ވާދެމުމުގެ މުބާރާތުގެ ޗެމްޕިއަންކަން އޭވިއޭޝަން ސެކިއުރިޓީ އަދި ޓީމް މިޝަންއަށް!

އައްޑޫ އީދިސަމާ 1444ގެ ވާދެމުމުގެ މުބާރާތުގެ ޗެމްޕިއަންކަން އޭވިއޭޝަން ސެކިއުރިޓީ އަދި ޓީމް މިޝަންއިން ހޯދައިފި އެވެ.

ވަރަށް ފޯރިއާއެކު ކުރިއަށްދިޔަ މިމުބާރާތުގެ އަންހެން ފައިނަލް މެޗުގައި ބައްދަލުކުރީ ގޯދިއްޔާ ޓީމާއި އޭވިއޭޝަން ސެކިއުރިޓީއިން ނެވެ. ފާއިތުވި އަހަރުތަކުގައި މިމުބާރާތުގެ ޗެމްޕިއަން ގޯދިއްޔާ ބަލިކޮށް، 1444 އަހަރުގެ ޗެމްޕިއަންކަން ހޯދާފައިވަނީ އޭވިއަޝަން ސެކިއުރިޓީންނެވެ. އޭވިއޭޝަން ސެކިއުރިޓީއިން ފައިނަލްގައި ވާދަކޮށްފައިވަނީ ހުރިހާ މެޗަކުން މޮޅުވެގެންނެވެ.

މިމުބާރާތުގައި އަންހެން 8 ޓީމް ވަނީ ވާދަކޮށްފައެވެ. އޭވިއޭޝަން ސެކިއުރިޓީއިން ޗެމްޕިއަންކަން ހޯދާފައިވާއިރު، އެންމެ މޮޅު ކޯޗަކަށް ހޮވިފައިވަނީ އެޓީމްގެ ކޯޗް ހަސަން ޒަރީރު އެވެ.

މީގެ އިތުރުން މިމުބާރާތުގެ ފިރިހެން ބައިގައި ވާދަކުރި 11 ޓީމްގެ ތެރެއިން ޓީމް މިޝަން އަދި ޓީމް ފެނަކަ ވާދަކުރި މެޗުން މޮޅުވެ ފިރިހެން ޗެމްޕިއަންކަން ހޯދާފައިވަނީ ޓީމް މިޝަން ޓީމުންނެވެ.

މިއަހަރުގެ މިމުބާރާތުގައި އެންމެ ގަދަ ޓީމެއްގެ ގޮތުގައިވެސް ފެނިގެންދިޔަ ދަ މިޝަން ޓީމުގެ ކޯޗް އިބްރާހީމް ވިސާމް ވަނީ ފިރިހެން ކެޓަގަރީން އެންމެ މޮޅު ކޯޗުގެ މަޤާމް ހާސިލްކޮށްފައެވެ.

އައްޑޫސިޓީ ކައުންސިލުން އިންތިޒާމްކޮށްގެން ކޮންމެ އަހަރެއްގެވެސް އަޟްހާ އީދާއި ގުޅުވައިގެން އައްޑޫސިޓީގައި ގިނަ ހަރަކާތްތަކެއް ކުރިއަށްގެންދެ އެވެ. އެގޮތުން ބޭއްވުނު ހަރަކާތްތަކުގެ ތެރެއިންވެސް އެންމެ ފޯރިގަދަ މުބާރާތެއްގެ ގޮތުގައި ފެނިގެންގޮސްފައިވަނީ މަރަދޫގައި ބޭއްވި ވާދެމުމުގެ މުބާރާތެވެ.

މިމުބާރާތުގެ ޗެމްޕިއަން ޓީމްތަކަށްވަނީ މެޑަލްއާއި ފާއިސާގެ އިނާމް އަދިވެސް އެކިި ފަރާތްތަކުން ހުށަހެޅި ގިފްޓް ވައުޗަރުތައް ހަވާލުކޮށްފައެވެ.

މުބާރާތް ނިންމުމުގެ ރަސްމިއްޔާތުގައި ވާހަކަދައްކަވަމުން އައްޑޫ ސިޓީ ކައުންސިލްގެ މޭޔަރު އަލީ ނިޒާރު ވިދާޅުވީ ކޮންމެ އަހަރެއްގެވެސް އީދާއި ދިމާކޮށް ބާއްވާ މުބާރާތްތަކުގެ ތެރެއިން ވަކިން ހާއްސަކޮށް މަރަދޫގައި ބާއްވާ ހަރަކާތްތަކަކީ ފާހަގަކޮށްލެވޭފަދަ ފެންވަރު ރަނގަޅު މުބާރާތްތަކެެއް ކަމަށާއި، މިއީ ރަށުގެ ހުރިހާ ރައްޔިތުންގެ ބައިވެރިވުން އޮތުމުން ފެންނަ އިޖްތިމާއީ ރޫހުގެ ވަރުގަދަކަން ކަމަށެވެ.

މަރަދޫގައި ބާއްވާ މުބާރާތްތަކަކީ މަރަދޫއިން ވަކިން އީދަށް ކޮމިޓީއެއް ނަގައި ފަންޑްރައިޒްކޮށްގެން ކުރިއަށްދާ ހަރަކާތްތަކެވެ.