ދިރާސީ އައު އަހަރަށް، މާލޭ ސަރަހައްދުގެ ސްކޫލުތަކަށް ދިމާވެފައިވާ ޖާގައިގެ ދަތިކަމަށް ހައްލު ލިބޭނެ: އެޑިޔުކޭޝަން މިނިސްޓްރީ
އަތޮޅުތެރެއިން މާލެއަށް ބަދަލުވާ ކުދިންނަށްވެސް ޖާގަ ލިބޭނެ
ރާއްޖެޓީވީގެ ފަލަސުރުޚީ ޕްރޮގްރާމުގެ ތެރެއިން
ދިރާސީ އައު އަހަރަށް، މާލޭ ސަރަހައްދުގެ ސްކޫލުތަކަށް ދިމާވެފައިވާ ޖާގައިގެ ދަތިކަމަށް ހައްލު ލިބޭނެ ކަމަށް އެޑިޔުކޭޝަން މިނިސްޓްރީން ބުނެފިއެވެ.
ރާއްޖެޓީވީގެ ފަލަސުރުޚީ ޕްރޮގްރާމްގައި މިނިސްޓްރީ އޮފް އެޑިޔުކޭޝަންގެ ޕަރމަނަންޓް ސެކްރެޓަރީ އަހްމަދު އަލީ ވިދާޅުވީ މާލޭ ސަރަހައްދުގެ ސްކޫލުތަކުގެ ޖާގަ އިތުރުކުރުމަށް ކުރެވެމުންދާ މަސައްކަތުގެ ތެރެއިން ގިނަ ސްކޫލުތަކެއް ދިރާސީ އައު އަހަރަށް ހުޅުވި، އެސްކޫލުތަކުގައި ކިޔަވައިދޭން ފެށޭނެކަމަށެވެ.
މިހާރު އެންމެ ޑިމާންޑް ބޮޑު ސަރަހައްދަކަށް އޮތީ ހުޅުމާލެ ފޭސް-2ކަން ފާހަގަކުރައްވައި އަހްމަދު އަލީ ވިދާޅުވީ، ފޭސް-2ގައި އިމާރާތް ކުރެވޭ ސަލާހުއްދީން ސްކޫލާއެކުވެސް އެ ޖާގައިގެ ދަތިކަމުގެ މައްސަލައަށް ވަރަށް ބޮޑު ހައްލެއް ލިބޭނެ ކަމަށެވެ. މާލޭގައި ދަރުމަވަންތަ ސްކޫލު ހުޅުވޭނެ ކަމަށާއިި، މި ސްކޫލުން އިތުރު ޖާގަތަކެއް ލިބޭކަން އޭނާ ފާހަގަކުރެއްވިއެވެ.
މީގެ އިތުރުން އަހްމަދު އަލީ ވިދާޅުވީ އަތޮޅުތެރެއިން މާލެއަށް ބަދަލުވާ އާއިލާތަކުގެ ކުދިންނަށްވެސް މާލޭ ސަރަހައްދުގެ ސްކޫލުތަކުން ޖާގަ ލިބޭނެ ކަމަށެވެ.
އަރަބިއްޔާ ސްކޫލަށް އިޝާރާތްކުރައްވައި އެޑިއުކޭޝަން މިނިސްޓްރީގެ ޑެޕިއުޓީ މިނިސްޓަރު މުހައްމަދު އިހުސާން ވިދާޅުވީ އަރަބިއްޔާ ސްކޫލުގެ އައު އިމާރާތުގެ މަސައްކަތަށް ޚާއްސަ އިސްކަމެއް ދޭކަމަށެވެ. ގިނަ ސްކޫލުތަކުގެ މަސައްކަތްތައް ކުރިއަށްދާއިރު، ޖަމާލުއްދީން ސްކޫލުގެ އަލަށް އިތުރުކުރެވޭ ބައިގެ މަސައްކަތްވެސް ކުރިއަށްދާކަމަށް އޭނާ ވިދާޅުވިއެވެ.
ދިރާސީ އައު އަހަރަށް ދަރިވަރުން އެއް ސްކޫލުން އަނެއް ސްކޫލަށް ބަދަލުވެއެވެ. އަދި އަތޮޅުތެރޭގެ ސްކޫލުތަކުން ގިނަ އަދަދެއްގެ ދަރިވަރުން މާލޭގެ ސްކޫލުތަކަށް ބަދަލުވެއެވެ. ނަމަވެސް ޖާގަ ނުލިބޭ މައްސަލަ ބޮޑުވެ ބައެއް ބެލެނިވެރިން މީގެ ކުރިން ކަންބޮޑުވުން ފާޅުކޮށްފައިވެއެވެ. ނަމަވެސް ކުރިއަށް ދިރާސީ އައު އަހަރަށް މި މައްސަލަ ކުރިމަތިނުވާނެކަމަށާއި، ގިނަ ސްކޫލުތަކެއް ދިރާސީ އައު އަހަރަށް ހުޅުވި ކިޔަވައިދޭން ފެށޭނެ ކަމުގެ ޔަގީންކަން އެޑިޔުކޭޝަން މިނިސްޓްރީން ދެއެވެ.
