ގުންޑޮގަންއަށް އެންމެ އުނދަގޫވި ފޯނުކޯލު ގާޑިއޯލާ އަށް
10 އޯގަސްޓު 2023 | ބުރާސްފަތި 06:10ގުންޑޮގަން އަކީ ސިޓީ އަށް ގާޑިއޯލާ ގެނައި ފުރަތަމަ ކުޅުންތެރިޔާ
ސިޓީގެ ކެޕްޓަން އިކާއީ ގުންޑޮގަން އާއި ކޯޗު ގާޑިއޯލާ (ވ)
މެންޗެސްޓާ ސިޓީގެ ކެޕްޓަންކަން އެންމެ ފަހުން ކުރި އިކާއީ ގުންޑޮގަން މިހާތަނަށް އެންމެ އުނދަގޫވި އެއް ފޯނުކޯލުކުރީ ސިޓީގެ ކޯޗު ޕެޕް ގާޑިއޯލާ އަށް ކަމަށް ބުނެފި އެވެ.
ޖަރުމަނުގެ މިޑްފީލްޑަރު ބުނީ މިދިޔަ ހަފުތާގައި އޭނާ ގާޑިއޯލާ އަށް ފޯނުކުރީ، އެކުގައި އަށް އަހަރު ހޭދަކުރުމަށްފަހު ސިޓީ ދޫކޮށް ބާސެލޯނާ އަށް ބަދަލުވާ ވާހަކަ ބުނަން ކަމަށެވެ.
ގުންޑޮގަން އަކީ 2016 ވަނަ އަހަރު ގާޑިއޯލާ ޓީމާ ހަވާލުވުމަށްފަހު އެ ޓީމަށް ގެންދިޔަ ފުރަތަމަ ކުޅުންތެރިޔާ އެވެ. އެ ހަނދާންތައް އާކުރަމުން ގުންޑޮގަން ބުނީ އޭނާ އަށް ސިޓީގެ ހުށަހެޅުން ލިބުނީ ކަކުލަށް ލިބުނު އަނިޔާ ރަނގަޅުކުރަން އޮޕަރޭޝަން ކޮށްގެން އުޅެނިކޮށް ކަމަށެވެ. އަދި އަނިޔާ ރަނގަޅުވާން ދުވަސް ނަގާތީވެ ސިޓީއަށް ބަދަލުވުމުގެ ފުރުސަތު ގެއްލިދާނެ ކަމުގެ ނުތަނަވަސްކަން އެއިރު ކުރިމަތިވި ކަމަށެވެ.
އޭނާ އަދި ބުނީ ގާޑިއޯލާ އަކީ ބާސެލޯނާގެ މީހެއް ކަމަށާއި އެކުލަބުގައި އޭނާ ކޮށްފައިވާ ކޮންމެ ކަމަކާމެދު ގާޑިއޯލާ ފުރިހަމަ އަށް ވަރަށް ފަހުރުވެރިވާ ކަމަށެވެ. އަދި ބާސެލޯނާގެ ހުރިހާ މެޗެއް ކަހަލަ ގޮތަކަށް ގާޑިއޯލާ ބަލައި ހަދާ ކަމަށެވެ.
ގުންޑޮގަން އަކީ ޖަރުމަނުގެ ބަޔާން މިއުނިކަށް ގާޑިއޯލާ ކޯޗުކޮށްދިންއިރު ބޮރޫޝިޔާ ޑޯޓްމުންޑަށް މޮޅަށް ކުޅުނު ކުޅުންތެރިއެކެވެ. ގާޑިއޯލާގެ ލޮލުގައި އޭނާ އަޅައިގަތީ އެދުވަސްވަރު އެވެ. އަދި ސިޓީގައި ގުންޑޮގަން ވެގެންދިޔައީ ގާޑިއޯލާގެ އެންމެ އިތުބާރުހިފޭ އެންމެ މުހިންމު ކުޅުންތެރިޔާ އަށެވެ. މިހެންވެ ގާޑިއޯލާ ވަނީ އޭނާގެ ކެޕްޓަން ޓީމުގައި ބަހައްޓަން ވަރަށް މަސައްކަތް ކޮށްފަ އެވެ. ނަމަވެސް ސިޓީގެ ހުށަހެޅުން ދޫކޮށް ގުންޑޮގަން ބާސެލޯނާ އަށް ބަދަލުވާން ނިންމީ ކެރިއަރުގައި ތަފާތު ތަޖުރިބާއެއް ކޮށްލުމަށާއި ބާސެލޯނާ އަށް ކުޅެން ހިތުގައި އޮތް އެދުން ފުރިހަމަކޮށްލުމަށެވެ.
