މިދިޔަ އަހަރު ބްރެޒިލްގައި ބޭއްވި އިންތިޚާބުގައި ވޯޓު އޮޅުވާލިކަމަށް އޭރު ބްރެޒިލްގެ ރައީސް އަކަށް ހުންނެވި ޖެއިރް ބޮލްސޮނާރޯ ތުހުމަތު ކުރެއްވި މައްސަލަ އެގައުމުގެ ފެޑެރަލް އިލެކްޓޯރަލް ކޯޓުން ބެލުމަށްފަހު ބޮލްސޮނާރޯގެ ސިޔާސީ ހަޔާތުގެ ކުރިމަގާމެދު ސުވާލު އުފެދޭފަދަ ނިންމުނެއް ނިންމައިފިއެވެ.
އެމައްސަލައިގައި ފެޑެރަލް އިލެކްޓޯރަލް ކޯޓުން ނިންމާފައިވަނީ ކަނާތު ފިޔައިގެ ކުރީގެ ރައީސަށް 2030 ވަނަ އަހަރާ ހަމަޔަށް އެއްވެސް އިންތިޚާބެއްގައި ބައިވެރި ނުވެވޭނެކަމަށެވެ. ކޯޓުގެ ހަތް ޖަޖުންގެ ތެރެއިން ފަސް ޖަޖުން ނިންމާފައިވަނީ 2022 ވަނަ އަހަރުގެ ޖުލައި މަހު ބޮލްސޮނާރޯ ބާރުގެ ބޭނުން ނަހަމަ ގޮތުގައި ހިއްޕަވާ މީޑިޔާގެ ބޭނުންވެސް އެމޭރެމުން ހިއްޕަވާ އިންތިޚާބުގެ ކުރިން ބްރެޒިލްގެ އިލެކްޓޯރަލް ވޯޓިންގ ސިސްޓަމްގައި ނެތް މައްސަލަތަކެއް ހުރިކަމަށް ދައްކަވަން އެމްބެސެޑަރުން ހާޒިރުކޮށް މަސައްކަތް ކުރެއްވިކަމަށެވެ.
މިނިންމުމާއެކު ބޮލްސޮނާރޯ އަށް 2026 ވަނަ އަހަރު އެގައުމުގައި އޮންނަ ރިޔާސީ އިންތިޚާބުގައި ވާދަކުރެއްވުމުގެ ފުރުސަތު ގެއްލިގެންދިޔައީއެވެ. އިންތިޚާބުގައި މިހާރުގެ ރައީސް ލޫލާ ޑަ ސިލްވާ އާ ވާދަކުރައްވާ ކުރިމަތިވެވަޑައިގެންނެވި ނާކާމިޔާބީއަށް ފަހު ބްރެޒިލްގައި ހަމަނުޖެހުން އުފެއްދެވުމަށް މަސައްކަތްކުރައްވާ މިއަހަރުގެ ޖެނުއަރީ މަހުގެ 8 ވަނަ ދުވަހު ބްރެޒިލްގައި ހިނގާ ދިޔަ ބޮޑު ހަމަނުޖެހުމުގެ ޒިންމާ ބޮލްސޮނާރޯ ނަންގަވަންޖެހޭނެކަމަށް ބްރެޒިލްގެ ގިނަ ބަޔަކު ދެކެއެވެ.
ކޯޓުގެ މިނިންމުމާއެކު ލޫލާގެ އެންމެ ބޮޑު އިދިކޮޅު ކެންޑިޑޭޓުގެ ސިޔާސީ ކުރިމަގާމެދު ބޮޑެތި ސުވާލުތަކެއް ކުރިމަތިވެފައިވާއިރު ލޫލާގެ ޓީމުން ވަނީ މިކަމުގެ އުފާފާޅުކޮށްފައެވެ.
ބޮލްސޮނާރޯ ވަނީ އެފަދަ ކަމެއް ކުރެއްވިކަމަށް ދެކޮޅު ހައްދަވާފައެވެ. އަދި ބޮލްސޮނާރޯގެ ވަކީލުން ވަނީ ސުޕްރީމް ކޯޓުގައި މިމައްސަލަ އިސްތިއުނާފްކުރާނެކަމަށް ބުނެފައެވެ. ނަމަވެސް މިމައްސަލަ ސްޕްރީމް ކޯޓުން ބޮލްސޮނާރޯއަށް ކާމިޔާބުވާނެކަމަކަށް ނުބެލެވެއެވެ.
ބޮލްސޮނާރޯ ވިދާޅުވީ މިއީ ބުރަކައްޓަށް ހަންޖަރެއް ހަރާލުންފަދަ ކަމެއްކަމަށެވެ. އަދި ބްރެޒިލްގެ ކަނާތު ފިޔައިގެ ސިޔާސީ މަސައްކަތްތައް ކުރިއެރުވުމަށް މަސައްކަތްކުރައްވާނެކަމަށް ވިދާޅުވިއެވެ.
އިލެކްޓޯރަލް ކޯޓުގެ މިނިންމުމާއެކު އަދި ބޮލްސޮނާރޯ އަށް ހިންދެމިލެއްވޭކަށްނެތެވެ. އެއީ ބޮލްސޮނާރޯގެ މައްޗަށް އުފުލާފައިވާ ގިނަ ދައުވާތަކުގެ ސަބަބުންނެވެ. އެދައުވާތައް ސާބިތުވެއްޖެނަމަ ޖަލު ހުކުމް ވެސް އަންނާނެއެވެ.
