މި ފެށުނީ ރާއްޖޭގެ މުޅި އިގްތިޞާދީ ރޫފަ ހެޔޮކުރާނެ މަޝްރޫއެއް: ރައީސް

ގުޅީފަޅު ބިން ހިއްކުމުގެ މަޝްރޫއާއެކު މި ފެށުނީ ރާއްޖޭގެ މުޅި އިޤްތިޞާދުގެ ރޫފަ ހެޔޮވެގެންދާނެ މަޝްރޫއެއް ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.

ރައީސުލްޖުމްހޫރިއްޔާ މިފަދައިން ވިދާޅުވީ އާދީއްތަ ދުވަހު ގުޅީފަޅު ބިން ހިއްކުމުގެ މަޝްރޫއު ފައްޓަވައިދެއްވައި ދެއްކެވި ވާހަކަފުޅުގައެވެ.

ރައީސް ވިދާޅުވީ ގުޅީފަޅު ހިއްކައިގެން މާލޭގެ ރައްޔިތުންނަށް ގޯތި ދިނުމުގެ އިތުރުން ރާއްޖޭގެ އިޤްތިޞާދީ ތަރައްޤީއާ ގުޅިފައިވާ މުހިންމު ދެ ކަމެއް މި ބިމުގައި ހިނގާނެ ކަމަށެވެ.

އޭގެ ތެރެއިން އެއް ކަމަކީ މާލޭގެ ގުރާބުތުނޑި ސަރަހައްދުގައި މިހާރު ހިނގަމުން އަންނަ މާލޭ ވިޔަފާރި ބަނދަރު ގުޅިފަޅުގައި އަލަށް ޤާއިމުކުރުން ކަމަށެވެ. މީގެ ތެރެއިން ކުރެވޭ އަނެއް މުހިންމު މަސައްކަތަކީ ގުޅިފަޅުގައި ބައިނަލްއަޤްވާމީ ވިޔަފާރި ބަނދަރެއް ތަރައްޤީ ކުރުން ކަމަށާއި، އެކަމާ ބެހޭ ޕްލޭންތައް ވެސް ގާތްގަނޑަކަށް ނިމިފައިވާކަން ރައީސް ފާހަގަކުރެއްވިއެވެ.

އަދި މާލޭގެ އުތުރު ފަރާތުގައާއި އެކި ސަރަޙައްދުތަކުގައި ހުރި ބޮޑެތި ގުދަންތަކާއި ވާރކްޝޮޕްތައް ފަދަ ތަންތަނާއި، ބައެއް ވިޔަފާރިތައް ވެސް ގުޅިފަޅަށް ބަދަލުކުރެވިގެންދާނެ ކަމަށް ރައީސް ވިދާޅުވިއެވެ.

ރައީސް ވަނީ އެމަނިކުފާނު އެ ހުންނެވީ މުޅި ރާއްޖެއަށް ތަރައްގީ ގެނެސްދެއްވަންކަމުގައި ފާހަގަކުރައްވާފައެވެ. މިދިޔަ ހަތަރު އަހަރެއްހާ ދުވަހު ހިންގެވި ކޮންމެ މަޝްރޫޢެއް، އަދި ކުރެއްވި ކޮންމެ މަސައްކަތަކީ ރައްޔިތުންގެ ތަކުލީފުތައް ކުޑަކޮށްދެއްވުމަށް ހިންގެވި މަޝްރޫއެއްކަން ރައީސް ވަނީ ފާހަގަކުރައްވާފައެވެ.

އަދި ސޮއިކުރައްވާ ކޮންމެ އެގްރިމެންޓެއް، އަޅުއްވާ ކޮންމެ ބިންގަލެއް އަދި ފައްޓަވާ ކޮންމެ މަޝްރޫޢެއްގެ އަމާޒަކީ، ދިވެހިން އެދިއެދި ތިބި "އުފާވެރި އަމާން ރާއްޖެ" ދިވެހިންނަށް ހޯދައިދެއްވުންކަމުގައި ވެސް ރައީސް ވިދާޅުވިއެވެ.