ރެއާލް މެޑްރިޑްގެ ފޯވާޑް ވިނީޝިއަސް ޖޫނިއާ ޗުއްޓީގައި ހުރުމުން، ނަސްލީ ފުރައްސާރައިގެ މައްސަލައެއްގައި ތާވަލުކޮށްފައިވާ އަޑުއެހުން ފަސްކޮށްދިނުމަށް ވެލެންސިއާގެ ކޯޓެއްގައި އެދިއްޖެ ކަމަށް ރިޕޯޓުތަކުން ބުނެފިއެވެ.

ވިކްޓިމްގެ ހައިސިއްޔަތުން ވިނީޝިއަސް އަންނަ އަންގާރަ ދުވަހު ވީޑިއޯ ކޮންފަރެންސް މެދުވެރިކޮށް ހެކިބަސް ދިނުމަށް ހަމަޖެހިފައިވަނީ މި މަހުގެ 21 ވަނަ ދުވަހު ވެލެންސިއާގައި ކުޅުނު ސްޕެނިޝް ލީގުގެ މެޗެއްގައި ބްރެޒިލްގެ ފޯވާޑަށް ނަސްލީ ގޮތުން ގޯނާކުރި ކަމަށް ތުހުމަތު ކުރެވޭ ތިން މީހެއްގެ ހެކި އެނަލައިޒް ކުރާ ފަނޑިޔާރަކަށެވެ.

އުމުރުން 22 އަހަރުގެ ވިނީޝިއަސް ޗުއްޓީ ހޭދަކުރަމުން ދަނީ ފްލޮރިޑާގެ މިއާމީގައި ކަމަށް ރިޕޯޓްތައް ބުނާއިރު، އަލުން ޝެޑިއުލް ކުރަން ކުޅުންތެރިޔާގެ އެދުމަށް ފުރުސަތު ދިނުމާ މެދު ގޮތެއް ނިންމާނީ ފަނޑިޔާރެވެ. ވެލެންސިއާގެ ކޯޓަކުން މިދިޔަ މަހު ވަނީ ނަސްލީ ތަފާތުކުރުމުގެ މައްސަލަ ބަލަން ފަށައިފަ އެވެ.

ރެއާލް މެޑްރިޑާއި ވެލެންސިއާ ބައްދަލުކުރި މެޗު 10 މިނެޓަށް މެދުކަނޑާލީ މެސްޓަލާ ސްޓޭންޑުތަކުގައި އޭނާއަށް ގޯނާ ކުރާ މީހުންނަށް ވިނީޝިއަސް އިޝާރާތް ކުރުމުންނެވެ. ވިނީޝިއަސް އާއި ސްޓޭޑިއަމްގެ ސެކިއުރިޓީ ކެމެރާތަކުން ދެނެގަތް ތިން މީހުންގެ ތެރެއިން ދެ މީހަކު މިހާރު ވެސް ފަނޑިޔާރެއްގެ ކުރިމަތީގައި ހެކިބަސް ދީފައިވާއިރު އެންމެ ފަހުން ހެކިބަސް ދޭނީ ޖުލައި މަހުގެ 11 ވަނަ ދުވަހު އެވެ. ވެލެންސިއާއިން ވަނީ އެ ތިން ސަޕޯޓަރުން އުމުރަށް އެ ސްޓޭޑިއަމަށް ވަނުން މަނާކޮށްފައެވެ.

ބްރެޒިލްގެ މި ކުޅުންތެރިޔާއަށް ފުރައްސާރަކުރި ކަމަށް ބުނެ ސްޕެނިޝް ލީގުން ކަމާބެހޭ ފަރާތްތަކަށް ރަސްމީކޮށް ގިނަ ޝަކުވާތަކެއް ހުށަހަޅާފައިވާއިރު، އޭގެ ތެރެއިން ބައެއް މައްސަލަތައް ވަނީ މަޑުޖައްސާލާފައެވެ.

މެސްޓަލާ ސްޓޭޑިއަމްގައި ހިނގި މި ހާދިސާއަކީ ސްޕެނިޝް ލީގުގައި ވިނީޝިއަސް އަށް ކުރިމަތިވި ނަސްލީ ގޯނާގެ އެންމެ ފަހުގެ މައްސަލައެވެ. އެކަމާ ގުޅިގެން ސްޕެއިންގެ އިތުރުން ދުނިޔޭގެ އެކި ކަންކޮޅުތަކުގައި އެތައް ބަޔަކު ވަނީ ވަރަށް ބޮޑަށް ރައްދު ދީފަ އެވެ.