ހުޅަނގު އައްސޭރިއަށް، ހޫނު މޫސުމުގެ ދުވަސްވަރެވެ. ޖެހެމުންދާ ވައިރޯޅިން ހިތާއި ބަނޑުވެސް ފުރިދާ ކަހަލައެވެ. އެއްތަނަކަށް ޖަމާވެ ތިބި ފަލަސްޠީނުގެ އަންހެންވެރިން އަވަދިނެތި އުޅެމުން އެދަނީ އަޟްޙާ ޢީދަށް ބިސްކޯދު ފިހުމުގެ މައްސަކަތުގައެވެ. ކަދުރު އަޅައިގެން ތައްޔާރުކުރާ މި ޚާއްޞަ ބިސްކޯދަށް ޢަރަބި ދުނިޔޭގައި ކިޔާ އުޅެނީ 'މާމޫލް'އެވެ. ދުވަމުން އެދަނީ މާމޫލް ފިހާ މީރުވަހެވެ.
މާ ދުރު ނޫން ހިސާބެއްގައި އަތްމަތި ބުރައްކޮށްލައިގެން އެ އުޅެނީ އަހުމަދު އިދުރީހެވެ. އެއީ ވަޑިއެކެވެ. އޭނާގެ މަސައްކަތަކީ، އުފާ ފާޅު ކުރުމުގެ މި ދުވަސްވަރަށް ޚާއްސަ މާމޫލް ބިސްކޯދު އެކި ފަރުމާތަކަށް ތައްޔާރު ކުރަން ބޭނުން ކުރާ ތައްގަނޑުތައް ހެދުމެވެ.
އިދުރީހަކީ ޒުވާން ވަޑިއެކެވެ. ޒަމާނީ މެޝީނަރީތައް ބޭނުން ކުރުމުގެ ބަދަލުގައި، އަމިއްލަ އަތުން ލަކުޑީގެ އެކި ކަހަލަ ސާމާނުތައް އުފެއްދުމަށް އޭނާ ލޯބި ކުރެއެވެ. ހުޅަނގު އައްސޭރީގެ ސިޓީއެއް ކަމަށް ވާ ހިބްރޫންގައި މި މަސައްކަތް ކުރިއަށް ގެންދިއުމަށް އިދުރީސް ނިންމީ މީގެ އެތައް އަހަރެއް ކުރިންނެވެ. އޭނާގެ ކާފަގެ ފަހަތުންނެވެ.
އަހަރެން މިކަން ކުރާތާ މިހާރު 15 އަހަރު މި ވީ. ލަކުޑީގެ އަތްތެރި މަސައްކަތްތައް ކޮށް، ލަކުޑިން އެކި ކަހަލަ ތައްގަނޑުތައް ހަދަން ފެށި އިރު އަހަރެންގެ ޢުމުރުން ވާނީ 15 އަހަރު. ލަކުޑިން ތައްގަނޑުތައް ހެދުމަކީ ޢާއިލީ ވިޔަފާރިއެއް. މީ އަހަރެންގެ ކާފަ، ކާފަގެ ޢުމުރުން ވަރަށް ޒުވާން އިރު ފެށި މަސައްކަތެއް. ކާފަ އޮތީ ކާފަގެ އުފަން ދަރިންނަށް މިކަން ދަސްކޮށްދީފަ. އަހަރެންގެ ބޮޑު ބޭބެއިންނަށް ދަސްކޮށްދީފަ. ޢާއިލާގެ 3 ވަނަ ޖީލުގަ މި ހިމެނެނީ އަހަރަމެން. އަހަރަމެންނަށްވެސް ދަސްކޮށްދީފަ. އަހަރަމެން މީ ކާފަ ދަރިންއަހުމަދު އިދުރީސް؛ ފަލަސްޠީނުގެ ވަޑިއެއް
އިދުރީސްގެ ކަވި މަސައްކަތްތެރިކަން ފެނިގެން އެކި އުފެއްދުންތައް ގަންނަން ލިބެއެވެ. ފަލަސްޠީނުގެ އިތުރުން، ބޭރުގެ އެކި އެކި ޤައުމުތަކަށްވެސް އޭނާގެ އުފެއްދުންތައް ވިއްކައެވެ. މިކަމަށް ޚާއްޞަކޮށްގެން، "ޒާޓަރ"ގެ ނަމުގައި އިދުރީސް ދަނީ އިންސްޓަގްރާމްގައި އެކައުންޓެއްވެސް ހިންގަމުންނެވެ.
މިއަދު އަހަރަމެން މަސައްކަތް ކުރަމުން މިދަނީ ކަސްޓަމް އޯޑަރަށް ލިބިފަ ހުރި ތައްގަނޑުތަކެއް ނިންމަން. މިކަހަލަ އުފެއްދުންތަކުގެ އަގުވެސް ބޮޑު. މި ގަންނަ މީހާގެ ނަންވެސް ޕްރިންޓް ކޮށްދެން ތައްގަނޑަށް. ލަކުޑި ތައްގަނޑުތަކާއި ލޭޒަރ ބޭނުންކޮށްގެން، އަހަރަމެން މި ދަނީ ތަރިކައާއި ޘަޤާފަތާއި ޓެކްނޮލޮޖީ ގުޅާލަމުން، މި އުފެއްދުން ހުށަހަޅަމުން.އަހުމަދު އިދުރީސް؛ ފަލަސްޠީނުގެ ވަޑިއެއް
ޢަރަބި ޘަޤާފަތުގެ ތެރޭގައި ހިމެނޭ މާމޫލް ބިސްކޯދު ތައްޔާރު ކުރަނީ ސެމޮލީނާ ނުވަތަ ރަވާ ފުށާއި ގީ (ގިތެޔޮ) އެއްކޮށްގެންނެވެ. ފުށްގަނޑު ތައްޔާރު ކުރުމަށްޓަކާ ބިސްކޯދު އެކުލެއްވުމުގެ ގޮތުން ތަތް މާއްދާއަކާއި ރަހަ މީރު ކުރަން ބޭނުން ކުރާ ހަވާދުގެ އެހެނިހެން ބާވަތްތައްވެސް އަޅައެވެ. ފުށްގަނޑު ތައްޔާރު ކޮށް ނިމުމުން، ބިސްކޯދު ތައްގަނޑުން ކަނޑާ ނިންމާލާއިރު، އޭގެ ތެރެއަށް ކަދުރާއި ވޯލްނަޓް އަދި ޕިސްޓާޝިއޯވެސް އަޅައެވެ.
ހިބްރޫންގައި ހިންގާ 'ބައިޢަތު އަލް ސާދާ'އަށް ގިނަ ޢަދަދެއްގެ އަންހެނުން ޖަމާވެ، އުފާވެރި ވަޤުތުތަކެއް ހޭދަ ކުރަމުން އެ ދަނީ، އެތައް ސަތޭކަ ކިލޯއެއްގެ މާމޫލް ތައްޔާރު ކުރުމުގެ މަޖަލުގެ ތެރޭގައެވެ. އެއީ ޢީދުގެ އުފާވެރި މުނާސަބަތާ ދިމާކޮށް، ފިހާރަތަކުގައި ވިއްކުމަށެވެ. ނުވަތަ ވަކިވަކި ފަރުދުންނަށް ވިއްކުމަށެވެ.
އަހަރަމެންގެ މާމަކާފަމެންނަށް އެނގިފަ އޮތް ހަމަ އެކަނި އެއްޗަކީ ލަކުޑި ތައްގަނޑު. ދަގަނޑު ނޫނީ ޕްލާސްޓިކް ތައްގަނޑު ހުންނަކަމެއް އެމީހުންނަކަށް ނޭނގޭ. އެކި ގޮތް ގޮތަށް ލަކުޑި ކޮށާ، މަށައިގެން ވަރަށް ހިތްގައިމު ތައްގަނޑުތައް އެމީހުން ހަދާ. މިއަދާ ޖެހުނުއިރުވެސް އެމީހުން އެ ބޭނުން ކުރޭ. އެއީ ދަގަނޑާއި ޕްލާސްޓިކު ތައްގަނޑުތަކަށް ވުރެ އެ މާ ރަނގަޅުވީމަ. ހަށިގަނޑަށް ނުރައްކަލެއް ކުރިމަތި ކުރުވާފާނެ ނުރައްކާތެރި މާއްދާތަކެއްވެސް ލަކުޑި ތައްގަނޑުގައެއް ނުހުރޭ. މުޅިންވެސް ޤުދުރަތީ ސާމާނު އޭގަ ހުންނާނީ.އުއްމު އިމްރާން ބަދުރު؛ ހިލޭ ސާބަހަށް މަސައްކަތް ކުރާ މެންބަރެއް
މާމޫލް ތައްޔާރު ކުރުމަށްޓަކާ، ޢީދު ޗުއްޓީގެ ކުރިން ޢާއިލާގެ މެންބަރުން އެއްތަންވެ، މަސައްކަތް ފަށައެވެ. ކުދިބޮޑު އެންމެންނާއި އަވަށްޓެރިންވެސް ބައިވެރި ކުރެއެވެ. އުފާވެރި ޢީދެއްގެ ހަނދާންތައް ފުރިހަމަ ވެގެން ދަނީ މާމޫލް ތައްޔާރު ކުރުމުގެ މަސައްކަތާވެސް އެކުގައެވެ.
އަޟްޙާ ޢީދަކީ މުސްލިމުން އުފާ ފާޅުކުރުމަށް ކަނޑައަޅުއްވާފައިވާ 2 ދުވަހުގެ ތެރެއިން އެއް ދުވަހެވެ. އެމީހަކަށް ވީ އެންމެ ފުރިހަމަ އަކަށް ޢީދުގެ އުފަލުގައި ބައިވެރިވުމަށް މުސްލިމު އަޚުންނާއި އުޚުތުން ގަދަ އަޅާ މަސައްކަތް ކުރެއެވެ. އިޒްރޭލުގެ ރަހުމެއް ނެތް އަޅުވެތި އިސްތިޢުމާރީ ކަސްތޮޅުގައި ބެދިފައި އޮންނަތާ 75 އަހަރަށް ވުރެ ގިނަ ދުވަސްވީ ފަލަސްޠީނުންވެސް ފެނިގެން މިދަނީ ހަމަ އެ މަންޒަރެވެ.
