ހުވަދުއަތޮޅުގައި އާރްޓީއެލްގެ ޚިދުމަތް ޖުލައި މަސްތެރޭގައި ފެށުމަށް ދަނީ މަސައްކަތް ކުރަމުން: އާޒިމް
ދޭން ޖެހޭ ހުރިހާ މައުލޫމާތެއް ރައްޔިތުންނަށް ފޯރުކޮށްދީފައިވޭ
އެމްޓީސީސީގެ ސީއީއޯ އާދަމް އާޒިމް
ދެކުނުގެ އެންމެ ބޮޑު އަތޮޅުކަމަށްވާ ހުވަދުއަތޮޅުގައި އާރްޓީއެލްގެ ޚިދުމަތް ޖުލައި މަސްތެރޭގައި ފެށުމަށް މަސައްކަތް ކުރަމުންދާ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)އާ ސީއީއޯ އާދަމް އާޒިމް ވިދާޅުވެއްޖެއެވެ.
ރާއްޖެޓީވީގައި ވާހަކަދައްކަވަމުން އާޒިމް ވިދާޅުވީ އާރްޓީއެލްގެ ޚިދުމަތަކީ ރައީސުލްޖުމްހޫރިއްޔާ އިބްރާހީމް މުހައްމަދު ސާލިހުގެ ޚާއްސަ އިސްނެންގެވުމެއްގެ ދަށުން ރާއްޖޭގައި ހިންގަމުންދާ ވަރަށް މުހިންމު މަޝްރޫއެއް ކަމަށެވެ. މި މަޝްރޫއަކީ މުޅި ރާއްޖެ ބްރިޖަކުން ގުޅާލުން ފަދަ މަޝްރޫއެއް ކަމަށް އާޒިމް ވިދާޅުވިއެވެ.
އާޒިމް ވިދާޅުވީ ހއ. ހދ. ށ އަދި ޅ. އަތޮޅުގައި އާރްޓީއެލްގެ ޚިދުމަތް ފެށިފައިވާ ކަމަށާއި، މިހާރު މަސައްކަތް ކުރަމުންދަނީ ދެކުނުގެ ހުވަދުއަތޮޅުގައި މި ޚިދުމަތް ފެށުމަށް ކަމަށެވެ. އާޒިމް ވިދާޅުވީ އެމްޓީސީސީގެ ޓީމް ދެ ފަހަރު އެއަތޮޅަށް ދަތުރުކޮށްފައިވާ ކަމަށާއި، ދޭން ޖެހޭ ހުރިހާ މައުލޫމާތެއް ރައްޔިތުންނަށް ފޯރުކޮށްދީފައިވާ ކަމަށެވެ. އެގޮތުން އެޕްލިކޭޝަނުން ބުކް ކުރާނެ ގޮތާއި، ރޫޓްތައް ހުންނާނެ ގޮތަށް ކިޔައިދީ މައުލޫމާތު ހިއްސާކޮށްފައިވާކަން އާޒިމް ފާހަގަކުރެއްވިއެވެ.
އާޒިމް ވިދާޅުވީ މިސަރުކާރުގައި ތަރައްގީގެ މަސައްކަތްތައް ކުރަމުންދަނީ ރައްޔިތުންގެ ހިޔާލު ހޯދައި، ރައްޔިތުން އެދޭ ގޮތަށް ކަމަށެވެ. ނަމަވެސް މީގެކުރީގެ ސަރުކާރުތަކުގައި އެގޮތަށް މަސައްކަތް ނުކުރާކަން އޭނާ ފާހަގަކުރެއްވިއެވެ. އަދި ވިދާޅުވީ އޭރު ތަރައްގީގެ މަޝްރޫއުތައް ކުރިއަށް ގެންދާނީ އޭރުގެ ސަރުކާރަކުން ބޭނުންވާ ގޮތަށް ކަމަށާއި، ރައްޔިތުން ނުރުހޭނަމަ އެ މަޝްރޫއު ޖެހޭނީ ދޫކޮށްލަން ކަމަށެވެ.
އާޒިމް ވިދާޅުވީ އަމާޒަކީ 2024 ވަނަ އަހަރު ނިމެންވާއިރު، މުޅި ރާއްޖެ އާރްޓީއެލްގެ ނިޒާމަކުން ގުޅާލުން ކަމަށެވެ. އެމްޓީސީސީއަށް މިއަދު ރައްޔިތުން އިތުބާރު ކުރާ ކަމަށާއި، ވަކި ތާރީހަކަށް ނިންމަން ކަނޑައަޅާފައިވާ މަޝްރޫއުތައް އެތާރީހަކަށް ނިންމާ ރައްޔިތުންނަށް ޚިދުމަތްދޭ ކަމަށް އާޒިމް ވިދާޅުވިއެވެ. އަދި ވިދާޅުވީ ކާރިސާއަކާ ގުޅިގެން ނުވަތަ މޫސުން ތަންނުދިނުމުގެ ސަބަބުން ބައެއް ހާލަތެއްގައި މަޝްރޫއުތަކަށް ލަސްތަކެއް ކުރިމަތިވި ނަމަވެސް މަސައްކަތްތައް ކުރިއަށް ގެންދަނީ ރައްޔިތުންނާއި ގުޅިގެން ކަމަށެވެ.
ފެރީގެ ޚިދުމަތް ރަނގަޅުކޮށް މުޅި ރާއްޖެ އެއް ވިއުގައަކުން ގުޅާލުމަކީ ރައީސް އިބްރާޙީމް މުހައްމަދު ޞާލިހުގެ ވައުދުފުޅެކެވެ. އެގޮތުން އާރްޓީއެލް ފެރީގެ ޚިދުމަތާއެކު ރާއްޖޭގެ ދަތުރުފަތުގެ ނިޒާމަށް އިންގިލާބީ ބޮޑު ބަދަލެއް އަންނާނެ ކަމެއް ކަމަށް ޕްލޭނިން މިނިސްޓްރީން ވަނީ މީގެ ކުރިން ބުނެފައެވެ. އެއީ ރާއްޖެ އިގްތިޞާދީ ގޮތުން ފުޅާކޮށް ކުރިއަރުވާ ރާއްޖެ ގުޅާލުމަށް ލިބޭ ބާރެއް ކަަމަށް ވެސް އެ މިނިސްޓްރީން ވަނީ ބުނެފައެވެ.
