ޗުއްޓީއަށް ފުރުމުގެ ކުރިން ގެއާއި ގެންގުޅޭ ސާމާނަށް ސަމާލު ވުމަށް ފުލުހުން އިލްތިމާސްކޮށްފި
ސައިކަލު ތަޅުލާފައި ބެހެއްޓުން މުހިންމު
އީދު ޗުއްޓީއަށް ރަށަކުން މީހުން ފުރަނީ
ޢީދު ބަންދާއި ސްކޫލް ބަންދުގައި ރަށުން ބޭރަށް ފުރާ ފަރާތްތަކުން ގެއާއި ގެންގުޅޭ އަގުބޮޑެތި މުދަލަށް ސަމާލުވުމަށް ދިވެހި ފުލުހުންގެ ޚިދުމަތުން އިލްތިމާސްކޮށްފިއެވެ.
އެ އިދާރާއިން ބުނީ ޗުއްޓީއަށް ދިއުމަށް ރަށުން ބޭރަށް ފުރަންދާން ގެއިން ނުކުތުމުގެ ކުރިން ގެދޮރު ރަނގަޅަށް ތަޅުލެވުނުތޯ ޔަގީންކޮށްލަންވާނެ ކަމަށެވެ. އެގޮތުން، ފެންލައިޓް، ވައިގޮޅި، ގޭގެ ކުޑަދޮރުތައް އަދި ބެލްކަނި ދޮރުވެސް ތަޅުލެވުނުތޯ ޔަގީންކޮށް، ގޭ ދޮރުމަތީގައި އޮންނަ ފައިފުހި ދަށުގައި ނުވަތަ ފައިވާން ހަރުގައި ހުންނަ ބޫޓު ތެރެއަށް ލާފައި ތަޅުދަނޑި ނުބޭއްވުމަށް ވަނީ އިލްތިމާސްކޮށްފައެވެ. އަދި ރޭގަނޑުގެ ވަގުތުގައި ގެ ދިއްލައި، ބެލެހެއްޓޭނެ އިންތިޒާމު ހަމަޖެއްސުމަށް ޒިންމާދާރު ކޮންމެވެސް މީހަކާ ގެ ހަވާލުކުރުމަށް ވެސް ވަނީ އިލްތިމާސްކޮށްފައެވެ.
ގޭގައި ހުންނަ އަގުބޮޑެތި މުދާ ރައްކާތެރިކުރުމަށް އިލްތިމާސްކޮށް ފުލުހުން ބުނީ ލެޕްޓޮޕް، އައިޕެޑް، ޓެބްލެޓް، ގަހަނާ އަދި އެހެނިހެން ތަކެތި، ތަޅުލެވޭ ތަނެއްގައި ރައްކާކުރުމަކީވެސް އެޅޭނެ މުހިންމު ފިޔަވަޅެއް ކަމަށެވެ. އަދި ގޭގައި ފައިސާ ނުބެހެއްޓުމަށް ވެސް އެ އިދާރާއިން އިލްތިމާސްކުރެއެވެ.
ޗުއްޓީއަށް ފުރަންދިއުމަށް ގެއިން ނުކުތުމުގެ ކުރިން، ގޭތެރޭގައި ހިނގާފާނެ އަލިފާނުގެ ހާދިސާއަކުން ރައްކާތެރިވުމުުގެ ފިޔަވަޅުއެޅުމަށް އިލްތިމާސްކޮށް ފުލުހުން ބުނީ ގޭސް ލީކުވާގޮތަށް ހުރިނަމަ އެކަން ރަނގަޅުކޮށް ނުވަތަ ގޭސްފުޅި ރެގިއުލޭޓަރ ނައްޓާލުން މުހިންމު ކަމަށެވެ. އަދި ގޭތެރޭގެ ކަރަންޓުގެ ހާލަތު ރަނގަޅުތޯ ކަށަވަރުކުރުމާއެކު ކަރަންޓު ޝޯޓޭޖެއް އައިސްގެން ނުވަތަ އެނޫންވެސް ގޮތަކުން ވިޔަސް އަލިފާނުގެ ހަދިސާއެއް ނުހިނގާނެ ފަދަ ގޮތަކަށް ގޭތެރޭގެ ކަންކަން ހަމަޖެއްސުމަށާއި ބޭނުން ނުކުރާ ހުރިހާ ތަނެއް ކަރަންޓު ސުވިޗް އޮފްކޮށް ފެން ލީކުނުވާނޭހެން އިސްކުރުތައް ރަނގަޅަށް ބަންދުކުރުމަށް ވެސް ވަނީ އިލްތިމާސްކޮށްފައެވެ.
ގެއަށް ލިބިދާނެ ގެއްލުމުގެ އިތުރުން ތިމާ ދުއްވާ ސައިކަލުގެ ސަލާމަތާއި ރައްކާތެރިކަން ޗުއްޓީއަށް ފުރުމުގެ ކުރިން ކަށަވަރުކުރުމަށް ވެސް ވަނީ އިލްތިމާސްކޮށްފައެވެ. އެގޮތުން، މާލޭގައި ނަމަ ރޭގަނޑު އަލިކަން ހުންނަތަނެއް ނުވަތަ އާންމުކޮށް މީހުން ވަދެނުކުމެހަދާ މަގެއް ނުވަތަ ސީސީޓީވީ ކެމެރާ ހުންނަ އަދި ރައްކާތެރި ސަރަހައްދެއްގައި ސައިކަލު ޕާކުކުރުމަށާއި ހުންގާނު އަދި ޝަޓަރ ލޮކްކޮށް، އިތުބާރުކުރެވޭ ޒިންމާދާރު މީހަކާ ތަޅުދަނޑި ހަވާލުކުރުމަށް ވަނީ އިލްތިމާސްކޮށްފައެވެ.
ޗުއްޓީ ދުވަސްވަރަކީ ދަތުރު ދިއުމާއި މޫދަށް އެރުންވެސް އިތުރުވާނެ ދުވަސްވަރަކަށްވާތީ ދަތުރު ދިއުމާއި މޫދަށްއެރި އުޅުމުގައި ތިމާއާއި އަނެއްކުންގެ ސަލާމަތާއި ރައްކާތެރިކަމަށް ސަމާލުކަންދިނުމުގެ ގޮތުން އޮއެވަރަށާއި ދިޔަވަރަށް ވިސްނައި، މޫދަށް އެރުމުގެކުރިން ރައްކާތެރިކަމުގެ ފިޔަވަޅު އެޅުމަށް ވެސް ފުލުހުން އިލްތިމާސްކުރެއެވެ. އަދި ހާއްސަކޮށް، މޫދަށްއެރި އުޅުމުގައި ކުޑަކުދިންގެ ކޮންމެ ހަރަކާތެއް ވީހާވެސް ގާތުން ބަލައި އެކުދިންނަށް ރައްކާތެރިކަން ކަށަވަރުކޮށްދޭން ޖެހޭކަން އެ އިދާރާއިން ފާހަގަކޮށްފައިވެއެވެ.
މީގެ އިތުރުން މަކަރާއި ހީލަތުން ފައިސާ އާއި މުދާ ހޯދުމަށް ކުރަަމުންދާ ކަންކަމުން ރައްކާތެރިވުމަށް އިލްތިމާސްކޮށް، ފުލުހުން ވަނީ އެކި ޕްރޮމޯޝަންތަކުގެ ނަމުގައާއި ހަދިޔާ ލިބިގެންކަމަށްބުނެ ގުޅާ މީހުންނަށް ޖަވާބުދާރީ ނުވުމަށް އެދިފައެވެ، އަދި ކޭޝްކާޑުގެ މައުލޫމާތާއި އޯޓީޕީ ކޯޑު ފަދަ މުހިންމު މައުލޫމާތު ހިއްސާނުކުރުމަށާއި ގޮތް ނޭނގޭ މީހުން ފޮނުވާ ލިންކުތަކަށް ނުވަނުމަށް ވެސް ވަނީ އިލްތިމާސްކޮށްފައެވެ.
