ލޯފަން ދެ މީހެއްގެ އާރުޓީއެލް ތަޖުރިބާ: ޚިދުމަތަށް 100 އިން 100!

ރާއްޖެ ދަތުރުފަތުރުގެ ނިޒާމުން ގުޅުވާލުމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އާ ގުޅިގެން ސަރުކާރުން ފެށި ރާއްޖެ ޓްރާންސްޕޯޓް ލިންކް (އާރުޓީއެލް) ޚިދުމަތަކީ ގިނަ ބައެއްގެ ތައުރީފު އަމާޒުވަމުން އަންނަ ޚިދުމަތެކެވެ. ސްޕީޑް ފެރީގެ ނިޒާމަކުން މިހާރު ޒޯން އެކެއް ކަމަށްވާ ހއ. ހދ. އަދި ށ. އަތޮޅު ގުޅާލާފައިވާއިރު މި ޚިދުމަތަކީ ނުކުޅެންދުންތެރިކަން ހުންނަ ފަރާތްތަކަށް ވެސް ފަސޭހަ ކަމާއެކު ދަތުރުކުރެވޭ ގޮތަށް ދެމުން އަންނަ ޚިދުމަތެވެ. މި ދަތުރުތައް ތަޖުރިބާކުރި ލޯފަން ދެ މީހެއްގެ ވާހަކަތަކުން ވެސް ހާމަވަނީ މި ޚިދުމަތުގެ ފެންވަރު ރަނގަޅު ކަމެވެ.

ރާއްޖެއަށް ފަޚުރުވެރި ވަނަތަކެއް ހޯދައިދީފައިވާ އެތުލީޓު މުޙައްމަދު މާޒިން އާއި ބްލައިންޑް އެންޑް ވިޝުއަލީ އިމްޕެއަރޑް ސޮސައިޓީ އޮފް މޯލްޑިވްސްގެ މީޑިއާ ކޮޑިނޭޓަރު އަބްދުﷲ ޒިޔާއު ސޯޝަލް މީޑިއާގައި ހިއްސާކޮށްފައިވާ ވީޑިއޯއެއްގައި އެ ދެ ފަރާތުން ވެސް ވަނީ މިހާތަނަށް އާރުޓީއެލްގައި ކުރެވުނު ދަތުރުތަކުގެ ތަޖުރިބާ ހިއްސާކޮށްފައެވެ. އެގޮތުން މި ޚިދުމަތަކީ ރައްޔިތުންނަށް ފަސޭހަ އަދި އިންގިލާބީ ބަދަލުތަކެއް ގެނުވައިދިން ފުރިހަމަ އަދި ހިތްގައިމު ޚިދުމަތެއް ގޮތުގައި ދެ މީހުން ވެސް ސިފަކުރެއެވެ.

ޒިޔާއު ބުނީ އާރުޓީއެލްގެ ސަބަބުން މިއަދު އިތުރު އެހީތެރިއަކާ ނުލައި ބޭނުންވާ މަންޒިލަށް ދަތުރު ކުރުމުގެ ފުރުސަތު ފަހިވެފައިވާ ކަމަށެވެ. އެގޮތުން، މި ދަތުރުތަކުގައި އާރުޓީއެލްގެ ކްރޫއިންގެ އެހީތެރިކަން ލިބޭނެ ކަމުގެ ޔަގީންކަން ލިބިފައިވާކަން ވެސް އޭނާ ފާހަގަކުރިއެވެ. އަދި މި ޚިދުމަތުގައި ބޭނުންކުރާ ލޯންޗުތަކަކީ ނުކުޅެދުންތެރިކަން ހުންނަ ފަރާތްތަކަށް ވަރަށް ބޮޑު ސަމާލުކަމެއް ދީގެން ފަރުމާކޮށްފައިވާ ލޯންޗުތަކެއް ކަމަށާއި އޭގެ ތެރޭގައި އުޅެން އެހާމެ ފަސޭހަ ކަން ވެސް އޭނާ ފާހަގަކުރިއެވެ.

އާރުޓިއެލްގެ ތަޖުރިބާއާ ގުޅޭގޮތުން މާޒިން ބުނީ ގޮނޑީގައި އިށީނުމުގައި އެހީތެރިވުމަށްފަހު ނޫނީ ކްރޫއިން ދުރަށް ނުދާ ކަމަށެވެ. އެއީ ރަށްކާތެރިކަމާއި ހިމާޔަތްރެރިކަން ކަށަވަރު ކުރެވޭ ކަމެއް ކަމަށް ވެސް އޭނާ ފާހަގަކުރިއެވެ. އަދި އެ ލޯންޗުތަކުގައި ހުންނަ ފާހާނާއަކީ ވެސް ނުކުޅެދުންތެރިކަން ހުންނަ ފަރާތްތަކަށް އެއްވެސް ދަތިކަމެއް ނެތި ބޭނުންކުރެވޭ ގޮތަށް ހަދާފައިވާ ފާހާނާއެއް ކަން ވެސް އޭނާ ފާހަގަކުރިއެވެ.

ލޯންޗަށް އެރުވުމާއި ގޮނޑިއާ ހަމައަށް ގެންދިއުމުގެ އިތުރުން ވެސް ދަތުރުމަތީގައި އެހީތެރިކަމެއް ބޭނުންވެއްޖެ ހާލަތެއްގައި އާރުޓީއެލްގެ ކްރޫއިން ތައްޔާރަށް ތިބޭކަން ފާހަގަކުރެއެވެ.

ޚިދުމަތްތައް ފޯރުކޮށްދިނުމުގައި އަބަދުވެސް ރަނގަޅު ކުރެވޭނެ ކަންކަން ހުންނާނެކަން ފާހަގަކޮށް ޒިޔާއު ބުނީ އެއް މަންޒިލުން ނައްޓާލަމުން ދެން ދާ މަންޒިލެއް ބުނެދިނުމަކީ އޭނާ ފަދަ ލޯފަން މީހުންނަށް ލިބިގެންދާނެ ވަރަށް ބޮޑު ފަސޭހައަކަށް ކަމަށެވެ.

އާރުޓީއެލްގައި މިހާތަނަށް ކުރި ދަތުރުތަކުގެ ތަޖުރިބާއިން މާޒިން އާއި ޒިޔާއު ވެސް އެ ޚިދުމަތައް ދެނީ 100 އަކުން 100 މާކްސް އެވެ.

އާރުޓީއެލް ސްޕީޑް ފެރީގެ ޙިދުމަތް ރާއްޖޭގެ ހަ ޒޯނުގައި ފެށިގެން ދާއިރު، ޒަމާނީ ފެރީގެ ޙިދުމަތް ދޭ 82 އުޅަނދެއް އޮންނާނެއެވެ. އަދި 188 ފެރީ ޓާމިނަލާއި އުޅަނދުތަކަށް ޙިދުމަތް ދޭނެ ބޯޓުޔާރޑު ރާއްޖޭގެ ތިން ސަރަޙައްދެއްގައި ޤާއިމުކުރާނެއެވެ.

މުޅި ރާއްޖެ ކަނޑުމަގުން ގުޅާލެވޭ ރާއްޖެ ޓްރާންސްޕޯޓް ލިންކް (އާރުޓީއެލް) ހައި ސްޕީޑް ފެރީ ޚިދުމަތަކީ ރައީސުލްޖުމްހޫރިއްޔާ އިބްރާޙީމް މުޙައްމަދު ޞާލިހުގެ ވަޢުދުފުޅެކެވެ.