ހެންވޭރުގެ ގެއެއްގައި މަރުވެފައި އޮތް މީހާއަކީ ކަރަންޓު ކޭބަލެއް ވަގަށް ނެގުމަށް އެގެއަށް ވަދެ އުޅުނު މީހެއް ކަމަށް ފުލުހުން ބުނެފިއެވެ.

ފުލުހުން ބުނީ ޖޫން މަހުގެ 30 ވަނަ ދުވަހު ހެންވޭރު ގެއެއްގެ ތެރޭގައި ޚަބަރު ހުސްވެފައި އޮއްވާ ފެނުނު މީހާއަކީ އެގެއިން ކަރަންޓު ކޭބަލެއް ވަގަށް ނެގުމަށް އެގެއަށް ވަދެ އުޅުނު މީހެއް ކަމަށާއި، އޭނާ މަރުވެފައިވަނީ ކަރަންޓު ކޭބަލް ބުރިކުރަން އުޅުމުގެ ތެރޭގައި ކަރަންޓުގައި ޖެހިގެން ކަމަށް ތަހުގީގަށް ބެލެވޭ ކަމަށެވެ.

ފުލުހުން ބުނީ މަރުވި މީހާގެ ހަށިގަނޑުން ކަރަންޓުގައި ޖެހިފައިހުރި ކަމުގެ ނިޝާންތައް ފެންނަން ހުރި ކަމަށެވެ. އަދި އޭނާ ބިން މައްޗަށް ވެއްޓިފައި އޮތްތަނުން، ވައްކަން ކުރަން ބޭނުންކުރާ އާލަތްތައް ފެނިފައިވާ ކަމަށް ފުލުހުން ބުނެއެވެ.

ހެންވޭރުގެ ގެއެއްގައި ޚަބަރު ހުސްވެފައި މީހަކު އޮތް ކަމުގެ ރިޕޯޓު ފުލުހުންނަށް ލިބިފައިވަނީ ޖޫން މަހުގެ 30 ވީ ހުކުރު ދުވަހު މެންދުރުފަހު 13:20ހާއިރުއެވެ. އެމީހާ އޭޑީކޭ ހޮސްޕިޓަލަށް ގެންދިޔައިރުވެސް މަރުވެފައިވާކަމަށް، އޭޑީކޭއިން މައުލޫމާތު ދީފައިވާ ކަމަށް ފުލުހުން ބުނެފައިވެއެވެ.

މަރުވެފައިވަނީ އުމުރުން 43 އަހަރުގެ ދިވެހި ފިރިހެނެކެވެ.