމެންނަށް ގޯތި ދޭން ނިންމަވާފައެވެ. މިގޮތުން 6،200 ގޯތި ދިނުމަށްފަހު ބާކީވާ މީހުންނަށްވެސް މާލެ ސަރަހައްދުން ގޯތި ހަމަޖައްސައިދެއްވަން ވަނީ ނިންމަވާފައެވެެ.
