މުއްދަތު ހަމަވިއިރު 551 ޝަކުވާ، ފަސް ދުވަހުގެ ތެރޭގައި ޖަވާބު ދޭނެ

މިއަހަރުގެ ސެޕްޓެމްބަރު މަހު ބާއްވާ ރިޔާސީ އިންތިޚާބުގައި ވޯޓުލުމުގެ ޙައްގު ލިބިފައިވާ މީހުންގެ ލިސްޓަށް ޝަކުވާ ހުށަހެޅުމަށް ހުޅުވާލި މުއްދަތު ހަމަވިއިރު 551 ޝަކުވާ ހުށަހަޅާފައިވާ ކަމަށް އިލެކްޝަންސް ކޮމިޝަން (އީސީ) އިން ބުނެފިއެވެ.

މިއަހަރުގެ ރިޔާސީ އިންތިޚާބުގެ ވޯޓާސް ލިސްޓާ ގުޅޭގޮތުން ޝަކުވާ ހުށަހެޅުމުގެ ފުރުސަތު އީސީން ހުޅުވާލީ މިދިޔަ ބުރާސްފަތި ދުވަހުގެ ނިޔަލަށެވެ. އީސީގެ ނައިބު ރައީސް އިސްމާއިލް ހަބީބު އާއްމު ކުރައްވާފައިވާ ހިސާބުތަކުން ދައްކާ ގޮތުގައި މި މުއްދަތުގެ ތެރޭގައި ވޯޓާސް ލިސްޓާ ގުޅޭގޮތުން ހުށަހަޅާފައިވަނީ ޖުމްލަ 551 ޝަކުވާއެވެ. އޭގެ ތެރޭގައި ގިނައީ މަރުވެފައިވާ މީހުންގެ ނަން ލިސްޓުގައި ހިމަނާފައިވާތީ ހުށަހަޅާފައިވާ ޝަކުވާއެވެ. މި މައްސަލައާ ގުޅުންހުރި 465 ޝަކުވާ އީސީއަށް ވަނީ ހުށަހަޅައިފައެވެ.

ދެވަނައަށް އެންމެ ގިނައިން ހުށަހަޅާފައިވަނީ އެޑްރެސް ބަދަލުވެގެން ހުށަހަޅާފައިވާ ޝަކުވާއެވެ. އެގޮތުން، އެޑްރެސް ބަދަލުވެގެން 58 ޝަކުވާއެއް ހުށަހަޅާފައިވާއިރު ލިސްޓުގައި ނަން ނުހިމެނޭތީ 19 ޝަކުވާއަކާއި ނަން ބަދަލުވެގެން ފަސް ޝަކުވާއަކާއި ދާއިރާ ބަދަލުވެގެން ތިން ޝަކުވާއެއް އަދި އައިޑީ ބަދަލުވެގެން ޝަކުވާއެއް ވަނީ ހުށަހަޅައިފައެވެ.

މި މައުލޫމާތުތައް ހިއްސާކުރައްވައި ހަބީބު ވިދާޅުވީ މުއްދަތު ހަމަވިއިރު ލިބިފައިވާ ޝަކުވާތަކަށް ކުރިއަށް އޮތް ފަސް ދުވަހުގެ ތެރޭގައި އީސީން ޖަވާބު ދޭނެ ކަމަށެވެ. އަދި އެ ކޮމިޝަނުން ދޭ ޖަވާބާމެދު ހިތްހަމަނުޖެހޭނަމަ އެ މައްސަލައެއް ހައިކޯޓަށް ހުށަހެޅުމުގެ ފުރުސަތު ވެސް އެ ފަރާތަކަށް ލިބިގެންވާނެކަން އޭނާ ފާހަގަކުރެއްވިއެވެ.

މީގެ އިތުރުން ވޯޓުދިނުމުގެ ހައްގު ލިބިފައިވާ މީހުންގެ ފައިނަލް ލިސްޓު އާންމު ކުރުމުން، ޝަކުވާ ހުށަހެޅުމަށް ހުޅުވާލި ފުރުސަތުގައި ޝަކުވާ ހުށަނާޅާ ފަރާތަކަށް ދެން ޝަކުވާ ހުށަހެޅުމުގެ ފުރުސަތެއް ނޯންނާނެ ކަމަށާއި ދާއިމީ ލިސްޓުގައި ނަން ނެތް މީހަކަށް ރިޔާސީ އިންތިހާބުގައި ވޯޓުލުމުގެ ފުރުސަތު ނުލިބޭނެކަން ވެސް ހަބީބު ފާހަގަކުރެއްވިއެވެ.

މިއަހަރުގެ ރިޔާސީ އިންތިޚާބު ސެޕްޓެމްބަރު މަހުގެ ނުވަ ވަނަ ދުވަހު ބާއްވާއިރު އެ އިންތިޚާބުގައި ވޯޓުލުމުގެ ޙައްގު ލިބިފައިވާ މީހުންގެ ތެރެއިން ރަށްވެހިވެފައިވާ ރަށްނޫން އެހެން ތަނެއްގައި ވޯޓުލުމަށް ރީ-ރަޖިސްޓްރޭޝަން އަންނަ ޖުލައި މަހުގެ 16 ވަނަ ދުވަހު ހުޅުވާލާނެއެވެ. މި ފުރުސަތު އޮގަސްޓް 5 އަކާ ހަމައަށް ލިބިގެންދާނެއެވެ.

9 ސެޕްޓެމްބަރު 2023ށް 18 އަހަރު ފުރޭ 282،672 މީހުންގެ ވޯޓުދިނުމުގެ ޙައްޤު ލިބިފައިވާ ލިސްޓު ދިވެހި ސަރުކާރުގެ ގެޒެޓްގައި ވަނީ ޝާއިއުކޮށްފައެވެ.