އެއްބަސްވުމުގެ ޝަރުތުތަކާ ޚިލާފުވެއްޖެނަމަ އެއްބަސްވުން ނިމުމަކަށް ގެނެސް، ކުށުގެ ދައުވާ އުފުލޭނެ
ޕީޖީ ހުސައިން ޝަމީމް ނޫސްވެރިންގެ ބައްދަލުވުމެއްގައި ވާހަކަ ދައްކަވަނީ
ރ. ދުވާފަރު ކައުންސިލުގެ ކޮރަޕްޝަން މައްސަލަގައި ދައުވާކުރުމުގެ ބަދަލުގައި ނަސޭހަތުގެ އެއްބަސްވުމެއް ހަދާފައިވާ ސަބަބުތައް ޕްރޮސެކިއުޓަރ ޖެނެރަލް ހުސައިން ޝަމީމް ކިޔާދެއްވައިފިއެވެ.
މި މައްސަލައިގައި، ދައުވާކުރުމުގެ ބަދަލުގައި، ޖިނާއީ އިޖުރާއަތުގެ ގާނޫނުގެ 97 ވަނަ މާއްދާގެ ދަށުން ނަސޭހަތުގެ އެއްބަސްވުމެއް ހަދާފައިވާއިރު، އެކަމުގެ ފަހަތުގައިވާ ސަބަބުތައް ޝަމީމް ވަނީ އޭނާގެ ބްލޮގްގައި ކިޔާދެއްވާފައެވެ.
ޝަމީމް ވިދާޅުވީ، ޖިނާއީ އިޖުރާއަތުގެ ޤާނޫނުގައި، ކުށުގެ ތުހުމަތުގައިވާ މީހުން، ކުށުން ދުރުހެލިވުމަށް ބާރު އެޅުމުގެ ގޮތުން، އެމީހުނަށް އިތުރު ފުރުޞަތު ދީ، މުޖްތަމަޢަށް ރުޖޫޢަވެ، މުޖްތަމަޢުގައި ކުށުން ދުރުހެލިވެގެންވާ ރަނގަޅު ދިރިއުޅުމެއް އުޅުމަށް މަގުފަހިކޮށްދިނުމަށްޓަކައި، އެމީހުންގެ މައްޗަށް ކުށުގެ ދައުވާ ކުރުމުގެ ބަދަލުގައި ނަޞޭޙަތްދީ މައްސަލަ ނިންމުމުގެ ބާރު ޕްރޮސިކިއުޓަރ ޖެނެރަލަށް ލިބިދީފައިވާ ކަމަށެވެ.
ޝަމީމް ވިދާޅުވީ ނަޞޭޙަތުގެ އެއްބަސްވުން ހެދުމާ ގުޅޭ ގޮތުން، ދައުވާކުރުމުގެ ބަދަލުގައި ޢާންމު މަޞްލަޙަތަށް އެންމެ ފައިދާހުރި ގޮތަކީ ކޮބައިކަން ދެނެގަތުމުގައި ބަލާނެ މިންގަނޑުތައް ކިޔައިދޭ ދެ ލިސްޓެއް ޤާނޫނުގައި އޮންނަ ކަމަށެވެ.
އެއީ ޢާންމު މަޞްލަޙަތަށް އެންމެ ފައިދާހުރި ގޮތަކީ ނަޞޭޙަތްދިނުން ކަމުގައި ނިންމުމަށް ބާރުއަޅާ ކަންތައްތައް އޮތް ލިސްޓަކާއި، ޢާންމު މަޞްލަޙަތަށް އެންމެ ފައިދާހުރި ގޮތަކީ ދައުވާކުރުން ކަމުގައި ނިންމުމަށް ބާރުއަޅާ ކަންތައްތައް އޮތް ލިސްޓެއްކަން ފާހަގަ ކުރައްވައި ޝަމީމް ވިދާޅުވީ، ދުވާފަރު ކައުންސިލްގެ މައްސަލައިގައި، ޢާންމު މަޞްލަޙަތަށް ފައިދާހުރީ ދައުވާ ކުރުންކަމަށް ބަލާނެ ލިސްޓުގައި އޮތް ކަންތައްތަކަށް ބަލައިގެން ކިޔައިފިނަމަ، އެލިސްޓުގައި ހުރި ތިން ކަމެއް ފުރިހަމަވުމަކީ އެކަށީގެންވާ ކަމެއް ކަމަށެވެ.
އެއީ، ދައުލަތުގެ މުވައްޒަފެއްގެ ރަސްމީ މަސައްކަތާ ގުޅޭގޮތުން ހިނގި ކަމަކަށްވުމާއި، މުޖްތަމަޢުގައި ޒިންމާދާރު މަޤާމެއްގައި ތިބި ބަޔަކު ކުރި ކަމަކަށްވުމާއި ކުށްކުރުމުގައި ކޮރަޕްޝަންގެ ޢަމަލެއް ހިމެނުން ކަމަށް ޝަމީމް ލިޔުއްވާފައިވެއެވެ.
ޝަމީމް ވިދާޅުވީ، ދައުވާކުރަން ބާރުއަޅާ ލިސްޓުން ފުރިހަމަވީ، ލިސްޓުގައި އޮތް 13 ކަންތަކުގެ ތެރެއިން އެންމެ 3 ކަންތައް ކަމަށެވެ. އެހެންނަމަވެސް، ނަޞޭހަތްދިނުމަށް ބާރުއަޅާ ލިސްޓުގައި ހުރި ހުރިހާ ކަމެއް ފުރިހަމަވާކަމަށް ޝަމީމް ވިދާޅުވިއެވެ.
ވީމާ، ޤާނޫނު މިހާރު އޮތް ގޮތުން، މިމައްސަލައަކީ ނަޞޭޙަތުގެ އެއްބަސްވުމެއް ހެދުމަށް ހުއްދަ ލިބޭ، އެކަމަށް ޤާނޫނު ތަޞައްވުރު ކޮށްފައި އޮތް، ޝަރުޠު ހަމަވާ މައްސަލައެއްކަން ފާހަގަ ކުރައްވައި ޝަމީމް ވިދާޅުވީ، ޤާނޫނު ތަންފީޒުކުރުމުގައިވެސް، އޯގާތެރިކަން އިސްކުރެވެން އޮތް ޙާލަތުތަކުގައި، އޯގާތެރިކަން އިސްކުރުމަކުން، ޤާނޫނީ ނުރަނގަޅު ނަތީޖާއެއް ނުނިކުންނާނެ ކަމަށެވެ.
މި އެއްބަސްވުމުގެ މުއްދަތުގައި އިތުރު ކުށެއް ނުކުރުމަށް ޝަރުތުކޮށް، އެއްބަސްވުމުގެ ޝަރުތުތަކާ ޚިލާފުވެއްޖެނަމަ އެއްބަސްވުން ނިމުމަކަށް ގެނެސް ކުށުގެ ދައުވާ އުފުލޭނެކަން މި އެއްބަސްވުމުގައި ބަޔާންކޮށްފައި ވާނެކަމަށްވެސް އެ އޮފީހުން ވަނީ ބުނެފައެވެ.
