ކަނޑުމަތިން އިންޖީނު ހުއްޓުނު ދޯންޏެއްގައި ތިބި މީހުންނަށް އެމްއެންޑީއެފުން އެހީތެރިކަން ފޯރުކޮށްދީފި
އެ ފަރާތްތައް ހުޅުމާލެ ގެނައީ ރޭ 10:45 އެހާއިރު
ދޯނީގައި ތިބި މީހުން އެމްއެންޑީއެފް ކޯސްޓްގާޑުން ހުޅުމާލެ ގެނެސްފައިވޭ
ނ. އަތޮޅުން ފުރައިގެން މާލެ ދަތުރުކުރަމުން ދަނިކޮށް ތެޔޮ ހުސްވެ، އިންޖީނު ހުއްޓުނު ދޯންޏެއްގައި ތިބި މީހުންނަށް އެމްއެންޑީއެފް ކޯސްޓްގާޑުން އެހީތެރިކަން ފޯރުކޮށްދީފިއެވެ.
އެމްއެންޑީއެފުން މައުލޫމާތު ދޭ ގޮތުގައި "ފަހި ރޯދި" ނަމަކަށް ކިޔާ އެ ދޯނި، މާލެ އަތޮޅު މަކުނުދޫ ރިސޯޓު ކައިރިން ތެޔޮ ހުސްވެގެން ކޯސްޓްގާޑަށް ރިޕޯޓުކޮށްފައިވަނީ ރޭ 21:00 އެހާއިރުއެވެ. މި ހާދިސާގެ ރިޕޯޓު ލިބުމާއެކު އެ ދޯންޏަށް އެހީތެރިކަން ފޯރުކޮށްދިނުމަށް އެމްއެންޑީއެފް ކޯސްޓްގާޑް ނޫރައްދީން އެ ސަރަހައްދަށް ދިޔަ ކަމަށާއި ދޯނީގައި ތިބި މީހުން ހުޅުމާލެ ގެނެސްފައިވާ ކަމަށް އެ އިދާރާއިން ބުނެފައިވެއެވެ.
ޖުމްލަ 32 މީހުންނާއެކު ދަތުރުކުރަމުން ދިޔަ އެ ދޯނި އޮތް ސަރަހައްދަށް، ކޯސްޓްގާޑް ނޫރައްދީން ދިއުމަށްފަހު ހުޅުމާލެ ގެނެސްފައިވަނީ އެ ދޯނީގައި ތިބި 12 ކުޑަކުދިންނާއި، ހަތް އަންހެނުންނާއި، ތިން ފިރިހެނުން ކަމަށް އެމްއެންޑީއެފުން ބުނެފައިވެއެވެ. އެ ފަރާތްތައް ހުޅުމާލެއަށް ގެނައީ ރޭ 10:45 އެހާއިރުއެވެ.
ދޯނީގައި ތިބި 10 މީހުން\ ދޯނީގައި މަޑުކޮށްފައިވާ ކަމަށް ވެސް އެމްއެންޑީއެފުން މައުލޫމާތު ދެއެވެ. މި ދޯނިން ދަތުރުކުރި އެންމެންގެ ހާލު ވެސް ރަނގަޅު ކަމަށް އެ އިދާރާއިން މައުލޫމާތުދީފައިވެއެވެ.
