ހުރިހާ ކުދިން ޝާމިލުކޮށްގެން ކިޔަވައިދިނުމުގެ ސިޔާސަތު ވަރަށް ކާމިޔާބު: އެޑިޔުކޭޝަން މިނިސްޓްރީ
ސްކޫލުތަކުގައި ސެން ޔުނިޓްތައް ގާއިމްކުރެވި ކުދިންނަށް އެހީތެރިކަން ފޯރުކޮށްދެވޭނެ
ކ. އަތޮޅު މަދަރުސާގެ ދަރިވަރުން
ހުރިހާ ކުދިން ޝާމިލުކޮށްގެން ކިޔަވައިދިނުމުގެ ސިޔާސަތު ވަރަށް ކާމިޔާބު ކަމަށާއި، ކުރިއަށް އޮތްތަނުގައި މިސިޔާސަތު އިތުރަށް ހަރުދަނާވެ، ފުޅާވާނެ ކަމަށް އެޑިޔުކޭޝަން މިނިސްޓްރީން ބުނެފިއެވެ.
ރާއްޖެޓީވީގައި ވާހަކަދައްކަވަމުން އެޑިއުކޭޝަން މިނިސްޓްރީގެ ޑެޕިއުޓީ މިނިސްޓަރު މުހައްމަދު އިހުސާން ވިދާޅުވީ ހުރިހާ ކުދިން ޝާމިލުކުރުމުގެ ސިޔާސަތާއި، ކުދިން ބާކީ ނުކުރުމުގެ ސިޔާސަތަކީ މުޅިން ތަފާތު ދެ ސިޔާސަތެއް ކަމަށެވެ. ރާއްޖޭގެ ސްކޫލުތަކުގައި މި ދެ ސިޔާސަތު ވެސް ތަންފީޒު ކުރުމުގެ މަސައްކަތްތައް ކުރިއަށްދާއިރު، މިދިޔަ ދިރާސީ އަހަރުގައި ކާމިޔާބު ގިނަ މަސައްކަތްތަކެއް ކުރެވިފައިވާ ކަމަށް އިހުސާން ވިދާޅުވިއެވެ.
ހުރިހާ ކުދިން ޝާމިލުކުރުމުގެ ސިޔާސަތަށް އިޝާރާތް ކުރައްވައި އިހުސާން ވިދާޅުވީ ސްކޫލުތަކުގައި ހިންގާ ހުރިހާ ޕްރޮގްރާމެއްގައި ދަރިވަރުން ޝާމިލުވާން ޖެހޭ ކަމަށާއި، ކުލާސް ރޫމްގައި ތިބޭ ހުރިހާ ކުދިންނަށް ވެސް އަސާސީ ބައި ފޯރުކޮށްދެވި، އެކުދިންނަށް ބައިވެރިވުމުގެ ފުރުސަތު ލިބެންޖެހޭ ކަމަށެވެ. އަދި ސްކޫލުތަކުގައި ސެން ޔުނިޓްތައް ގާއިމްކުރެވި ކުދިންނަށް އެހީތެރިކަން ފޯރުކޮށްދެމުންދާ ކަމަށް އިހުސާން ވިދާޅުވިއެވެ.
އިހުސާން ވިދާޅުވީ މިސިޔާސަތަކީ ވަރަށް ފުޅާ ސިޔާސަތެއް ކަމަށާއި، ކުރިއަށް އޮތްތަނުގައި އިތުރަށް މިސިޔާސަތު ހަރުދަނާ ކުރެވިގެންދާނެ ކަމަށެވެ. އަދި ވިދާޅުވީ މި ނިމިގެން ދިޔަ ދިރާސީ އަހަރަކީ ވެސް ކާމިޔާބު ގިނަ މަސައްކަތްތަކެއް ކުރެވުނު އަހަރެއް ކަމަށާއި، މިސިޔާސަތު ތަންފީޒު ކުރުމުގައި ސްކޫލުތަކުގެ ފުރިހަމަ އެއްބާރުލުން ލިބޭ ކަމަށެވެ. މިއީ ގިނަ ޓެކްނިކަލް ކަންކަން ހިމެނޭ ސިޔާސަތަކަށް ވާތީ އެންމެންގެ އެއްބާރުލުން ބޭނުންވާކަން އިހުސާން ފާހަގަކުރެއްވިއެވެ.
އެއްވެސް ކުއްޖެއް ބާކީ ނުކުރުމުގެ ސިޔާސަތަށް އިޝާރާތްކުރައްވައި މިނިސްޓްރީ އޮފް އެޑިޔުކޭޝަންގެ ޕަރމަނަންޓް ސެކްރެޓަރީ އަހްމަދު އަލީ ވިދާޅުވީ ހުރިހާ ދަރިވަރުންނަށް ހަމަހަމަ ގޮތެއްގައި ތައުލީމް އުނގެނުމުގެ ފުރުސަތު ފަހިކޮށްދީފައިވާ ކަމަށެވެ. މީގެ ތެރޭގައި ވަކިން ޚާއްސަކޮށް ޚާއްސަ އެހީތެރިކަން ބޭނުންވާ ދަރިވަރުންނަށް ސަމާލުކަންދޭ ކަމަށް އޭނާ ވިދާޅުވިއެވެ.
އަހްމަދު އަލީ ވިދާޅުވީ ރާއްޖޭގެ ހުރިހާ ސްކޫލެއްގައި މި ސިޔާސަތުތައް ތަންފީޒު ކުރުމުގެ މަސައްކަތްތައް ކުރިއަށްދާއިރު، ނަތީޖާ ވަރަށް ރަނގަޅު ކަމަށެވެ. މިމަސައްކަތް ކުރުމަށް ރަށު ފެންވަރުގައި ވެސް އެހީތެރިކަން ލިބެމުންދާކަމަށް އޭނާ ވިދާޅުވިއެވެ.
