ޔުވެންޓަސްގެ ކުރީގެ ކޯޗު އަންދްރެއާ ޕިރްލޯ ދެ އަހަރުގެ އެއްބަސްވުމެއްގެ ދަށުން ސަމްޕްޑޯރިއާގެ ކޯޗަކަށް ހަމަޖައްސައިފިއެވެ.

އުމުރުން 44 އަހަރުގެ ޕިރްލޯ 2020-21 ގެ ސީޒަނުގައި ޔުވެންޓަސްއާ ހަވާލުވެ، ކޮޕާ އިޓާލިއާ އަދި އިޓާލިއަން ސުޕަ ކަޕް ކާމިޔާބުކުރިއެވެ. ނަމަވެސް ލީގުގެ ހަތަރު ވަނަ ލިބުމުން އޭނާ މަގާމުން ވަކިކުރިއެވެ. އޭނާ އެންމެ ފަހުން ހުރީ ތުރުކީ ސުޕަ ލީގުގެ ފާތިހު ކަރަގުމްރުކް ގައެވެ. ތާވަލުގެ ހަތް ވަނައިގައި ނިމުމުން މިދިޔަ މެއި މަހު އޭނާ ވަނީ ޓީމު ދޫކޮށްލާފައެވެ.

ސަމްޕްޑޯރިއާ ވަނީ މިދިޔަ ސީޒަނުގައި ރެލިގޭޓް ވެފައެވެ. އޮކްޓޯބަރު މަހު އެ ޓީމާ ހަވާލުވީ އިންޓަ މިލާންގެ ކުރީގެ މިޑްފީލްޑަރު ޑީޖާން ސްޓޭންކޮވިޗެވެ. މިއީ 2011 ވަނަ އަހަރުގެ ފަހުން ސަމްޕްޑޯރިއާ ރެލިގޭޓްވި ފުރަތަމަ ފަހަރެވެ.

ކުޅުންތެރިއެއްގެ ގޮތުގައި ހުރެ ޕިރްލޯ ވަނީ އިޓަލީ އާއެކު 2006 ވަނަ އަހަރުގެ ވޯލްޑް ކަޕް ކާމިޔާބުކޮށްފައެވެ. ޔުވެންޓަސް އާއި އޭސީ މިލާންގެ ކުރީގެ މިޑްފީލްޑަރު ރިޓަޔާކުރީ 2017 ވަނަ އަހަރުގެ ތެރޭގައެވެ. އޭނާ ވަނީ ދެ ޗެމްޕިއަންސް ލީގާއި ހަ ލީގު ތަށި ހިމެނޭހެން ގިނަ ތަށިތަކެއް ކާމިޔާބުކޮށްފައެވެ.

2020 ވަނަ އަހަރު ޔުވެންޓަސްގެ ސީނިއާ ޓީމާ ހަވާލުވުމުގެ ކުރިން އޭނާ ހަވާލުވީ 23 އަހަރުން ދަށުގެ ޓީމާއެވެ. ނަމަވެސް އޭގެ ހަފްތާއެއް ފަހުން މައުރީޒިއޯ ސާރީ މަގާމުން ވަކިކުރުމާ ގުޅިގެން ޕިރްލޯ ވަނީ ސީނިއާ ޓީމުގެ ކޯޗަށް ބަދަލުކޮށްފައެވެ.