ނޭޝަނަލް ޑްރަގް އެޖެންސީ ރީބްރޭންޑްކުރަނީ
އެންޓި ޑްރަގް ޑޭގެ ރަސްމީ ޖަލްސާ މި މަހު ބާއްވާނެ
އެންޑީއޭގެ ސީއީއޯ އިމާދު ޞާލިހު
ނޭޝަނަލް ޑްރަގް އެޖެންސީ ރީބްރޭންޑްކުރަން ނިންމަވާފައިވާ ކަމަށް އެންޑީއޭގެ ސީއީއޯ އިމާދު ޞާލިހު ވިދާޅުވެއްޖެއެވެ.
އޭނާ އެކަން ހާމަކުރެއްވީ ރާއްޖެޓީވީގެ ފަލަސުރުޚީގައި ވާހަކަފުޅު ދައްކަވަމުންނެވެ.
އެންޓި ޑްރަގް ޑޭއާ ގުޅިގެން ރާއްޖޭގައި ހިންގުމަށް ހަމަޖެހިފައިވާ ހަރަކާތްތަކަށް އެ ޕްރޮގްރާމްގައި އިމާދު އަލިއަޅުއްވާލެއްވިއެވެ.
އެގޮތުން ދުވަހާއި ގުޅިގެން 3 ކަމެއް ކުރުމަށް ހަމަޖެހިފައިވާ ކަމަށް އިމާދު ވިދާޅުވިއެވެ. އޭގެ ތެރެއިން ފުރަތަމަ ކަމަކީ އެންޓި ޑްރަގް ޑޭގެ ރަސްމީ ޖަލްސާ ކަމަށާއި ރައީސުލްޖުމްހޫރިއްޔާ އިބްރާޙީމް މުހައްމަދު ޞާލިހު އެ ޖަލްސާ ޝަރަފުވެރިކޮށްދެއްވާނެ ކަމަށް އުންމީދުކުރައްވާ ކަމަށް އިމާދު ވިދާޅުވިއެވެ. އެ ޖަލްސާގައި އެންޑީއޭ ރީބްރޭންޑްކުރުމުގެ މަސައްކަތް ކުރިއަށް ގެންދިއުން ތާވަލްކޮށްފައިވާ ކަމަށާއި އެންޑީއޭގެ ދިރާސާތައް އާއްމު ކުރުން ވެސް އެ ޖަލްސާގައި އޮންނާނެ ކަމަށް އިމާދު ވިދާޅުވިއެވެ.
އެ ދުވަހުގެ ދެ ވަނަ ހަރަކާތެއްގެ ގޮތުން އެންޓި ޑްރަގް ޑޭއާ ގުޅޭ ޚާއްސަ ދުވުމެއް ކުރިއަށް ގެންދަން ނިންމަވާފައިވާ ކަމަށް އިމާދު ވިދާޅުވިއެވެ. އަދި އެ ދުވުން ކުރިއަށް ދާނީ އެންޑީއޭގެ ސެންޓަރުތައް ހުރި ހުރިހާ ރަށެއްގައި އެއް ފަހަރާ ކަމަށް އިމާދު ވިދާޅުވިއެވެ.
މީގެ އިތުރުން އާއްމުންނަށް ހިންގާ ހޭލުންތެރިކަމުގެ ޕްރޮގްރާމެއް އޯޕަން ޑޭއެއްގެ ގޮތުގައި ހުޅުމާލޭގައި ކުރިއަށްގެންދިއުމަށް ނިންމަވާފައިވާކަމަށް އިމާދު ވިދާޅުވިއެވެ.
އިމާދު ވިދާޅުވީ މި ހަރަކާތްތައް ޖޫން މަހުގެ ތެރޭގައި ކުރިއަށް ގެންދިއުމަށް މަސައްކަތް ކުރައްވާނެ ކަމަށާއި އެ މަސައްކަތްތައް ނުނިމޭނަމަ އޮގަސްޓުގެ ނިޔަލަށް އެންޓި ޑްރަގް ޑޭގެ ހަރަކާތްތައް ކުރިއަށް ދާނެ ކަމަށެވެ.
އެންޓި ޑްރަގްޑޭގެ މި އަހަރުގެ ޝިއާރަކީ ސްޓޮޕް ސްޓިގްމާ އެންޑް ޑިސްކްރިމިނޭޝަން ނުވަތަ ދަށްކުރުމާއި ތަފާތުކުރުން ނައްތާލުން މިއެވެ.
