އައްޑޫ ސިޓީ ހުޅުދޫ - މީދޫގައި ބޭއްވި ޕެރޭޑަށް ބޮޑު ތަރުހީބެއް

މި އަހަރުގެ އަޟްޙާ އީދުގެ މުނާސަބަތުގައި އެމްއެންޑީއެފުން އައްޑޫ ސިޓީ ހުޅުދޫ - މީދޫގައި ޕެރޭޑް ބާއްވައިފިއެވެ.

ހުކުރު ދުވަހު ކުރިއަށް ގެންދިޔަ މި ޕެރޭޑް ބަލާލުމަށް ގިނަ އަދަދެއްގެ އާއްމުން އެއްވިއެވެ. މި ޕެރޭޑަށް އެ ރަށްތަކުގެ ރައްޔިތުންނާއި ކުޑަކުދިންގެ ފަރާތުން ބޮޑު ތަރުހީބެއް ލިބިފައިވާ ކަމަށް އެމްއެންޑީއެފުން ބުނެއެވެ.

Advertisement

ހަވީރު 16:00 ގައި ހުޅުދޫ އޮފީސް މަގާއި ބޮޑުމަގު ގުޅޭ ކަންމަތިން ފެށި ޕެރޭޑް ނިންމާލާފައިވަނީ ކޯގަންނު ގަބުރުސްތާނު ކުރިމައްޗަށެވެ.

ހުކުރު ދުވަހު ހުޅުދޫ-މީދޫގައި ޕެރޭޑް ބާއްވާފައިވާއިރު، ހިތަދޫ، މަރަދޫ، މަރަދޫފޭދޫ އަދި ފޭދޫގައި ވެސް ވަނީ ޕެރޭޑް ބާއްވާފައެވެ.

ޖުލައި 01 ވަނަ ދުވަހު އެމްއެންޑީއެފުން ބޭއްވުމަށް ހަމަޖެހިފައިވާ ހަތަރުވަނަ ޕެރޭޑް އޮންނާނީ ޏ. ފުވައްމުލަކުގައި، އެ ދުވަހުގެ ހަވީރު 16:00ގައެވެ.

އައްޑޫ ސިޓީގެ ރަށްތަކާއި ފުވައްމުލަކުގައި ކުރިއަށްގެންދާ ޕެރޭޑުގައި ދިވެހި އަސްކަރިއްޔާގެ ސިފައިންގެ އިތުރުން އައްޑޫ ސިޓީ ސްކޫލުތަކުގެ ކޭޑޭޓުން ވެސް ބައިވެރިވެއެވެ. ފުވައްމުލަކުގައި ކުރިއަށްގެންދާ ޕެރޭޑުގައި ފުވައްމުލަކު ސްކޫލުތަކުގެ ކެޑޭޓުންވެސް ބައިވެރިވާގޮތަށް ވަނީ ހަމަޖެހިފައެވެ.

މީގެ އިތުރުން މި ދެ ސިޓީގައި ޕެރޭޑް ކުރިއަށްދާ ވަގުތުތަކުގައި އެމްއެންޑީއެފް އާޓްސް އެންޑް ސެރެމޯނިއަލް ސަރވިސްގެ މިލިޓަރީ ބޭންޑުގައި ރާގު ކުޅެއެވެ.